МахIачкъалалив «Россия – моя история» тарихрал паркраву «Граждан журналистикалул школа» проектрал лагрулий хьунни «Академия смыслов» цIанилусса жагьилтурал форум.

Мероприятиялул спикерталну бия Дагъусттаннал бакIчинал ва ХIукуматрал администрациялул хъунаманал хъиривчу, Дагъусттаннал бакIчинал Информациялул политикалул ва пресс-службалул управлениялул хъунама Марат ЛухIуев, Дагъусттаннал бакIчинал ва ХIукуматрал администрациялул Виваллил политикалул управлениялул хъунаманал хъиривчу Ислам Мусаев, Дагъусттаннал жагьилтурал министр Камил Саидов, Дагъусттаннал университетрал Координациялул центрданул каялувчи МахIаммад МахIаммадов, «Знание» тIисса Аьрасатнал обществалул Дагъусттаннайсса филиалданул директор Шевкет Крумов.
Ихтилатру хьунни жагьилтурая, миннал чIарав бацIаврия, цIана соцсетирдавусса тагьардания, жагьилтурансса нигьачIаврия ва ми ­оьмуния мюхчан баврия.

Камил Саидовлул бувсунни Дагъусттаннай жагьилсса пишакартурах хъуннасса къулагъас душиву, Росмолодежь проектрал лагрулий журналистътал хьун наниминнаща цивппа ккаккан бан бюхъаншиврул федерал даражлий арцу итадакьлай бушиву.
Ванал бусласимунийн бувну, гьарица шинах грантирдал конкурсирттай гьуртту хъанай ур 700-800 инсан. Дагъусттаннай гьарица шинах грантирдан итадакьлай дур 50 миллиондалия 70-ннийн бияннинсса арцу.
– Дагъусттаннал жагьилтурачIа площадкарттугу, ресурсругу, кашигу духьурча, миннал ккаккан бантIиссар цала даража, бюхъу-бажар. Жугу миннал чIарав буссару, – увкунни Камил Саидовлул.
Заседаниялий ххал бивгьунни Аьрасатнайн ва Дагъусттаннайн политикийсса гьужум баврил, фейкирдащал талатаврил, жагьилтал бявкьу ххуллия арх баврил масъалартту.

Социал сетирдавусса тIайла бакъасса информациялул жагьилтурал ня зия дуллалаврия, ми бяйкьин буллалаврия, оьккимунийн кIункIу буллалаврия буслай, жагьилтурай дюъ дихьлахьисса, ми мюхчан буллалисса бия ихтилатру. Бувсунни жагьилтурахь соцсетирдавусса жура-журасса хIарамзадашивурттаягу. Шевкет Крумовлул чIурчIав дунни инсантал хъяврин бан хьхьичIва-хьхьичI тарих, яла миллат, дин ишла дуллай бушиврий.
– Соцсетирдал майданнай бюхханну, асар хьунну, ккалаккима, вичIи дирхьума вих анну гъалгъа тIун кIулманал духлай дур хIакьину, – кIицI лавгунни ванал.

Пленар заседание къуртал хьуну махъ, гьурттучитал кIива секциялийх бавчIуну зий бия. Экспертътурал бувсунни ттизаманнул медиалуву цукун зун аьркинссарив.