Москавуллал Миллатирттал къатлуву хьунни аьдат­ра­вун дагьсса медициналул форум. «Наука и практика: от открытий к клиническим рекомендациям» тIисса жагьилсса пишакартурал ттизаманнул инновациялул форумрал сакиншинначи хьунни Москавуллал культуралул центр «Дагестан».

Мероприятие тIитIлай, ихтилат бунни «Дагестан» МЦК-лул вице-президент, медициналул элмурдал доктор, профессор Астемир Шайхаьлиевлул. Форумрайн оьвкуну бия цIанихсса аьлимтурайн, студентътурайн, ординатортурайн, аспирантътурайн. Гьар мудан кунна чялишсса гьурттушинна дунни «Дагестан» МЦК-лул вакилтурал. Мероприятиялул модератор ия Дагъусттан цIу буккан баврил клубрал президент, Дагъусттаннал лайкь хьусса хIакин, Аьрасатнал Халкьуннал Дусшиврул университетрал (РУДН) урологиялул кафедралул доцент Пайзулла Мингболатов. Мероприятиялул гьурттучитал барча буллалисса ихтилат бунни цIа дурксса аьлимчу, изобретатель, Аьра­сатнал хьхьичIунсса стоматологтуравасса ца, медициналул элмурдал доктор, профессор, Аьрасатнал Элмурдал академиялул член-корреспондент, РМАНПО-лул (Российская медицинская академия непрерывного профессионального образования) стоматологиялул факультетрал декан, ортопедиялул ва аьмсса стоматологиялул кафедралул каялувчи Сяъдуллагь Абакаровлул. «Дагестан» МЦК-лул вице-президент ва ЦентрданучIасса Медициналул зузалтрал ассоциациялул каялувчи Гулизар Башанаевал дуллунни хьхьичIунсса студентътуран, ординатортуран, аспирантътуран ва хIакинтуран ХIурматрал грамотартту. Дагъусттаннал ЦIуллу-сагъшиву дуруччаврил министерствалул чулухасса ХIурматрал грамота дуллунни «DAZHAEV» тIисса стоматологиялул клиникалул хъунама хIакин, Эстетикалул стоматологиялул Евразиянал ассоциациялул президент, «STILE ITALIANO» тIисса Европанал стоматологтурал ассоциациялул Арцул вакил ХIажияв Дажаевлун. Ва хъанахъиссар «Больше чем улыбка» тIисса пациентътурансса луттирал авторгу. Укуннасса грамота дуллунни «DAZHAEV» клиникалул генеральный директор Заира Дажаевангу. Ватанлувтуран хъунмасса кумаг буллай, чIарав бацIлай тIий Гулизар Башанаеван «Дагестан» МЦК-лул чулуха дуллунни «За верность Дагестану» медаль. «Дагестан» МЦК-лул чулуха хIурматрал грамота дуллунни Пайзулла Мингболатовлун. Форум хьунни медициналул сфералувусса ттизаманнул арардая кIул хьун ччисса жагьилсса хIакинтуран, ординатортуран ва медициналул вузирттал лавайми курсирдал студентътуран къулайсса площадкану.