Дагъусттан Республикалул БакIчи Федор Щукиннул вай гьантрай къулбас дурунни кIанттул цилакаялувшиндарал органнал 2025 шиналсса социал-экономикалул ккаккиярттахлу грантру дуллалишиврийн багьайсса Указрай.

ХьхьичIунсса кIанттурду бувгьуминнавух ва базилухьгу дур Лакрал район. Лахъсса зунттал районнал дянив Лакрал райондалул бувгьуну бур цалчинмур кIану.
ДакIнин бутан, хьхьичIунсса муниципалитетирттан грантру дуллай байбивхьусса 2008 шиная шинмай Лакрал райондалул ацIния ххюйлчинни хьхьичIунсса кIану бугьлагьисса.
Цалчин Грантран лайкь хьуссар Лакрал район 2009 шинал, 2008 шиналсса ккаккиярттайн бувну. Муния шиннай ва Грант ларсун дур гьарца шинал лув-ялув. Цалчинсса кIану бувгьуссар ххюйлва.
Гьашинугу, райондалий хьусса тIабиаьтрал апатIрайну зараллу бивну бухьурчагу, ми зараллугу цила ххуллий лахълай, социал-экономикалул аралуву хьхьичIунсса ккаккияртту хьун дурну дур.
Лакрал райондалул бакIчи Зураб Куччаев барчаллагь тIий ур муниципалитет хьхьичIунсса ххуттайн лахъан захIмат буллалисса гьарцагу идаралул зузалтрахь.
Жугу барча тIий буру райондалул агьалинахь ца уттигу ххаллилсса хьхьичIуннайшиву!