Дагъусттаннал Жагьилтурал министерствалул сакин дунни дуклаки оьрчIан ва студентътуран Гъунивсса ва Дарбантливсса экскурсияртту. 

ОьрчIру бивунни луттирдайхчIин ва тарихрал дарсирдайхчIин кIулну бивкIсса цIанихсса Гъуниннал къалалийн, «КIяла кьурукьру» мемориалданучIан, Нарын-Къалалийн ва цаймигу тарихравун багьсса кIанттурдайн.

– Ва аьрххилий буссия нину-ппу бакъасса, миннал аякьа дакъа ливчIсса оьрчIругу. Ччан бивкIунни жула жагьилтуран Дагъусттангу, мунил тарих ва культурагу дакIний личIаву мурадрайсса экскурсия бан. Цала яруннин ккавккун махъ вайннан ххуйну дакIний личIантIиссар ва кьадру-кьиматрай бикIантIиссар Дагъусттаннал тарихийсса кIанттурду, – увкунни жагьилтурал министр Камил ­Саидовлул.

Министрнал кIицI лавгунни увкунсса экскурсияртту ттиния тихунмайгу буллантIишиву.
Ва аьрххи бувсрав хьусса цинявппагу оьрчIру барчаллагьрай бия экскурсия сакин бувминнайн.