ЖучIава бухлагавайсса, ягу нажагьсса бакъа къаливчIсса Азиатнал цIиникьру чIяву бувну, ми ябаврин хас дурсса проектрал сиптачитал хьунни «Главспецстрой» ООО-лул директор Михаил Баракин ва вара компаниялул вакил Вадим Креховецкий.

«Главспецстрой» ООО компаниялул вакилтурал Дагъус­ттаннай ТIиляратIиял заказникраву нажагьсса бакъа къаливчIсса вахIшисса цIиникьру гьарза бувну, ябуллансса кьутIи чирчунни ДР-лул Минприродылущал.
ЦIиникьру ябаврил хIакъи­равусса кьутIилия бувсунни «Главспецстрой» компаниялул вакилтурал.
Михаил Баракиннул хьхьичI­ва-хьхьичI барчаллагь увкунни цивппа хIурмат-кьиматрай кьамул бувсса дагъусттаннал халкьуннахь ва масъала дузрайн буккан баврил чIарав авцIусса Республикалул БакIчи Рамазан АьбдуллатIиповлухь.
— Жу вахIшисса цIиникьру, Дагъусттаннал аьрщарай ба­къассагу, Аьрасатнавугу ябаву, гьарза баву мурадрайсса агьам­сса давриха зий буру. ВахIшисса цIиникьру бухлаглай бушиврийн бувну, жун пикри хьунни ми ябувансса, чIяву бувансса чаранну ляхълан. ЦIанакул жу ва даву дуллай дайдишиннин­сса цимурца хIисавравун ларсъсса хIадуршиннарду дуллай, зий буру.
Вадим Креховецкийл бувсунни цIиникьру чIяву баву мурадрайсса проект дайдирхьуну диркIшиву 2008 шинал ва хIакьинусса кьини, му дузрайн дуккан даву мурадрай, сакин дуршиву цIиникьирттал ахIвал-хIал лавхьхьусса, му программалуха зузисса зузалтрал команда. ЦIиникьирттал багьу-бизу лахьлахьисса ахттаршиннардайн бувну исват хьунни миннун Дагъусттаннал тIабиаьт даркьусса душиву. Мунийн бувну жун пик­ри хьунни Дагъусттаннайсса ТIиляратIиял райондалийсса заказникраву цIиникьру ябуллансса.
«Главспецстрой» ООО-лул Дагъусттаннал ТIабиаьтрал министерствалущал ва проектрал хIакъираву хIала-гьурттуну зузаврия бувсунни Набиюлла Къарачаевлул. Ванал бусаврийн бувну, ТIиляратIиял райондалий лявкъуну бур цIиникьру.
— СМИ-рдайхчIин жул кол­ле­гахъан кIул хьуну бур ТIи­ляратIиял райондалий цIиникь лявкъушиву. Муния махъ «Главспецстрой» ООО-лул вакилтал жуйн бувккун, ми ябуллансса кьутIирду чирчунни. Ва компаниялул вакилтурал Дагъусттаннан пишкаш буллай бур кIива цIиникь. Вай ябувансса, вайннулсса буллансса инсантуран­сса харжлугъгу цалла бакIрайн ларсунни компаниялул вакилтурал, — увкунни Набиюлла Къарачаевлул.
Вадим Креховецкийл бувсунни цIиникьирттал ссурссулухун ларххун дикIантIишиву цумур кIанттай, ци канай, ци дуллай буссарив ккаккан буллалисса ГЛОНАСС системалул энтту.
— ЦIиникьирттайн лархсса энттайн бувну, миннул хъирив бавцIусса инсантуран мониторданий чIалантIиссар жанаварт­раясса цимурца. Шанма-мукьва зурувату, жанаварт хъуни шайхту, лаххантIиссар миннуйн цайми энтту. ХIасил, электрон журалий миннул хъирив бавцIусса, ахттаршиннарду дуллалисса хасъсса пишакартал зунтIиссар. Ва, так Дагъусттаннал аьрщарай цIиникьру ябаву дакъассагу, хъанахъиссар хъуннасса ах­ттаршинна дуллалисса элмий­сса давунугу, — увкунни Креховецкийл.
Н. Къарачаевлул мукунма бувсунни ТIиляратIиял заказ­ник­рал аьрщи 65 гектарданул хъунна дан ччай бушиву.
Пресс-конференциялул ахирданий проектрал каялувчитурал жавабру дуллунни журналистурал буллусса суаллахьхьун.