Абусупияннул арс Зиябу­ттин ХIажимирзаев увну ур 1964-ку шинал декабрьданул 7-нний ГьунчIукьатIрал шяраву.
Къуртал бувну бур Москавуллал автомобильно-дорожный институт. ЦIанасса чIумал Дагъусттаннал Транспортрал ва ххуллул хозяйствалул министерствалул паччахIлугърал закупкарттал отделданул хъунаману ур. Лайкь хьуну ур паччахIлугърал ва ведомствалул лич1и-лич1исса грамотарттан.

Альпинист-любитель хIи­саврай лавхъун ур Эльбрус (Аьра­сат), Килиманджаро (Танзания), Монблан (Франция), Аконкагуа (Аргентина), Охос-Дель-Саладо (Чили), Орисаба (Мексика), Пик Ленина (Кыргызстан) ва цаймигу зунттал мицIайн.

МахIачкъалалив Р. ХIам­затовлул цIанийсса Национал библиотекалуву лавайсса даражалий хьунни ГьунчIукьатIрал шяравасса Абусупияннул арс Зиябуттин ХIажимирзаевлул «Вертикаль моей жизни» тIисса луттирал презентация.

Дагъусттаннал Транспортрал ва ххуллул хозяйствалул министерствалул отделданул хъунама, Дагъусттаннал лайкь хьусса строитель, захIматрал ветеран, цIа дурксса альпинист ва хIакьсса патриот Зиябуттин ХIажимирзаевлул цIа ххуйну кIулссар Дагъусттаннай. Ванал хIурмат хъунмасса бур альпинистътурал дянивгу, дустурал ва даврил уртакьтурал дянивгу. Бусравну ур, ГьунчIукьатIрал жяматран акъассагу, цинявппа лакрангу. Му исват хъанай бия презентациялул кьини щапI куну бувцIусса залданийнугу.
Цинявппа гьунардацIун ванаву чичулмур бюхъугу бушиву кIулссия чIявуссаннан бюхттул зунттал мицIайнсса цала аьрххирдаясса ванал чичрурду «Илчилий» дурккуминнан. Лу ххаллилсса бахшишну хьунни Зиябуттин ххираминнан, мукунма ванал оьрмулул ва захIматрал ххуллия гьарта-гьарзану кIул хьун ччиминнан.
Презентациялий ихтилатру бувсса гьарицама кIицI лаглай ия лу хъунмасса гъирарай ва гьавасрай бувккушиву.

Ихтилатчитал мукунма кIицI лаглай бия авторнал инсаншиву, захIмат ххирашиву, яхI-къирият, чумартшиву, чувшиву. «Вертикаль моей жизни» так ца бюхттул зунттал мицIайнсса аьрххирдаясса лу бакъар, ва бур, оьрчIния байбивхьуну, ванал оьрмулия, дуккаврил ва захIматрал ххуллия бусласисса жуж.
Дачин дурну ия мероприятие Дагъусттаннал Чичултрал союзрал лакрал секциялул хъунама Супиян Оьмаров.
– Ттула оьрмулуву хьусса иширттаха лавхьхьусса кIанттурду чIявусса бия. БяличIан бан къаччай, цал щяивкIун буккав. Лу бувккуну махъ пикрилий ура, Зиябуттин Журналистътурал союзравун кьамул ан багьлай бурвав ягу Чичултралмунивун тIий. Ванащал на Африканавунгу ивра, Американавунгу, Монбланнайнгу лавхъра, Эльбрусрайнгу, – увкунни, мероприятие тIитIлай, Супияннул.

– Лу чичаву – му хъуннасса жаваблувшинна дусса давур. Луттираву бивщумунил бюхъайссар щаллусса ник бяйкьу ххуллийх дуцингу, бюхъайссар хьхьичIуннайшивурттайн гьуз учин дангу. Зиябуттиннул лу бур жагьилсса никиран яхIирал, чувшиврул эбратну хьунсса. Мунияту на ттула бакIрайн ласлай ура ва лу вакссара тиражрай цал ттигу итабакьин, – увкунни тамансса шиннардий Дагъусттаннал Автодорданул хъунаману зий ивкIсса Загьид Хучбаровлул.
– Дунияллий гьарица инсаннал цала миссия буссар. Зиябуттин лявхъуну ур дунияллийн цIанасса захIматсса чIумал оьрмулува дакI дурксса инсантуран, хаснува жагьилминнан эбратну хьун. Ва гьарица преподавательнал столданий бикIан аьркинсса лу бур, – увкунни философиялул элмурдал доктор Асият Буттаевал. Хъирив Зиябуттиннун бахшишгу дунни, цила зумувну ххаллилсса лакку балай увкуну.

Жанна Абуева, ДГТУ-лул чил билаятирттал мазурдил кафедралул хъунмур, профессор:
– Нава бахтти бусса инсаннан ккалли бара, цанчирча кьадарданул на оьрмулул ххуллий чIявусса ххаллилсса инсантуращал хьунабакьин бувссара. Миннавасса цар Зиябуттин. ЧIявусса луттирдал, чичрурдал редакторшиву дурссар, амма нажагьсса къабувккухьунссар ва кунма гъирарай. Авторнащал архIал битав на ванал щалагу оьрмулул ххуллу. Вирттал жула дяниври бусса учай. Жула дянивсса къучагътуравасса цар Зиябуттингу. Укунсса инсантурайри дуниял дарцIуну дусса.

Шалласу Шалласуев, жяматийсса ишккакку:
– ЛяличIисса бур Гьун­чIукьатIрал халкь. Оьрмулул личIи-личIисса арардаву цикссагу дур вайннал мютIи дурсса лахъазантту. Машгьурсса актер, балайчи Владимир Высоцкийл увкуну бур: «Зунттаяр караматсса так зунттурдур бикIан бюхъайсса», – куну. На учивияв: «Зунттаяр караматссар ми чIюлу буллалисса сивсусса зунттал инсантал». Зиябуттиннул лархъсса яла бюхттулмур лахъазанттун на ккалли давияв буттал кIанттухсса ччаврил, зунттал чувнал яхI-къириятрал лахъазан. Дагъусттаннай ца вари усса яла сивсуми, яла кьянкьами кьамул байсса «7 вершин» тIисса группалувун ухлахисса альпинист.

Гульшан Хасаева, М. Илиясовал цIанийсса «Дараччи» ихIсандалул фондрал президент:
– Хъунасса Заннал лахъазантту лакрацIун цIакь дурну духьунссия, бюхттулний цIарду чирчусса къучагътал жучIава чIявур. Совет Союзрал кIийла Виричу АхIмад-Хан Султан, Наби Аминтаев, Бавер ЖахIпарова, Муса Маннаров. ЗанначIан гъан хьуминнал сияхIраву утти Зиябуттингу кIицI лаган бучIиссар. Ванал ца ттигу шачIанттул лахъ бувссар жула миллат. Циняв ванал дурсса чумартсса давурттая гъалгъа къатIунна, ГьунчIукьатIрал шяравун бувххукун, гьарнан ххал хьунтIиссар шяраваллил дязаннив Буттал кIанттул цIанийсса Хъунмасса дяъвилий жанну дуллусса къучагътурал, элмулул, захIматрал ххуллий хьхьичIуннайшивуртту дурсса шяравучутурал цIарду абад дурсса стела.

Миясат Муслимова, шаэр, литературалул критик, Ккавкказуллал Чичултрал клубрал президент:
– Зиябуттиннул дакIнийхтуну, бюхханну цала оьрмулия чивчумур ккалай, махIаттал буллай бура къалахъисса оьрмулий ца инсаннал бакIрачIан бувкIмунил. Фантастикалул литературалувугума къалякъинссар укунсса триллер. Цуппагу мяйжанну хьусса иширттаясса. Заннал хъаттиралу ухьунссия, оьрмулулгу, бивкIулулгу ххуттайсса тагьарданува цимилагу увккун ур. Ми захIматсса кьинирдугу яхIирай, чувшиврий лархъун дур Зиябуттиннул.
Зиябуттиннул пишакаршиврия, бюхъу-бажар бушиврия бусласисса, ванацIун бавхIусса лахIзарду дакIнин бичлачисса ихтилатру бунни Транспортрал ва ххуллул хозяйствалул министрну ивкIсса Ширухан ХIажимурадовлул, Антимонопол къуллугърал управлениялул хъунама Каир Бабаевлул, цалчин Эверест зунттул мицIлийн лавхъсса дагъусттанлув Рашид ХIажиясуловлул, Аьрасатнал лайкь хьусса летчик Жабир Абакаровлул, профессор, альпинист-любитель Арсен Магьдиевлул, предприниматель Рамазан Къушиевлул, ГьунчIукьатIрал жяматийсса ккурандалул бакIчи ХIажибутта ХIусайновлул, ГьунчIукьатIрал школалул директор Малик Къушиевлул, шяраваллил администрациялул бакIчи МухIад Штанчаевлул, Зиябуттиннущал Орисаба вулкандалийн лавхъсса Москавлиясса альпинистка Ольга Самотоинал, ХIажимирзаевхъал кулпатрал дус Ростоврая бувк1сса Татьяна Минченкол, Аьрасатнал Виричу НурмахIаммадлул ппу Энгельс ХIажимахIаммадовлул, шаэр, шяравудуш КьурбанпатIимат Штанчаевал, ххассалбуву Зиябуттин НикIамахIаммадовлул, одноклассниктурал.
Ихтилатирттал лях-карах ххаллилсса балайрду увкунни Лариса ХIажиевал, Луиза Шахдиловал, Загьидат Муслимовал, Жанна Кьурбановал, Шагьалай МахIаммадовал, Машидат Оьмарасх1абовал, «Эридан» ансамбльданул.

Ахирданий Зиябуттиннул дакIнийхтунусса барчаллагь увкунни цала кьини хъун дан бувкIсса, цала чIарав бавцIусса цинявннахь.