Дагъусттаннал Росгвардиялул управлениялул «Ястреб-Каспий» СОБР-рал пишакартурал кумаг бунни ФСБ-лул ва МВД-лул зузалтран закондалул ххуттава бувккун ярагъ буллалисса иширттан ххуллу кьукьин.

Оператив мероприятиярттал лагрулий ихтиярду дуруччай органнал зузалтран лявкъуну бур УнцIукIуллал райондалийсса Балахани шяравасса хьхьичIва танмихIрайн кIункIу увну ивкIсса оьрмулул 60 шинавусса адаминачIа ярагъ буллалисса цех. Зузалтрал зерххуну дур вайннаща 200-нния ливчусса личIи-личIисса патронну, гранатартту, пякь учайсса затру, Калашниковлул автоматрансса магазинну ва минарду.

Мунияр махъ ххал бигьавуртту дурну ихтиярду дуруччай органнал зузалтран кIул хьунни вай иширттавух хIаласса шиччавасса шама инсан цаймигу. ЦIухла бивхьуну минначIа лявкъунни 600-нния ливчусса ярагъ, цала бувсса пистолетру, карабинну ва ярагъ бансса детальлу.

Вайннаща зерххумур тIайлай дурккунни экспертизалийн. Ярагъ буллай бивкIмигу полициялул отделданийн бувцунни.