Мартрал 11-мур кьини – лакрал миллатрал тарихравусса лухIи кьини, цукунчIав хъамадитан къабучIисса кьини.
Ва кьини 81 шинал хьхьичI лакрал 10-хъул щархъурдал агьали, цучIав личIан къаивтун, гуж-къиялий бизан бувссар Аухуллал райондалийн, махъунмай зана шаврий къадагъагу дирхьуну.
1944-ку шинал мартрал 11-нний бувкссар СССР-данул СНК-лул 5473-чинсса хIукму, Дагъусттаннал АССР-данул Совнарком буржлув буллалисса апрельданул 15-ннин Дагъусттаннал зунттал районная колхозниктурал 1300 тIюва дизан дувансса.
Вардиш бакъасса гьавалул шартIирдай, цIуну хIасул дурсса ЦIуссалакрал райондалий, ссалчIав дузалшинна дакъасса кIанттурдай, ппив хьуну дарчуссар малярия, цIал ва цаймигу цIуцIавуртту. 1945-ку шинал тIурча, ккашива багьну бивкIссар. 1944-ку шинал вай цIуцIавурттал оьрмурдацIа увну ур 693 инсан, дунияллийн тIурча бувккун бур бувавагу 54 оьрчI.
1947-ку шинайннин зунттава бизан бувминная оьрмурдацIа хьуну бур 2000-ха ливчусса инсантал, дизан дурсса щархъава дяъвилул майданнай жанну дуллусса 600 талатала къахIисавну. Ссайну лахъан шайссар укунсса зарал.
Вана гуж-къиялий Лакрал ва Ккуллал районная дизан дурсса щархъурдал сияхI:
Аьхъар
Бурттун
Ххалакки
Ккурхъи
ТтурчIи
Бярнихи
Чакъал
Къичурлухи
Тукъатул
Оьллауртти
ЧIаящи
Хъусрал-ЧIар
ТIюхчар
Ккацран
Шушими
Маркьи
НицIавкIул
ДучIими
ГьаркIасси
Сундарал
Чаравал
Гьамиящи
Варайми
Хьуссар ялагу шяраваллу чанну-ххину хозяйстварду дизан дурссагу.
Ва миллатрал ялун ливксса кьадардания Дагъусттаннал халкьуннал шаэр Сибирбаг Кьасумовлул чивчуну бур пьеса «ЛухIи кьини». Цалчин ва пьесалийнусса спектакль бивхьуссар 2001-ку шинал Аьрасатнал магьирлугърал лайкь хьусса ишккакку Валерий Эфендиевлул.
Спектакль цуппагу, Валерий Эфендиев жуятува батIул хьуну махъ, «За лучшую режиссуру» дипломран лайкь хьуссар 2002-ку шинал Владиккавкказрай «Сцена без границ» тIисса Дунияллул халкьуннал дянивсса миллатирттал театрдал фестивальданий.
Лакрал щархъурду дизан дурну 80 шинан хасну Аьрасатнал лайкь хьусса артист Аслан МахIаммадовлул цIу буккан бувну бур «ЛухIи кьини» спектакль.
Премьера хьунтIиссар мартрал 10-нний.
Байбихьлахьиссар 18:30 ссятраву.
Билетру тIалав бан бюхъайссар театрданул кассалий ва номерданий оьвкуну:
8 928-875-60-10.
