Июль зурул 19-нний ЦIуссалакрал райондалул администрациялул къатраву хьунни мусил ва арцул медальлащал школа къуртал бувсса ва итххявхсса оьрчIан бахшишру дуллалисса мажлис
ХьхьичIунсса хIасиллащал школа къуртал бувми барча буллалисса мероприятие хIадур дурну дия райондалул каялувчитурал, КIулшиву дулаврил управлениялул, «Возрождение Родины» тIисса ихIсандалул фондрал цачIуну.
Медалистътал, итххявхсса оьрчIру, дуккавриву ва школалул оьрмулуву хьхьичIунсса ккаккияртту хьун дурсса, Федерал ва региондалул лагрулийсса конкурсирттай хьхьичIунсса кIанттурду бувгьусса оьрчIру барча буллалисса мажлисрай гьуртту хьун бувкIун бия Райондалул Мажлисрал депутатътурал председатель Аслудин Аслодинов, райондалул бакIчинал хъиривчу Арсен Гъазиев, КIулшивуртту дулаврил управлениялул хъунмур Светлана Къудаева, «Возрождение Родины» ихIсандалул фондрал директор Зайнулла Мирзоев.
ОьрчIру барча буллалисса ихтилат бувна Светлана Къудаевал. Ванил кIицI лавгуна, ларгсса шинал республикалул лагрулийсса мероприятиярттай 47 хьхьичIунсса кIану бувгьуну бивкIхьурчан, гьашину сияхI 72-ннийн дирну душиву.
Гьашину мусил медальлай школа къуртал бувну бур 10 выпускникнал, 19-ннал — арцул медальлай, федерал лагрулийсса конкурсирттай 1-ми кIанттурду бувгьуну бур 4 выпускникнал.
– Ххирасса оьрчIрув! Зу лайкьну лавхъунни оьрмулул цалчинсса шачIану. Ванин барашиннану хьунни хIакьину зун дуллусса мусил медальлу ва хьхьичIунсса хIасиллащалсса аттестатру. Вай медальлаву буссар учительтуралгу, нитти-бутталгу, зугу шиннардил мутталий бувсса захIмат. Умуд бур ванияр тихунмайгу зуяту райондалул цIа-кьини бюхттул дансса, пахрулунсса пишакартал хьунссар тIисса. ТIайлабацIу хьуннав зун гьарца бивзсса шаттираву, – увкуна Светлана Къудаевал.
Медальлу ва аттестатру булун хьхьичI цинявннал вичIи дирхьуна выпускниктал барча буллалисса АьФ-лул просвещениялул ва кIулшивуртту дулаврил министр Сергей Кравцовлул видеообращениялух. Ва кьини мусил медальлу ва аттестатру буллуна 29 выпускникнан.
Хъирив барча бувна федерал ва региондалул лагрулийсса олимпиадарттай хьхьичIунсса кIанттурду бувгьусса выпускниктал. Вайннангу буллуна дипломру ва арцуйнусса бахшишру.
МаматIи ХIамзатовлул чулухасса Барчаллагьрал чагъарду буллуна оьрчIал нитти-буттангу. Ванал лавайсса кьимат бивщуна хьхьичIунну дуклакисса оьрчIащал зий бивкIсса учительтурангу.
Выпускниктал барча бан бувкIун бия «Буратино» тIисса оьрчIал багърал тарбиячиталгу. Учительтуран ва нитти-буттан балайрду увкуна ЦIуссачIурттащиял 9-мур классрал дуклаки оьрчI Чихунов АьвдулхIалимлул. Ахирданий рирщуна дакIний личIансса суратру.
ДакIнин бутанну, ЦIуссалакрал райондалий каялувшиву дуллай ивкIсса МахIаммад-ХIажи Айдиевлул сипталийн бувну байбивхьушиву хьхьичIунсса хIасиллащал школа къуртал бувсса выпускниктал лахъа-хъун буллай. Ц1уссалакрал райондалий дуккавриву ва школалул оьрмулуву хьхьичIун ливчусса оьрчIах мудангу ларайсса къулагъас дуссар.
Имара Саидова