Вай гьантрай «Дагестан» РИА-лул редакциялий хьунни миллатирттал дянивсса аслахIшиву цIакь даву, миллатирттал мазру, аьдат-эбадатру, кьиматрай думур дуруччаву мурадрай баян бувсса «Народов много – страна одна» тIисса цIанилусса конкурсран хас дурсса пресс-конференция.

Конкурсрал шартIирдая ва хьхьичIун лавсъсса агьамми мурадирттая балжину бусласисса ихтилат бунни «Ассамблея народов России» тIисса Аьрасатнал жяматийсса паччахIлугърал идаралул Дагъусттаннал региондалийсса отделениялул председатель Зикрулла Илиясовлул.

Конкурс дуллай бур «Наследие, объединяющее народы» тIисса проектрал лагрулий ва ДР-лул Диннал ва миллатрал политикалул министерствалул чIарав бацIаврийну. Конкурсрал шартIирдайн бувну, шикку ишла бан ихтияр дур оьрус ва Дагъусттаннал миллатирттал мазру. Зикрулла Илиясовлул бусаврийн бувну, конкурсрай уква гьуртту хьунсса ихтияр дур дянивмур даражалул кIулшивуртту дулаврил ва художествалул школардал дуклаки оьрчIахь, колледжирттал ва вузирдал студентътурахь ва миннал педагогтурахь, насихIатчитурахь.

Шиккусса бяст-ччаллу бур кIива журалул: «Лучшая письменная работа о дружбе народов Дагестана» тIимур номинациялул тIалавшиндарайн бувну, хьусса ишру гьануну лавсун, миллатирттал дянивсса дусшиврул ва аслахIшиврул арарду дуруччавриясса сочинение чичин багьлай бур.
«Сохранение и развитие родных языков» тIимур бутIуву гьурттучитуран чичин ккаккан дурну дур «Мой родной язык: прошлое, настоящее, будущее» тIисса темалун хас бувсса эссе. Му бакъассагу, ккаккан дан аьркинну дур миллатирттал мазурдийсса произведенияртту пасихIну ккалаккисса видеороликру.
Хамискьини «Россия-моя история» тIисса паркраву хьунтIиссар конкурсрал хIасиллу дуллалисса батIаву.