Июньдалул 10-нний Дагъусттаннал бакIчи Сергей Меликовлул дунни Буйнакскалийсса тагьарданул хIакъиравусса чярхнийсса совещание. Июньдалул 7-нния 10-ннийнин шагьрулул хъунмур азарханалий уттубишин бувну бур ца микрорайондалия бувцуну бувкIсса ххюттуканил инфекциялул лишанну дусса ялапарлувтал. Сергей Меликовлул оьвкуну, республикалийн бувкIун бур Роспотребнадзорданул центральный аппаратрал зузалт.

Роспотребнадзорданул Элмулул ва аналитикалул управлениялул хъунама Александр Летюшевлул тIимунийну, Буйнакскалий инсантал загьрулул шаврил савав дур щинал турбардава нанисса къаххуйсса щин ишла даву.
– Ва бакIрайра дирхьусса эпидемиологиялул диагнозри. Жул пикрилий, гъараллу лачIлачIисса чIумал бюхъай канализациялул щин хIала хьуну дикIан хIачIайсса щинавух шагьрулул ца райондалий. Жу лавсъсса щинал пробарду цIана лабораториялий бур, хIасиллах ялугьлай буру, – куна Федерал Роспотребнадзорданул вакилнал.
Ваналва бусаврийну, жаваблувсса идарарттайн тапшур бувну бур щинал дезинфекциягу, гиперхлорированиягу дуван, ми дурну махъ инфекция духлагантIиссар.
Региондалул цIуллушиву дуруччаврил министр Татьяна Беляевал бусаврийну, Буйнакскаллал азарханалийн тIайла бувккун бивкIун бур Республикалул инфекциярттал азардал центрданул эпидемиологтурал ва инфекционистътурал бригада. Июньдалул 10-нний 18 ссятраву азарханалий уттуишин увну ур 84 къашайшала, миннава 55 – оьрчI-бакI. Къашайшалтран аьркинсса кумаг буллай бур.
Буйнакскалий цIанасса ппурттувугу медициналул бригадартту занай бур хIаятирттавух къашавайми ххал буллай.
Цалсса шагьрулул ялапарлувтуран маслихIатну ккаклай бур хIачIан так щаралархъсса ягу шушраву дахлахисса щин.
Шагьрулул каялувчинайн тапшур бувну бур карантиндалий битан циняв оьрчIал идарартту, мукунна гужлан дуван агьалинащалсса даву.

ХIадур бувссар ХI. Аьдиловлул