Космонавтикалул кьинилул хьунийн Гъумучиял школалий хъуннасса шадлугърай кIицI ларгунни миллатрал язисса арс, Совет Союзрал Виричу, лётчик-космонавт, Дагъусттаннал цалчинсса ва хIакьинунийн увагу усса ца космонавт, Муса Маннаровлул 75 шинал юбилей.
Мероприятие дачин дурну бия Гъумучиял школалул директор Соня Макьаева. Ванил кIицI лавгунни Космонавтикалул кьини жула паччахIлугъран цуксса агьамсса кIанттай дуссарив, хаснува агьамсса кIану бугьлай ушиву жула Муса Маннаров. «Аьрасат хIакьинугу личIлачIиссар дунияллул хьхьичIунсса аьламрал державану.
Цалчин левхссар аьламравун, цалчин бувкссар тIивтIусса аьламравун, цалчинсса хъамитайпа-космонавт. Хасъсса кIану жула дагъусттанлувтурал, лакрал дакIурдиву бугьлагьиссар Совет Союзрал Виричу Муса Маннаровлул. Дунияллулгу, Дагъусттанналгу тарихраву ванал чирчуссар чаннасса, хъама къаритайсса цIа. Школалул коллективран хъунмасса пахрур Муса Маннаровлул цIанийсса школалий зий бушиву, мунищала архIал хъуннасса жаваблувшиннагур», – увкунни Соня Макьаевал.
Райондалул бакIчинал хъиривчу Малик ХIусмановлул кIицI лавгунни Муса Маннаровлул буттал кIанттул космонавтикалул тарихраву бивхьусса захIмат ва жула бюхттулсса ватанлувнал бивтсса оьрму жагьилсса никиран эбратну хъанай бушиву.
А.Тахо-Годил цIанийсса Дагъусттаннал Национал музейрал директор Игорь Олейниклул бувсунни бусалардавун агьсса космонавтнал пишакарсса хьхьичIуннайшивурттая.
«Бартбигьин къахьун кунма чIалачIисса мурадругу зула хьхьичI бивхьуну, хъит тIутIияра миннуйн. Муса Маннаровлул бивтсса ххуллул исват буллай бур цала гужирдайнгу вихну, кIулшивурттайн хъит тIутIисса инсаннаща ччимур ххуллу битан шайшиву», – увкунни Игорь Олейниклул.
Дуклаки оьрчIал дурккунни аьламрал тарихран хас дурсса, Аьламравун ххуллу тIивтIуми ва буттал кIанттул космонавтика хьхьичIуннай дурми лахъа-хъун буллалисса назмурду. Язи-язими ххару тIурча, хас бувну бия миллатрал язисса арснан. Щадлугъ хъиннура чIюлу дурунни Гъумучиял оьрчIал магьирлугърал школалул тарбиялувтурал къавтIавурттал.
Учительтурал хорданий увкунни Муса Маннаров цалчин аьламравун левхсса гьантрай лакрал шаэр МахIаммад-Загьид Аминовлул ва композитор Мазагьиб Шариповлул цачIу чивчусса «Ххуллухъин баннав, Мусай» тIисса балай. Балай цуппагу дунияллийн бувкссар Мирханум ва Мазагьиб Шириповхъал щаллу бувну, аьламравусса Мусан цанмагу чIалай.
Экрандалий ккаккан дурунни буттал кIанттул космонавтика хьхьичIуннай шаврил тарихрая ва Муса Маннаровлул виричусса ххуллия бусласисса документал фильмгу.
Муса Маннаровлул юбилейран хас дурсса мероприятияртту ялагу хIадур дурну дия музейрал, библиотекарттал, школардал ва детсадирттал.
Зулайхат Тахакьаева
