Оьруснал театрдануву хьунни Дагъусттаннал халкьуннал шаэр Сибирбаг Кьасумовлул оьрмулун 75 шин шаврил юбилейран хас бувсса мажлис. Му хIадур бувну бия Лакрал театрданул.
![](https://ilchi.info/wp-content/uploads/2021/12/yubilej_sibirbag_kasumov21.jpg)
Шаэр барча ан бувкIун бия политикалул ва жяматрал ишккаккулт, шаэрнал дустал, гьалмахтал.
Мажлис байбивхьуна Сибирбаг Кьасумовлуя «Дагъусттан» ГТРК-лул ларсъсса документал фильм ккаккан даврийну.
Республикалул каялувчитурал ва магьирлугърал ккурандалул цIания шаэр барча уллалисса ихтилат бувна культуралул министр Зарема Буттаевал:
– Дагъусттаннал авадансса ттизаманнул литературалуву хъунмасса кIану бугьлай бур вил творчествалулгу, хаснува драматургиялул. Вил пьесардайну Лакрал театрданул бивхьусса спектакллу ккалли бан бучIир миллатрал репертуар чIаланну авадан дан республикалул театрал оьрмулуву хьусса яргсса иширан.
ХIурмат бусса Сибирбаг МахIаммадович, Дагъусттаннал шаэр хьуншиврул ина бивтун бур биялсса ххуллу, хъунмасса захIмат бивхьуну бур лакрал литературалуву ва культуралуву.
Юбиляр барча уллалисса ихтилатру ялагу бунни ДР-лул ХIукуматрал хъунаманал хъиривчу Камил Давдиевлул, Дагъусттаннал Чичултрал союзрал хъунама МахIаммад АхIмадовлул, Лакрал райондалул бакIчи Юсуп МахIаммадовлул, шяраваллил хозяйствалул министрнал хъиривчу Шарип Шариповлул, МахIачкъала шагьрулул депутатътурал мажлисрал хъунама Марис Илиясовлул, Дагъусттаннал МВД-лул управлениялул каялувчи Сахават Сахаватовлул, Дагъусттаннал халкьуннал учитель ХIасан АхIмадовлул, Ккуллал райондалул бакIчинал хъиривчу Анатолий Давдиевлул ва цайминнал.
![](https://ilchi.info/wp-content/uploads/2021/12/yubilej_sibirbag_kasumov4.jpg)
Ихтилатру бувми кIицI лаглай бия ттизаманнул лакрал балайчитурал тIутIисса чIявусса балайрду бушиву Сибирбаг Кьасумовлул мукъурттийсса. Миннувасса ца яла язими балайрду увкуна Дагъусттаннал халкьуннал артистътурал: ХIажиаьли ХIажиаьлиевлул, Лариса ХIажиевал, Луиза Шагьдиловал, Саният Рамазановал. Концертрай ялагу гьуртту хьунни Дагъусттаннал паччахIлугърал халкьуннал инструментирттал оркестр, «Лезгинка» ва «Дагестан» ансамбллу, машгьурсса балайчитал Даниял Шабанов, Загьидат Муслимова, Арслан Шагьмарданов ва цаймигу.
Мажлис бачин бувну бия Дагъусттаннал халкьуннал артистътал Аслан МахIаммадов ва Саният Рамазанова.
Ахирданий Сибирбаг Кьасумовлул барчаллагь увкуна юбилейрал мажлис лавайсса даражалий хIадур бувсса Лакрал театрданул коллективрахь, барча ан бувкIцириннахь.
Шиккува кIицI бан, шаэрнал юбилейран хас дурсса мероприятиярттал лагрулий хьхьичIмур кьини Лакрал театрданул ккаккан бувссар Сибирбаг Кьасумовлул пьесалийну спектакль «Оьтту ва макь».