ЦIуссалакрал райондалиясса Сиражуттин АхIмадхановлул хьхьичIунсса кIану бувгьунни «Живая классика» тIисса Дунияллул халкьуннал даражалийсса конкурсрай. Июнь зурул 8-нний Москавлив ЯтIул майданнив лахъа-хъунсса даражалий ва конкурсрал хIасиллу дунни. СахIналий пасихIну шеърирду бувккунни Аьрасатнавасса ва чил билаятирттаясса 10 оьрчIал.
Аьрасатнавасса буккултрава 1-мур кIану бувгьуна ЦIуссалакрал райондалиясса дуклаки оьрчI Сиражуттин АхIмадхановлул. Ванал бувккуна Чингиз Айтматовлул «Свидание с сыном» тIисса шеъри.
Шеърирду буккаврил суперфиналданул жюрилуву бия Виктор Добронравов, Елизавета Арзамасова, Марина Москвина, Тарас Белоусов, Марина Лебедева ва Артем Васильев. Вайннал бивщуна оьрчIан кьиматгу.
Сиражуттин АхIмадханов хьхьичIунну дуклай ур ЦIуминалийсса ЦIуссаккуллал школалий 8-мур классраву. ЧIавану унува къавтIаврил «Ватан» ансамбльданувун увкIсса, зирангсса, гьунар бусса Сиражуттин, най унува ивтун ур солистну.
Шиккува бусан, ванал ларгсса шинал Республикалул даражалий хьусса «Живая классика» тIисса конкурсравугу хьхьичIунсса кIану бувгьуссия.
Сиражуттин ххувшаврищал барча уллай, чIа тIий буру гихунмайгу тIайлабацIуртту. Барчаллагь тIий буру ва хIадур увсса учительтурахь ва ванал нитти-буттахь.
Имара Саидова
