Ибрагьимлул арс Штанчаев Арсен
Октябрьданий дунияллия лавгунни ГьунчIукьатIрал шяравасса магьирсса заргал Ибрагьимлул арс Штанчаев Арсен.
Увну ур ва МахIачкъалалив Штанчаев Ибрагьимлул ва Сонял кулпатраву. Дуклай ивкIун ур МахIачкъалаллал 38-мур школалий, къуртал бувну бур Механикалул техникум. Зий ивкIун ур «Алпан-Голд» ОАО-рай заргалну. 2000-2012-ку шиннардий зий ивкIун ур Москавлив «Эстет» тIисса арцу-мусил чIюлушиннарду дай заводрай, тикку зий унува кьамул увну ур Аьрасатнал Художниктурал творчествалул союзравун. Ванал дурсса арцу-мусил чIюлушиннарду Москавливсса выставкарттай ккаккиялун дирхьуну диркIссар цимилагу. ЦIуллу-сагъшиврул тагьар хIура дурккуну Дагъусттаннайнайн зана хьуссия.
Ванал буцириннащал, циняв гъан-маччанащал кьурчIишиву кIидачIлай буру, Арсеннул аьпа баннав, алжаннул ххари аннав!
ГьунчIукьатIрал жямат
ГъазимахIаммадлул арс Гьарунов Шихамир
Оьрмулул 60 шинаву СВО-лул аьралий майданнив жан дуллунни Гьуйннал шяраватусса ГъазимахIаммадлул арс Гьарунов Шихамирдул.
Шихамир увну ур 1964-кусса шинал Лакрал райондалийсса Гьуйннал шяраву. Карашрал къутандалийсса дянивмур даражалул школагу къуртал бувну, 1982-84-ку шиннардий къуллугъ буллай ивкIун ур армиялий. Муния махъ увххун ур Дагъусттаннал политехинститутравун. Му бувккуну мукьах дарс дихьлай ивкIун ур МахIачкъалаллал учебный центрданий.
Апрель зурул байбихьулий, 2023-кусса шинал, Обороналул министерствалущал контрактгу чирчуну, Шихамир лавгссия хасъсса аьралий операциялий гьуртту хьун. Ванал кьадарданул чичру мукунсса духьунссия, октябрь зурул 19-нний 2024-кусса шинал, Донецкаллал чIаравсса кIанттай, талатаврил задание биттур дуллай унува, Шихамир жандалуцIа хьуну ур.
Тиха лавсун бувкIун, хъунмасса хIурматрай ва бусраврай Шихамир паракьат увунни Лаккуй цала буттал шяраву.
Хъуннасса дард-хажалатгу кIидачIлай, дакIнийхтунусса жижара буллай буру ванал кулпатрахь, уссур-ссуннахь ва махъсса цинявппагу гъан-маччаминнахь. Ватандалул цIаний дуллусса ванал жан алжаннул ххари даннав, имандалий лавгун лякъиннав, махънал оьрмурдай барачат бишиннав.
Гьуйннал
ва Карашрал жямат
ХIажиев ГъазимахIаммадлул арс шихамирдул
аьпалун
Ина оьрмулуву ияв аьчухсса,
Щаращул щин кунна,
ия дакI марцIсса.
ТачIав пашман хьуну,
ягу дакI гъаргъун,
Ккаккан къадувайва
вил симандалул.
Буттал аьрщи ядан,
къатта-къуш ябан,
Лавгуна цIаравун,
нигьакъаувсун.
Учин цIагу ххуйсса,
ххира Шихамир,
Къаивтунна ина оьрмулул уччин.
ОьрчIал ххира дайсса
вил зиранг хъачIру,
Зизингу дурунни
душманнал ттуплил.
Муданма хъяйнмасса
вил жавгьардугу
Даиман лавкьунни ина,
Шихамир.
Хар-хавар бакъанна
гьантIиссар шинну,
ДучIантIиссар чIунгу,
жунна къакIулну,
Ци дахханашиву хьурчагу жучIа,
Мудангу жул дакIний
лич1ант1иссара.
Салман Исмяилов
ш. Гьуйми
МахIаммад СантIуевлул аьпа абад бунни
Ноябрьданул 15-нний МахIачкъалалив, 1-мур ЦIувкIратусса ХIусайннул ва Мадинал СВО-лий жан кьурван дурсса, Чувшиврул ордендалун лайкь хьусса арс, МахIаммад СантIуев яхъанай ивкIсса, имам Шамиллул цIанийсса кучалийсса къатрал (54 г») чIирай ванал суратгу дусса, цIагу чирчусса мармарчарил ула цIакь дунни. Ва МахIаммадлул гьунарданунсса абадлийсса аьпалунсса лишанни.
Ула тIитIлатIисса мероприятиялийн бавтIун бия шагьрулул администрациялул вакилтал, жяматийсса ккураннал активистътал, шяраваллил жямат, мачча-гъанми, дуклаки оьрчIру. МахIачкъалаллал Советский райондалул администрациялул хъунама Арсен Айдиевлул кIицI лавгуна талатавриву чувшиву ккаккан даврихлу МахIаммадлун орден дуллушиву, барчаллагь увкуна укун виричусса арс тарбия увсса нитти-буттахь. – МахIаммадлул жан дуллуссар Аьрасатнал аьраличунал хъалийн хаин къавхьуну, хIакьсса виричунал ххуллий. Ва Ватандалийн, билаятрайн дакI тIайласса уттизаманнул аьраличунал эбратри, – увкуна ванал.
Мармарчарил улттуя пардав дукьансса ихтияргу дуллуна Арсен Айдиевлухьхьун ва МахIаммадлул ниттил ппу Саэд Кьурбановлухьхьун. Мармарчарил ула дусса чIирацIсса кIану тIутIавун бахьлаган бувайхту, душнил арсная бувсуна Саэд Кьурбановлул.
– МахIаммад хъинну дакI ххуйсса, инсаннан кумаг буван анавар уккайсса, хъуниминнал хIурмат бусса, мюрщиминнаха аякьа дайсса жагьил ия. Чувшиву ххисса ия, хасъсса аьралий операциялий гьуртту хьунгу цува хьхьичIунай хьуна. Хасият кьянкьасса ия, цаламур бацIан байсса. Цанма ххуй бивзсса оьрус душгу бувцуну, ташу бувна, хIурмат багьансса чувнал хасиятру ванаву чIярусса дия, – увкуна ванал. Цалчинмур ЦIувкIуллал Жяматийсса советрал хъунама, профессор МахIаммадбаг ХIусайхановлулгу кIицI лавгуна МахIаммад СВО-лий жан кьурван дурсса ЦIувкIуллал шяравасса мукьилчинма жагьил хъанахъишиву. Ва яхъанай ивкIсса къатрал чIирай ванал цIа чирчусса ула цIакь дуваврилгу чIаххуврангу, чIарах нанинангу дакIнин бутлантIишиву вай къатраву яхъанай ивкIшиву чувшиврул бутIа ххишалану буллусса жагьил.
МахIаммад СантIуев увну ур январьданул 24-нний 1997-ку шинал МахIачкъалалив. Ванал къуртал бувну бур Аьрасатнал ихтиярду дуруччай академиялул юридический колледж. 2018-ку шинал Калининградуллал областьрай аьралий бурж бартбивгьуну бур. Каруннай бияйсса соревнованиярттай хьхьичIунсса кIану бугьаврихлу лайкь хьуну ур «Гвардия» тIисса хъазамрай лачIай лишандалун. 2023-ку шинал Запорожскаллал областьрайн гьан увну ур оператор-гранатометчикну. Январьданул 23-нний 2024-ку шинал Вербовое тIисса шяраву, аьралий задание биттур дуллай унува лавгссар абадшиврувун.
Ванал сурат дусса чIирацI тIутIив дихьлахьиминнавух бия буттал лажиннагу дакIний къаличIантIисса МахIаммадлул чIивисса душгу. Жунмарив дакIний бикIан аьркинссар вирттал ччи-ччиния къабуккайшиву. Хаварбакъулий кунмасса иш бакъашиву вирттал ляхъаву. Гьамин, мукунсса вирттавралли жулва билаят гуж бусса, иширачIа кьянкьашиву дувайсса вирттаврал билаят бушиву ккаккан буллалиссагу.
ПатIимат Рамазанова
