Июньдалул 11-нний Ккуллал райондалийсса Ваччиял шяраву хьунни Аьрасатнал Кьинилун хас дурсса, акциялул лагрулий дуллалисса «Творческий десант» тIисса концерт. Ва хIадур дурну дия Дагъусттаннал аьдатру-эбадатру хъамакъадитаву, республикалул агьали творчествалул коллективирдащал кIул шаву мурадрай. Концертрал сиптачитал хьунни ДР-лул Культуралул министерство ва Халкьуннал творчествалул къатта.

Концертрай гьуртту хьуна халкьуннал коллективру ва таксса артистътал.Гьурттушинна дуруна Лакрал райондалул творческий коллективралгу. КIирагу райондалул коллективирттал ккаккан дурна музыкалул яргсса программа, чIалай бия вайннал даврил усттаршиву ва магьиршиву лавайсса даражалий душиву.
Мероприятие дайдишин хьхьичI махъ лавхъуна район­далул администрациялул бакI­чинал хъиривчу Анатолий Давдиевлул:
– Халкьуннал цашиву – вари Аьрасатнал Кьинилул агьаммур мяъна. Жува циняв азгъунсса билаятрал ялапарлувталлу, ва кьини цума-цаннангу асар шай­ссар цува билаятрал ца бутIану хъанахъишиву. ЧIа тIий ура цинявннан дакьаву ва дусшиву, ччясса чIумуй Ххувшавугу ларсун, жула аьралитал ичIунмай зана шаву, – увкуна ванал.
Концертрал программа дия авадансса. Артистътурал увкуна балайрду, дурна къавтIавуртту. Балайрду бия жула билаятрахасса пахрулул вибувцIусса, халкьуннал цашиву ва дусшиву кIицI лаглагисса.
Мероприятиялийн оьвкуну бия аьралитурал кулпатирттайн ва волонтертурайн. Волонтертал шикку гьурттучиталнугу, тамашачиталнугу бия.
Июньдалул 12-нний Аьрасатнал Кьинилун хас дурсса концертру хьуна райондалул гьарцагу шяраву.

ХIадур бувссар Аминат АхIмадовал