Итникьини Лакрал театрдануву хьунни Дагъусттаннал халкьуннал шаэр, прозаик, драматург Сибирбаг Кьасумов дунияллийн увккун 80 шинал юбилейран хас бувсса аьпалул мажлис.

Шаэр дакIнийн утан бувкIун бия республикалул властьрал, литературалул ва магьирлугърал ккураннал вакилтал, ванал гьалмахтал, творчествалул кьимат кIулми.

Вечер дайдирхьунни «Дагестан» ВГТРК-лул хIадур дурсса журналист Аминат Аьбдурашидовал шаэрнал оьрмулул ва творчествалул ххуллия бусласисса киносуратрая. Муния махъ, шаэрнал шяравучув, Дагъусттаннал Халкьуннал Мажлисрал хъунаманал хъиривчу Камил Давдиевлул бувсунни Сибирбаг Кьасомовлул оьрмулия ва творчествалул ххуллия.

Дагъусттаннал Культуралул министрнал хъиривчу Мурад ХIажиевлул кIицI лавгунни Сибирбаг Кьасумовлул яргсса хха кьабивтун бушиву республикалул миллатирттал драматургия хьхьичIуннай давриву. Лакрал театрданул бивхьусса ванал пьесардаясса шанмагу спектакль лайкь хьуну бушиву лавайсса кьиматран. Лакрал щархъурду зунттава кьанийн дизан даврия бусласисса «ЛухIи кьини» 2002 шинал Владикавказрай «Сцена без границ» тIисса дунияллул халкьуннал дянивсса миллатирттал театрдал фестивальданий лайкь хьуну бур «За лучшую режиссцуру» дипломран (Режиссер Валерий Эфендие, ивкIуну махъ).

1877 шинал хьусса зунттал агьалинал паччахIнал къаршисса бунтрая бусласисса "Оьтту ва макь» 2019 шинал МахIачкъалалив дунияллул халкьуннал дянивсса миллатирттал театрдал фестивальданий лайкь хьуссар «За лучшую режиссуру» дипломран (режиссер Аьрасатнал лайкь хьусса артист Аслан МахIаммадов). Бархъаллайл Маллайл ва Гъумучиял ПатIиматлул чулийн къадурксса ччаврия бусласисса «Ччаву ва макь» спектакль 2020 шинал «Воспевшие Дагестан» Дагъусттаннал театрадал конкурс-фестивальданий лайкь хьуссар «За лучшую женскую роль) дипломран (Дагъуцсттаннал лайкь хьусса артистка Зинаида Чавтараева).

Шаэрнал творчествалия гьарза-гьартану бувсунни Дагъусттаннал чичултрал союзрал хъунмур Марина Колюбакина-АхIмадовал.
Сибирбаг Кьасумов дакIнийн утлатисса ихтилатру бунни ДР-лул Жяматийсса палаталул хъунаманал хъиривчу Сапарбаг Аьбдуллаевлул, «Дагестан» ВГТРК-лул хъунама директорнал хъиривчу Ссалам Хавчаевлул, Лакрал райондалул бакIчи Зураб Куччавевлул, шаэр Багьауттин Аджиевлул, Дагъусттаннал чичултрал союзрал лакрал секциялул хъунама Супиян Оьмаровлул, шяравучу ва хьхьичIунсса дус Жабир Абакаровлул.

Цинявппагу кIицI лаглай бия Сибирбаг Кьасумов ивкIшиву лакрал ва дагъусттаннал ттизаманнул
литературалул ца яргсса вакил, машгьурсса балайрду чичу.
Шаэрнал мукъурттийсса балайрду тIий бушиву лакрал сайки цинявппагу балайчитал.

Шаэр дакIнийн утлатисса мажлисрайгу ганал мукъурттий балайрду увкунни: Лариса ХIажиевал, Загьидат Муслимовал, Арслан Шахмардановлул, Шамсуттин Къаплановлул, Луиза Шагьдиловал, Саният Рамазановал, АхIмад АхIмадовлул, Карин Кьадинаевлул;: Аьбдул Мурадовлул, Нурианна Каллаевал, Зульфия Архилаевал, Ямлихан ХIажиевлул, Диана Кадинаевал.
Ккаккан бунни Аслан МаIаммадовлул цIу буккан бувсса «ЛухIи кьини» спектакльданувасса парча.
Мажлис бачин бувну бия Аьрасатнал лайкь хьусса артист Аслан МахIаммадов ва Дагъусттаннал лайкь хьусса артистка Саният Рамазанова. Ахирданий вечер сакин дурминнахь, хасну Лакрал театрданухь ва Дагъусттаннал халкьуннал артистка Лариса ХIажиевахь, ппу дакIнийн утан бувкIминнахь барчаллагь увкунни Сибирбаг Кьасумовлул душнил Нинул.

Зулайхат Тахакьаева