Донбассрай цIана ирглийсса командировкалийсса НТВ-лул журналист Оьмар МахIаммадовлул, цува тихун ачин хьхьичI редакциялий хьусса ихтилатраву кIицI лавгуна, жула аьралийтуран СВО-лий уттизаманнул ххуйсса ярагъгу, дуканмур ва лахханмургу ххинугу диялну душиву. Ялунгу ххи бувна, аьралийтурал дакIру мудангу мюхтажну дикIайшиву, Ватандалия ссайгъатирттан дуркIсса, оьрчIал карунних дурсса затирттах ва чагъардах.

Оьмардул тавакъю бувна, сант духьурча, дуклаки оьрчIал чивчусса чагъарду, цачIун бувну, цува аьрххилий ачиннин хIадур бара куну. Жугу, школардайн, учительтурайн оьвкуну, му тавакъю щаллу бансса хIарачат бувссия.
ЧIун хъуннасса дакъаши­вугу хIисавравун ларсун, «Солдат­начIансса чагъар» тIисса ва акциялувух чялишсса гьурттушинна дуруна хъуншагьрулул цаппара школардал дуклаки оьрчIал ва Лакрал райондалул Сангардал школалул (Бабаюртуллал райондалийсса КIамахъаллал шяраваллил школа).
Хъунмасса барчаллагь учин ччай бур «Илчи» кказитрал редакциялул чулуха школалул директор ва даву цила бакIрайн ларсъсса АхIмадова Магинорахь ва ванил коллективрахь, Ватан ххирану ва Ватандалул мурадру хьхьичIунну дуклаки оьрчIру тарбия буллалаврихлу. ОьрчIал чагъардавух бия, цалла дарс дирхьусса учениктурайн кунмасса, насихIатирттал махъру чивчусса, учительтураясса чагъардугу.
ДакIнийхтунусса барчаллагь тIий ур Оьмар цала Телеграм-каналданий жул редакциялухьгу, Сангардал школалул учительтурахь ва дуклаки оьрчIахьгу, вай гьантрай Покровский чулданий талатисса жула аьралийтурахьхьун ссайгъатран буккин­сса оьрчIаясса ссаламращалсса чагъарду буллуну махъ. Миннувасса ца, Ххадижат тIисса 5-мур классрал дуклаки душниясса, чагъар ккалай, «Юг» позывной цIа дусса аьралийчу, хъювсулгу увккун, Оьмардухь тIий ур: «Жу вай чагъарду дакIру гъили лаганшиврул жунма жувалу ливчIсса чIумал буккару», – тIий.
Оьмар, вин барчаллагь, мукун жаваблувсса пиша­луцIун, дяъвилия архсса чIирисса шяравусса оьрчIаву, ялун нанисса никираву СВО-лий хъанахъимунийн­сса ва жулва ххувшаврийнсса вихшала цIакь дуллай ушиврухлу.

Залму АьбдурахIманова