Майрал 22-23-нний Краснодардай хьусса щалагу Аьрасатнал фестиваль-конкурсрал зоналул этапрай Ухссавнил ва Кьиблалул Ккавкказуллал федерал округирттаясса творчествалул коллективирттавух гьуртту хьунни Республикалул Халкьуннал творчествалул къатлучIасса, Хасавюрт шагьрулиясса къавтIаврил коллектив «Эхо гор».
Фестиваль-конкурсрай кIирагу федерал округраясса коллективирттавух гьуртту хьуссар Донецкаллал ва Луганскаллал Халкьуннал республикарттаямигу, Запорожскаллал ва Херсонскаллал областирдаямигу, цинявппагу урчIва коллектив.
Коллективру бяст-ччаллий бувкссар творчествалул личIи-личIисса журардаву: халкьуннал музыка, къавтIавуртту ва Аьрасатнал халкьуннал аслийсса культура ккаккан дуллалисса. Вайннуву хьхьичIун ливчуну, жулла республикалиясса коллектив хьунни фестиваль-конкурсрал лауреат ва лайкь хьунни 2 миллион къурушрал лагрулийсса грантран. Тти ва коллектив гьуртту хьунтIиссар Москавлив хьунтIисса финалданийгу.
Фестиваль-конкурс хьунни Аьрасатнал Культуралул министерствалул кабакьаврицIух.
