МахIаммад-хан

МахIаммад-хан, цала ппу куна, бажар бусса, дяъвилул пагьму бусса ивкIун ур. Амма душманталгу чIявусса бивкIун бур. МахIаммад-хан, кIинттул чIумал цаппара нукартуращал архIал арандалийн лавгун, Азирбижаннал хантурачIа ликкайсса ивкIун ур.

Ца шинал Нухулив ливксса чIумал, Нухуллал ханнащал архIал кьатIувппай лавгсса чIумал, му ханнащал тIааьн дакъашиву хьуну дур. МахIаммад-хан цала цIанихсса, ххишала бакъа авурсса ккацлуй акъа буртти къаикIайсса ивкIун ур. Нухуллал хан айгъурчай ивкIун ур, хьхьичI нанисса МахIаммад-ханнал ккацлуйн байгьин къавхьуну, мунал айгъур ххявххун, МахIаммад-хан инжит увну ур. Ина ттул ялун чу цанна бакьлакьисса куну, МахIаммад-ханнал гужну дяъви бувну бур. Инагу, ккацлуй буртти къаикIлай, чай буртти илукIу куну, Нухуллал ханналгу кьянкьасса жуав дуллуну дур. Му бакъассагу, уттинияр мукьах ттучIан маучIаванна кунугу, хъиннува къаччан бикIан бувну бур. Му къаччан бикIан баву МахIаммад-ханнан хъинну бювххун бур. Цаппара шинну лях гьангу риртун, му хан хъяврин увну, муначIа ливккун, цала къатлуву цувагу ивкIуну, Нухуллал ханшиврийгу цува авцIуну ур. Амма чIал къавхьуну, Патяли-хан тIисса Къуваллал ханналгу кумаг бувну, МахIаммад-хан хьхьичIвама ханнал гъан-маччаминнал Нухулияту уккан увну ур.
Мунийну Патяли-ханнащалгу душманшиву дагьну дур. Мукуна Илдар-баг тIисса, МахIаммад-ханнан гъансса, хъинну виричусса ца адаминагу МахIаммад-ханнащал рагьну, мунаяту ливхъун, Патяли-ханначIан лавгун ивкIун ур. Патяли-ханналгу му Чуруллал, яни Дарбантуллал, хIакимшиврий ивтун ивкIун ур. Мукуна МахIаммад-ханнащал Хасбулат-шамхалгу душманну ивкIун ур. Яни халкьлавчитурал заманнай аривсса шамхалтурахь бивкIсса зунттурду МахIаммад-ханнал зевххуну, миннал Лаккуяту ласлай диркIсса магъалартту къадулун куну тIий, Хасбулат-шамхалгу мунащал душманну авцIуну ур. Патяли-ханнал ва Хасбулат-шамхаллул, МахIаммад-ханнаща Лакку кIантту зевххуну, Ла­ккуй ханшиврий Илдар-баг итан кьаст лархIуну дур. Патяли-хан, Илдар-баг, Хасбулат-шамхал шамагу цала-цала аьралуннащал МахIаммад-ханнал ялун бавчуну бур. Хасбулат-шамхаллущал архIал арнилсса (къумукь) бакъассагу, цIахъар, ахъушигу бивкIун бур, МахIаммад-хан миннал хьхьичIун Хъусра­хьхьун увккун ур. 1184 шинал Хъусрахь ми кIивайнналагу дянив хъунмасса дяъви хьуну бур. МахIаммад-ханнал ми циняв ххит бувну, махъунмай бищун бувну бур. Миннаяту тамансса ясирданунгу лавсун бур.
Мунияр махъ Патяли-ханнал ва Ширваннал ханнал дяъви багьну бур. Ширваннал ханнал цанма кумагран Хунзахъиял ханнайн, яни Нуцал-ханнайн оьвкуну бивкIун , мугу лавгун ивкIун ур. Амма, Щамахлив му Патяли-ханнахьхьун иривну ивкIун, мунан кумаг­ран бувкIун бивкIсса ахъушиял аьралуннал бакIчитурал му сагъну итан къабучIиссар куну увкукун, Патяли-ханнал рухсат буллуну, миннал му ивкIуну ур. Нуцал ивчIавугу багьана бувну, Патяли-ханнащал душмансса Хайдакьнал ханнащал, яни Амир-ХIамза-уцумищалгу, союз хьуну, Патяли-ханнаяту Нуцал-ханнал интикьам ласун наниссару тIий, МахIаммад-хан ва Амир-ХIамза уцуми Патяли-ханнал ялун бавчуну бур. Миннащал архIалгу Хунзахъиял аьра­луннаятусса тамансса бивкIун бур. Хасбулат-шамххаллущал душмансса Гъазанищуллал хангу ивкIун ур. Патяли-ханнащалгу цIахъар, ахъуши, цаппара Хасбулат-шамххаллул аьралгу бивкIун бур. Самурдал тия чулий, Кудишан тIисса майданнив, кIивайнналагу дянив хъунма­сса дяъви хьуну, Патяли-ханнал аьрал ливну бур, цувагу хъинну захIматну ливхъун, къуртал хьуну ур. Къуваллал ханшиврийгу МахIаммад-хан ивтун ур. Дяъвилуву Илдар-баг ва Гъазанищуллал хангу ивкIуну ур.
Дяъви къуртал шайхту, Па­­­­­­тяли-ханнал КIилчинмур Ека­териначIан вакил гьан увну, мунияту цанма кумаг тIалав бувну бур. Мунилгу Дагъусттаннайн цаппара аьрал гьан бувну бивкIун бур. Мунихлунугу чIал къавхьуну МахIаммад-хан Къуваллавату увккун ур. Амма мунияр махъ чIал къавхьуну МахIаммад-хан ва Патяли-хан цаннащал ца бавкьуну, дустал хьуну бур. МахIаммад-ханнал Шагьимардан тIисса цала арсгу Патяли-ханначIан гьан увну ивкIун ур. Муналгу, му кьамулгу увну, цала канихьсса ца райондалул ялувгу ивтун ур…
1203 шинал МахIаммад-хан ивкIуну, мунал кIанттай ханшиврий Сурхай тIисса мунал арс авцIуну ур.

КIилчинма Сурхай-хан (Хъун-Бутта)

Сурхай-хан элму дурккусса аьлимчу ивкIун ур. Щалва кьуран дакIних лавхьхьусса хIапизгу ивкIун ур. Гъумуксса шанма мизит мунал цIу бувну бур, яни БурхIай мизит, Кьадинал мизит, Нюжмардиял мизит. Бусурманшивугу, буттал кIанугу ххирасса ивкIун ур.
Дагъусттаннал хантал, шамхалтал, уцумихъул оьруснал канийн лавгун махъгума му къалавгун ур. ХIатта цала кIанттугу, цала ханшивугу, ихтиярдугу мунахь цахьра риртун, ххишалдаран чингу дулунну, харжгу бишинну тIий бивкIун бур оьрус. Амма мунал кьамул къабувну бур. Цала кIантту ябанна тIий, оьруснащал дяъвирду буллай, дяъвирду буллалиминнан кумаг­ру буллай, цащава бю­хъаймургу, ца ххишалагу бувну бур. Оьрус паччахIнащал дяъви бан тIий, Къуругьав, Хьхьургъив къаларду бувну бур, Хъусрахь сангарду дурну дур. Оьрус паччахIнащал дяъви буллалисса Къуваллал ханнан, яни Шайхаьли-ханнан кумаг­ран 20-азара адаминащал архIал Чурлив (Дарбантлив) лавгун ур. Амма, Чурул оьруснайн таслим хъанан бивкIукун, махъунай зана ивкIун ур. Оьрус­найн таслим къахъанахъисса ЧIарахъиян кумагран цал цува лавгун ур, цалгу Халид тIисса цала арс гьан увну ур. Мукуна Баку-ханнан кумаг­рангу НухI-баг тIисса арс гьан увну ур.
1212 шиннал 10 азара адаминащал архIал, кIиягу цала арсругу бувцуну, Шайхаьли-ханнан кумагран Къуваллавун лавгун, Алпан тIисса кIанай генерал Булгаковлуйн данди ув­ккун ур. Ахиргу, цичIав къабювхъуну, оьрус­нал Шайхаьли-ханнаща Къувалгу лавсун бур, мунаща цащавагу, яни Сурхай-ханнащагу, Къуругьавсса къалагу лавсун, Кураллал билаятгу лавсун, Кураллал ханшиврийгу мунал уссил арс, гьамгу цала душ буллусса куяв, Аслан-хан ивтун ур. ЧIал къавхьуну Хьхьургъив­сса къалагу лавсун бур. Къалалул начальникну Закаръя тIисса мунал арс ивтун ур. Мунил хъиривгу оьруснал Хъусрахьсса сангардугу ларсун, Лакку кIантту лавсун къуртал бувну, мува Ас­лан-ханнахьхьун буллуну бур. Мунащал архIал Алпаннайх, ЦIиликIуннайх, Къарачайлийх, Гугчайлийх – кIани-кIанттайх занай, лакрал хъинну чIявусса арамтал ливтIуну, зия хьуну бур, ликъавтIуну ливчIмигу ку са­къат хьуну, бизар хьуну, шацI хьуну бивкIун бур. Му чIумалсса лак­рал къумасса захIматсса хIал буслай, ца шаэрнал укунсса наз­мугума дурну дур:

Алпаннайн, ЦIиликIуннайн,
Къарачайлийн, Гугчайлийн
Заназаврил хIал ливчIрив
Вай лакрал жагьилтурай…

Цаманалгу куну бур:

Алпаннайн, ЦIиликIуннайн,
Къарачайлив, Гугчайлив
Бикъавна ажал литIлай,
Вай хIал бури вирттаврай.

Кураллал округ оьруснал лавсукун, Сурхай-хан, кумаг тIалав бан тIий, Ираннайн Патяли-шагьначIан лавгун ур. Лаккуй цала кIанттайгу Муртазааьли тIисса цала чIивима арс кьаивтун ивкIун ур. Мугу Аслан-ханнал ниттийхсса уссу ивкIун ур. Яни Аслан-ханнал ппу ивкIуну махъ, нину Сурхай-ханнал дурцуну, муницIа увсса уссу ивкIун ур. Мунияту Аслан-ханнал бигьану цала чулийнай аччан увну, арс буттайн къаршину ацIан увну ур. Миннал дянив занай, цаннал махъ цаннан баян буллайгу Патяли тIисса миннал кIинналагу уссу ивкIун ур. ЧIал къавхьуну аьраллу хIадур бансса арцущал архIал Сурхай зана ивкIун нанисса хавар бавну бур. Му Лаккуйн учIан къаитан, цаппара аьралуннащал мунал хьхьичIун Муртазааьли ув­ккун ур. Амма Хъусрахь мунал пикри баххана хьуну, буттацIун авкьуну ур, цала ва Аслан-ханнал дянив занай ивкIсса Патялигу ивкIуну ур. Мукуна цайна къаршину ихтилат бувсса, яни ца мукъуй бавцIуну цан къабикIайссару, цал бурхьни хъанай, цал ццу хъанай цуксса хIаллайру бикIантIисса куну, ихтилат бувну тIий, Гъумучатусса Оьмаригу ивкIуну ур. Му чIумал Аслан-хангу Гъумук ивкIун ур. Амма Муртазааьлийн вихшала къадуллай, мунал чулухунай вичIилий, хьхьувай шаний утту­къаихьлай ивкIун ур.
Ца хьхьуну хьхьудядизал, увкIун ца яручунал, къалалул буржирайнгу лавхъун, Сурхай-хан Гъумукун нанишиву буслай, яру мазрай балай куну бур:

Багьадир Сурхайги вачIулив вугу
Ва аьраб аслангу
хьутулив вугу…
ЯтIулсса аслангу
ливхъун най ури.

Му баяйхту, Аслан-хан ливхъун, Аьхъарав МахIадхъачIан лавгун ур. МахIадхъалгу, му яан, мунащал архIал цала оьрчIругу гьан бувну, Къуругьав тIайла увккун ур.
Ираннаяту дирирсса арцуцIух аьраллугу батIлай, Сурхай-хан дяъви бан хIадур хъанай ивкIун ур, амма ялагу цичIав къабювхъуну бур. Хъусрахьхьун оьрус бучIайхту, кулпатгу архIал бувцуну, ласун шаймургу ларсун, Ссугърахьхьун ливхъун ур. Ссугъращатугу кIилчингу Ираннайн лавгун, Ираннал ва оьруснал дяъви байбихьланнин Ираннай авцIуну ур. Дяъви байбишайхту, Ираннайн тамахIрай, Ссугърахьхьун зана хьуну ур. Амма Ираннащагу оьруснащал дяъви бан къабювхъуну, ччяни дакьаву дурну дур.
Сурхайгу Ссугърахь ивкIуну ур 1242 шинал. Сурхай-хан ивкIуну махъ мунал арснал НухI-багналгу, Аьндархъи ва СсурхIи цацIунма бакьин бувну, Аслан-ханнаща Лакку кIану ласунна тIий, кIирагу чулухату мунащал дяъви бувну бур. Амма мунащагу цичIав къабювхъуну бур. Аслан-ханнал кIивайвагу аьрал, яни Аьндархъиял ва СсурхIиял аьрал, лиян бувну бур. НухI-баггу кулпатращал архIал, Чачан-Чаргаснавух хьуну, Анапалийн увккун, Турк­навун лавгун ур.
МунацIун бавкьуну тIий, Аслан-ханнал СсурхIиял дучригу хъямала бан бувну бур.

 

 

 
Аслан-ХIусайн-хан

Аслан-хан Сурхай-ханнал Шагьимардан тIисса уссил арс ивкIссар, гьамгу цала душ буллусса куявгу ивкIссар. Аслан-хан Хунзахъиял Оьмаханналгу ссил арс ивкIссар. Амма, махъ заманнай муная нигьачIий, Сурхай-ханнал му цала канихьсса кIанттаяту уккан увну ивкIссар. КIани-кIанттайх занай ивкIун ур, яни цаппара хIаллай цIивикъаншиву дуллай Гуржисттаннайх занай ивкIун ур, яла Туркнавун лавгун, туркнал аьралуннавун увххун, кIира шин Арзурумрай дурну дур. Яла, зана ивкIун увкIун, оьруснал аьралуннавун увххун ур. Оьрусналгу, мунайн вихшала дурну, му хъинну хьхьичIунай лавсун ур. Яни Кураллал округгу, Лакрал округгу кIивагу мунахьхьун буллуну бур. Хунзахъиял хантал ливтIуну махъ Хунзахъиял ханшивугу мунахьхьун дуллуну дур. Му чIумал цува Лаккуй, Нуцал тIима арс Кураллаву, МахIаммад-Мирза тIима арс Хунзахъ ханшивурттай бикIайсса бивкIун бур. Та замана кIулсса лакрал хъуни арамтурах вичIи диширча, Аслан-хан оьруснащал архIал Лаккуйн учIайхту, оьруснан накI, нис, ккунукру цичIав дукия даххан къабучIиссар куну, оьруснаятугу кьюлтIну агьалинан баян бувссар тIар. Мунил ялув оьруснал цайнма шикаят бувкун, ва укун цичIав дакъасса, мискинсса кIанттур, шиккусса халкьуннал бакIлахъру цаннарагу диял къашайссар, даххайсса цичIав дакъашивугу мунихлунур куссар тIар Аслан-ханнал. Мунияту шикку аьралгу ябан къашайссар, оьруснал аьрал бакъанугу, ва кIантту ттущавагу ябан бюхъанссар куну, оьруснал аьрал махъунмай тIайла бувкссар тIар.
Мукунма та заманнай цIуну увккун ивкIсса имам ХIамзатлухь Хунзахъиял Оьмаханнал душнил, яни Баху-биканал, арсру литIун бан бувссагу Аслан-ханналли кунугу бусайва. Яни Баху-биканал цила душ цала арснан Нуцал-ханнан къабуллуну тIий, Аслан-ханнал имам ХIамзатлухь, Хунзахъ хантал буссаксса вил иш къабачинтIиссар, вища Дагъусттаннай шариаьт дачин дангу къабюхъантIиссар, вила бачин ччарча, ина тай ливтIуну бухлаган бува, аьркин хьурча, нагу вин кумаг банна куну, хъяврин увну, Баху-биканал ялун сукку увну, муналгу танил кIиягу арсгу ливтIуну, хъирив цурдагу диркIуссар кунугу бусайва.
Мукунма, цахра вичIи къадирхьуну, цала секретарьшивугу кьариртун, шайхначIан лавгун, тIарикьатгу ларсун, тIарикьатраха зун ивкIун тIий, Жамалуттиннул Шуаьнат тIисса душ Аминат ХIажиначIан лихъан бувссар кунугу бусайва. Дагъусттаннай тIарикьат накьшибанди, яни муридизма, хьхьичIра-хьхьичI Асланханнал заманнай, мунал канихьсса кIанттай сукку хьуну дур, хьхьичIа-хьхьичIсса шариаьтрал имамгу, яни имам ГъазимахIаммадгу, мунал заманнай увккун ур. Кураллал Ярагъ тIисса шяраватусса МахIаммад-апанни тIисса аьлимчунал му тIарикьат Ширваннаятусса ХасмахIаммад тIисса, хьхьичIва цачIава дуклай ивкIсса, адаминаяту ларсун, халкьуннавух ппив дуллай ивкIун ур. Мунал ялун чIявусса халкь батIлан бивкIун бур.
Аслан-ханнал секретарьну ивкIсса Гъумучатусса Жамалуттин, Аслан-ханнахьгу вичIи къадирхьуну, мунал секретарьшивугу кьариртун, МахIаммад-апанниначIан лавгун, мунаяту тIарикьатгу ларсун, шайхгу увкIун, му тIарикьат Лаккуй ппив дуллан ивкIун ур. Мунал ялунгу Лаккуяту, Яруссаннаяту хъиннува чIявусса халкь батIлан бивкIун бур.
Мува заманнай Яруссаннал чулух, имамра тIий, шариаьт дачин дуллай цIуну увккун ивкIсса ГъазимахIаммадгу, ЖамалуттиннучIан увкIун, мунаяту тIарикьатгу ларсун, шайх-ЖамалуттиннучIан увкIун, мунаяту тIарикьатгу ларсун, шайхгу хьуну, Яруссаннал чулух, гьам шариаьт, гьамгу тIарикьат кIирагу дачин дуллай, мугу авчуну ур. Мунал ялунгу хъиннува чIявусса халкь батIлан бивкIун бур. Халкьуннал оьруснащалсса душманшиву цIакь хъанан диркIун дур.
Ми шайхтурал лагма халкь батIлатIаву я оьруснан, я Аслан-ханнан ччан къабивкIун бур. Миннайну оьруснайн къаршину Дагъусттан сукку къахьун нигьа буслай бувкIун бур. Мунияту имам ГъазимахIаммад зузи уллалисса МахIаммад-апанниналлича, му увгьуну дуснакь ува тIий, Мадатовлул Аслан-ханнайн амру гьан бувну бур. Амма амру цачIанма бучIайхту, Аслан-ханнал кьюлтIну хьхьувай МахIаммад-АпанниначIан цала нукартал гьан бувну, яла кIюрххил му угьан арамталгу тIайла бувккун бур. Мигу, туну, махъунмай зана бивкIун бувкIун бур, МахIаммад-апанни къаиривну, Мадатовлуйнгу жаваб гьан дурну дур, угьан гьан бувссия, ливхъун лавгун къаиривунни куну.
Аслан-хан бакI бусса, дуниял дачин дан усттарсса, халкь бугьан кIулсса хан ивкIун ур. Муниятугу чIявуми халкь мунаяту рязинугу бивкIун бур, бигьалавгунгу бивкIун бур.
Аслан-хан 1253 шинал ивкIуну, мунал кIанттай хъунма арс Нуцал-хан авцIуну ур. Амма му Нуцал-хан ханшиврул адамина ивкIун акъарча, хIанттихун, хъаннихун агьсса пасадрал агьлу ивкIун ур. Кураллал халкьуннаву мунал буллай ивкIсса оьккисса зулмурдал, оьккисса биччибакъулшивурттал чIявусса хаварду бикIайва. Амма мура шинал муг ивкIуну, мунал кIанай мунала уссу МахIаммад-Мирза-хан авцIуну ур.

МахIаммад-Мирза-Хан

МахIаммад-Мирза-хан паракьатсса адимина ивкIун ур.
Мура шинал, яни генерал Аргъутинскийщал архIал, Лакрал аьралгу бувцуну, ТIилитIи тIисса шяравун Шамиллул ялун лавгун ур. Амма микку, яла нигьачIимурди тIисса фронтрай, яни мизитрал чулухсса фронтрай авцIуну, Шамиллун цащава бюхъайссаксса кумаг бувну бур. Оьруснан Шамиллул гуж хъинну ххишаласса бушиву чIалачIи буллай ивкIун ур. Оьруснан хавар къахьунну Шамиллущал цачIуну хьуну ивкIун ур. Ахирданийгу, Оьруснал ва Шамиллул дянив агьну, кIивайнналагу дянив маслихIат бувну, Шамиллул бакIраяту оьруснал бала яла гьан бувну бур.
Яруссаннайн МахIаммад-Мирза-хан Шамиллул ялун авчукун, мунал ниттил Уммукусум-биканал мунахь Шамиллуйн ягу мунал арамтурайн тIайлану ттупанг битарча, буллусса ккукку хIалал къабитанна куну бивкIссар тIар. КьюлтIну цачIун хьусса чIумал, Шамиллул мунахь: «Имамшиву дан багьайсса инарича, ина дува», — куну увкуссар тIар. Муналгу «Имамшиву дан ттуща къабюхъайссар, вища бюхълай бурча, ина дува, жущава шайсса кумаг жугу банну», — увкуссар тIар. Махъ заманнай Шамиллущалсса мунал хIала-гьурттушиву оьруснан хавар хьуну, мунайн Ттуплислив оьвкуну, тамансса хIаллай ацIан увну ивкIун ур. Зана къаикIантIиссар, оьруснал ивчIантIиссар тIисса хавардугу бивкIун бур. Амма, итаавкьуну, сагъну махъунай увкIун ур.
Зана ивкIун махъ чIал къавхьуну, яни 1255 шинал, МахIаммад-Мирза-хан ивкIуну ур. Мунаяр махъ ханшивугу мунал ниттийн Уммукусум-биканайн, Сурхай-ханнал душнийн, дурккун дур. Мунил хьхьичIа зун, яни ханшиву дачин дуллангу, оьруснал ивтун ур Аслан-ханнал уссил ТIагьирдул арс МахIмуд-баг. Мунал заманнай, яни 1258 шинал, Шамил Лаккуйн увкIун, Лакку кIанттугу лавсун, наибшиврийгу ЯхIъя-ХIажи тIисса мува ТIагьирдул арсгу ивтун, зана ивкIун ур. Му ЯхIъя-ХIажигу хьхьичIава ШамиллучIан лавгсса, танал мурид ивкIун ур. Мунал уссу МахIмуд-баггу ханшиврул адимина ивкIун акъарча, кайпчакрал адимина ивкIун ур. Мунияту, Шамиллун му ккавккукун: «Дагьаву хан вугун вугу Гъумик дизил хан», — куну увкуссар тIар. Яни чарагьатсса хан ивкIун ур Гъумучиял хан куну увкуссар тIар.
Амма Шамиллуща Лакку кIантту хъунмасса хIаллай бугьан къабювхъуну бур. ЧIал къавхьуну КураллавухчIин хьуну кIилчингу оьруснал лавсун бур Лакку кIану. Ханшиврийгу Аслан-ханнал уссил Оьмар-багнал арс АьбдурахIман-хан ивтун ур.

АьбдурахIман-хан

АьбдурахIман-хан щалва бажар бусса хан къаивкIун ур. Мугу лулттучIин ШамиллуцIун авкьуну ивкIсса хьунссар, 1263 шинал, мунал Шамиллущал хIалашиву дур тIий, яни мунал оьруснал маршрутру, оьруснал план Шамиллун баян бувну бур тIий, мунаяту маз бувну, оьруснал мунайн Ттуплислив оьвкуну, тичча зана къаивкIун ур. Мунал кIанттайгу мунал уссу Агълар-хан ивтун ур.

Агълар-хан

Агълар-хан тIисса агъатуралгу хан тIиссар. Агълар-хан мунал ниттил дирзсса цIа диркIссар. Цанна цIа Шагьимардан диркIссар. Шагьимардангу парс мазрай арамтурал, вирттаврал шагь тIиссар. Шагьимардангу мунал буттал буттайн Муртазааьлийн учайсса ца чулий цIа диркIун дур.
Агълар-хан хIанттихун, хъаннихун агьсса оьккисса пасадрал агьлу ивкIун ур, хъиннува оьккисса зулмукаргу ивкIун ур. Амма мунищала архIал хъинну дирисса, бажар бусса, виричуссагу ивкIун ур. Аьрабрай ва оьрусрай тамансса дурккуссагу ивкIун ур. Цувагу кIирагу чулухуннайсса политикалул заллугу ивкIун ур. Яни, ца чулухату, тара-тагу Шамиллул ахир ххуйсса къадучIаншиву кIулну, оьруснал хъунмасса гужрал му лакъавсун къаитаншиву кIулну, оьруснал чулух авцIуну, Шамиллуйн къаршину дяъвирду буллай ивкIун ур. ЦукунчIав Лакку кIантту Шамиллухьхьун гьан къабивтун бур. Ца чулухатугу, Шамил ласурча, оьруснал Дагъусттаннайсса циняр ханлугъру зия даншиву, цувагу ханшиврий къаитаншиву кIулну, лулттучIин ШамиллуцIун авкьуну, цащава бюхъайссаксса мунан кумаг буллай, му лахъи лаганмур буллай ивкIун ур. Хъинну кьюлтIну, хъинну усттарсса куццуй оьруснал кьюлтIмур, оьруснал планну Шамиллун баян буллай ивкIун ур. Шамиллун янналул ттупру ва махъсса аьркинмур гьан дуллай ивкIун ур. Ми ларсунгу щинчIав щак къабагьанну цаппара мюталинтал гьан байсса бивкIун бур. Ми мукун гьан байсса мюталинтурал цагу Гьухъалиятусса ЩантIурхъал Аьлибутта ивкIун ур.
Лихъан, махъунай зана икIан къабагьайсса кIанттаяту оьруснан Шамиллул гуж хъинну ххишаласса бушиву чIалачIи байсса бивкIун бур Агълар-ханнал. Шамиллун хъунмасса зарал бан бюхъайсса кIанттай, бувагу къабувну, ягу чан-кьансса бакъа къабувну битайсса бивкIун бур. Яни чIявусса муридтал литIун биривсса кIанттай, ливагу-къаливтIуну, ягу оьруснан ххаралун чан-кьансса ливтIуну, махъми итабакьайсса бивкIун бур. ХIатта, цала политикалияту хавар бакъа, биривсса Шамиллул арамтал литIлатIиминнан зараллу буллалисса цала арамтурахун дяъвирду бувну, зарал бан къабивтун, букьан байсса чIуннугума шайсса диркIун дур. Ххюлусмав муридтурал аьрал ливсса чIумалгу мукун бувну бур.
Агълар-ханнал замана щалвагу дяъвирдай, чапхуннай лавгун бур. Мукьарда ратI Шамиллухьхьун ларгун диркIун дур. Бурт, Хъанардал щархъурду, ХъачIиял чIяруми шархъурду цайми щархъайн дизан дурну диркIун дур. Ххутрал бусалдарах ургарча, миннал щар арила хъямала дурсса хъанай дур. Яни, ханнацIун хьурча, муридтурал хъямала дуллай, ШамиллуцIун хьурча, ханнал хъямала дуллай, Ххутрал щар арила хъямала дурссар куну бусайва.
Агълардул заманнай, кIяла чухъри, лухIи чухъри, хъахъи чухъри, някI чухъри куну учайсса мукьва журалийсса аьраллу бивкIун бур: Мукьвайвагу, Гъумук чятирдугу бивщуну, хIадурну бикIайсса бивкIун бур. Цумур чулухату леххаву дуккарчагу, мугьлат бакъа никъащуну леххаврий лагайсса бивкIун бур.
Гъинттул чIумал, цавай Оьллаарив, цавайгу ТтурчIайнна зунттуй, кIивайва аьрал оьрусналгу бикIайсса бивкIун бур. Ца-ца хъу-лухччинул даврийн нанисса халкь ярагъуннищал бакъа къалагайсса бивкIун бур. Хъанарда арив ххалайн бувксса чIумал, Гъара бакIуй оьруснал аказия бацIан байсса бивкIун бур.
Агълар-ханнал заманнай оьруснал чулуха лакрал чIявусса арамтуран ххачру, мидаллу дурккун диркIун дур. Агълар-ханнал ми кьюлтI дурну, щинчIав кIул хьун къадиртун, цачIара ядурну диркIссар тIар. ИвкIуну махъ ми ххачурдил, мидаллал бувцIусса кIива гьаржа лявкъуссар тIисса хавардугу бур.

Аьли Къаяев