Хасъсса аьралий операциялий жард къакуну цала пишакаршиврул бурж биттур буллай бур, аьралийтал бакъасса, хIакинталгу. Шин ххишалагу хьуну дур Катастрофардал медициналул центрданул борт-хирург, трассалул отделениялул хъунама Давид Учуев цала хушрай СВО-лийн лавгун, захIматсса щавурду дирсса жула аьралийтал бивкIулуща ххассал буллай. Къуллугъ буллай ур Запорожскаллал областьрай. Ванал пишакаршиврул биялалийну бивкIулуща ххассал хьуну бур цикссагу аьралийтал, азаллийсса аьралийтуран тIурча, лавхьхьуну бур анавархъиндарай цалчинсса медициналул кумаг буллан.
Давид цала уртакьтуращал дяъвилул ишру нанисса кIанттайн увкIун, аьралийтал цIарава буккан буллай ур. Цимиллагу цайннагу дирну дур щаву. «Щаву, цуксса кIусса духьурчагу, духIан ­бигьар, бухIан захIматмур аьралий гьалмахчунацIа шаву дур», – тIий ур Давид.
Буслай ур кумаг буллан ­багьайшиву ялтту ракетарду ­лехлай дунура, хьхьурду рутан тIурча – хъунмурчIин окопирттаву.
ШавкIуллал шяравасса Давид Учуевлуя ватанлувтуран кIулссар коронавирусрал пандемиялул чIумал Дагъусттаннал зунттал яла архми районнайн лаглай, захIматсса къашайшалтран цила чIумал кумаггу бувну, вертолетрай МахIачкъалалив ковид цIуцIаву хъин дуллалисса центрданийн биян буллай ивкIсса жагьилсса хIакин хIисаврай. Республикалий коронавирусрал инфекциялул цIуцIаву сукку шавривун ва лавмартсса вирусращал талай айивхьуну ур.
Увну ур Давид 1993-ку шинал ШавкIуллал шяраву, райондалий бусравсса Иосифлул ва Аксанал кулпатраву. Ппу зий ур Агьалий социальныйну буруччаврил центрданий, нину – хьхьичIунсса педагог. ­Билаятрал кIулшиву дулавриву ­хъанахъисса дахханашиннарду байбихьулул классирттаву Аксанал классраятур дайдишайсса ва мунил опыт вайми школардайхгу бачIайссар. Республикалул чIявусса конкурсирттай гьуртту хьуну, хьхьичIунсса кIанттурду бувгьуссар. ШавкIуллал школалул ва Гъумучиял лицейрал учительтал хIакьину пахрулий бур Давидлуя. Буслай бур ва гиччава най уна хIарачат бусса, инсаннан кумаг бан хIадурсса оьрчI ивкIшиву.
ХьхьичIунсса студент хIисаврай, итталу ивкIун ур Дагъусттаннал паччахIлугърал Медициналул академиялуву дуклакиссаксса хIаллайгу. КIилчинмур курсирай дуклай унува, айивхьуну ур МахIачкъала шагьрулул Цалчинмур азарханалул Туннурдал отделениялий операцияртту бавриву гьуртту хъанай. Шамилчинмур курсирай зий айивхьуну ур вава азарханалул аьмсса реанимациялул отделениялий медбратну. Ординатурагу къуртал бувну бур вава азарханалул ЦСЭМП-лий, архIала Дагъусттаннал Катастрофардал медициналул центрданий ххуллул къуллугърал бригадалул фельдшернугу зий. 2018-ку шиная шийнай зий ур шиккува вава бригадалул хIакинну ва Санитар авиациялул бортхирургну, трассалул отделениялул хъунаману, Санкт-Петербург шагьрулул Национал службалул санитар авиациялул бортхирургну, Наби ЦIаххаевлул цIанийсса Республикалул травматологиялул ва ортопедиялул центрданул хирургну.
Урувччуну лякъиннав Заннал инагу, вищал аьрайсса вил даврил уртакьталгу, цинявппа жула аьралийталгу! Ччясса мутталий хасъсса аьралий операциягу къуртал хьуну, сагъ-саламатну вила кулпатрал ялун зана хьуну ккакканнав!
Зулайхат Тахакьаева