Ккуллал райондалул администрациялул къатраву хьунни хасъсса аьралий операциялул гьурттучи Бадави МахIаммадовлул нитти-буттащалсса хьунабакьаву. Шикку гьуртту хьунни администрациялул бакIчи Шамил Рамазанов, райондалул Мажлисрал депутатътурал председатель Гъази Оьмаров, районнал дянивсса военкоматрал вакил ХIасан Масуев.

Аьрасатнал президентнал ХIукмулийн бувну, аьралий бигарду биттур буллай ккаккан дурсса къучагъшивурттахлу Бадави МахIаммадов лайкь хьуну ур Къучагъшиврул кIира ордендалун. КIилчинмур орден дуллуну дур ванан аьпалул хьуну махъ. Виричунал канил дугьан нясив къархьусса орденну дуллунни ванал нитти-буттахьхьун Ширвани ва Шюъбанат МахIаммад­овхъахьхьун.
Бадавинан диркIун дур дурагу 20 шин. Амма, ванал цала кутIасса оьрму бувтун бур яргну ва ялун нанисса никиран эбратну. Дуклай ивкIун ур Аьрасатнал Виричу Халид Мурачуевлул цIанийсса Ккуллал 1-мур школалий.
– Бадави школалийн ххюра шинаву увкIна, дуккаврил ва спортрал чулухунай итххявхсса, школалул жяматийсса давурттавухгу чялишну гьуртту шайсса оьрчI икIайва. Хъинну хIарачат бусса, яхI-къирият дусса оьрчI икIайва. ХIакьину ва дуклай ивкIсса школалий дуссар ванал суратру дирхьуну чIюлу дурсса, аьралий бурж лавайсса даражалий бартбигьлай ивкIсса къучагънал аьпа абад буллалисса «Виричунал парта» , – тIий буслай бур ванал цалчинсса учительница Юлиана ХIажиева.
Школа къуртал байхту, Бадави увххун ур цал Юридий колледжравун, яла Ставрополлал крайрайсса Ухссавнил-Ккавкказуллал университетрал юридий факультетравун. Дуккаву къуртал дурну махъ Бадави лавгун ур аьралуннаву къуллугъ буллан. Да­гъусттаннал чиваркIуннаву мудангу ларайсса къучагъшиву диркIшиву исват буллай бур хIакьинусса кьини хасъсса аьралий операциялий гьуртту хъанахъисса жула жагьилтурал.
Ватандалул мюхчаншиву дуруччаврил масъалартту гьаз хьусса ппурттуву, хIакьсса патриот ушиву исват буллай, хушрай хасъсса аьралий операциялий гьуртту хьунсса кьутIи дурну дур Бадавинал.

– Дадай, на хасъсса операциялий гьуртту хьунсса кьутIи дав. Нажагьлий ттун оьрмулуцIа хьун нясивну бухьурчан, мукунсса кьадар ичIувагу бучIан бюхъайссар. Агана нагу, на кунмасса цаймигу къагьарчан, щилли Ватандалул мурадру буруччинтIисса. Пикри мабара, – аьтIутIисса нину паракьат данмур буслай, оьвтIий ивкIун ур ниттичIан.
Аьралий гьалмахтуращал Бадави гьуртту хъанай ивкIун ур Донецкаллал областьрайсса Авдеевка тIисса шагьру мурахас буллалисса талатавривух. Ши­кку ккаккан дурсса чувшиврухлу лайкь хьуну ур Къучагъшиврул ордендалун.

Бадави оьрмулул шиннардих къаурувгун, хьхьичIун урувгсса, акьлу-кIулши дусса, сивсусса, кьянкьа-кьурчIисса оьрчI ивкIун ур.
– Къуллугърал буржру лайкьну бартбигьлай, бусравну икIайва аьралий гьалмахтурал дянив, – тIий буслай ур ппу Ширвани.
Бадавинал цуксса цала оьр­мулун нигьачIаву дунугу, къизгъинну талатавуртту нанисса кIанттурдава щавурду дирсса, оьрмурдацIа хьусса аьралитал личин байсса бивкIун бур. Хьхьувай цана цувалу лавгун, щавурду дирсса оьрчIру цала хъачIунттайн бивчун ххассал байсса бивкIун бур.
– Хъунама сапер Бадави нигь-ццах цирив къакIулсса къучагъсса оьрчI ия. Ца чIумал кIалан минардацIа марцI дуван бувхсса ппурттуву, жуйн бензингу бувтIун, лавкьуна подвал. СсихI ласун къахъанай, бан-битан бухлавгун ливчIру. Жуяр чIавасса Бадавинал (жу ванайн «малыш» учайссия) чIирагу гъавгъун, цинявппа ххассал бувссару», – тIий буслай бур ванал аьралий гьалмахтал. Мукунсса ишру Бадавинал цикссагу хьуну бур.
Цамур чIумалгу, диверсантътал бувкIун, вайннал чулухуннай гранатагу лирчуну, солярка дуртIуну дур. Сагъну бунува ччуччинссару тIий, оьрмулия ка лавсун бивкIун бур аьралитал. Му ппурттуву, ча увкссарив къакIулну, цIунилгу цала гьалмахтал ххассал бувну бур позывной «малышнал». Аьралитурал ххаришиврул Бадави кIюрххилнин гьаваллавун гьаз уллай бивкIун бур. Ва ия чIавасса оьрмулух къаурувгун, аьралий иширттаву савсусса, яхI ялттусса аьраличу.
Июнь зурул 4-нний, Харьковрал чулухуннай минарду марцI дуллалисса операциялий Бадавинал къучагъшиврий жан дуллуну дур.
Ва талатавриву ккаккан дур­сса виричушиврун бюхттулсса кьимат бишлай, Аьрасатнал президент Владимир Путиннул указрайн бувну, аьпалул хьуну махъ ПаччахIлугърал ларайсса награда «Къучагъшиврул орден» дуллунни Бадави МахIамаммадовлун.
ХIакьинусса кьини вир­ттавран ккалли бан бучIир Бадави ва ванахава лавхьхьусса, кьянкьа-кьурчIисса хасиятру ду­сса, хасъсса операциялий гьуртту хъанахъисса цинявппагу жула оьрчIру. Барчаллагьри оьрмурдан нигьачIаву дунугу, вас-ццах бакъа Ватандалул мурадру буручлачисса оьрчIан лайкьсса тарбия дуллусса цинявппагу нитти-буттан.