Дагъусттаннал кIинтнил даэрдай чIиру буллай бур, бувсса чIируннал 98 процент яхьуну бур. Хозяйстварттаву чIиру буллай байбивхьуния шийнмай бувну бур 63 азарва чIи.
Экспертътурал тIимунийну, гьашину кIинттул хьусса дякъил цIуну бувсса чIируннайн зарал биян бувну бакъасса бур, ялунгума яттийн хъин чулийсса асарду биян бувну бур, цанбакъарча дякъил бухлаган байсса бур азарду диян дайсса микроорганизмарду ва суцIру.
Ккуллал райондалул Шяраваллил хозяйствалул управлениялул ккаккиярттайн бувну, ятту кIи рутлай бусса бур Бажиганнай, цIанасса ппурттуву яттил чIиру буллай байбивхьусса чIун дур, бувну бур 15-20 чIи, лазундарал щаллуну бур, ливтIусса бакъар.
Лакрал райондалул Шяраваллил хозяйствалул управлениялул хъунама Макьсуд Кьадиевлул бувсмунийну, райондалий дусса дур 16-20 СПК ва 49 фермернал хозяйство. Цинявппагу бусса бур 157 азаллий 202 яттил бакI. ЦIанасса ппурттуву 2 хозяйствалуву бувну бур 700 чIи, ливтIусса бакъар, лазуни диялну дур.
Республикалул КIинтнил даэрдал управлениялул информациялийн бувну, яла чIявуми чIиру бувну бур Ахттиял, Ахъушиял ва Рутуллал районнал хозяйстварттаву.ЧIиру ччяни буллай байбивхьуну бур мукунма Къурагъиял, Шамиллул, Гумбетуллал ,ЧIарадиял ва Лавашиял районнал хозяйстварттаву. ЦIанасса ппурттуву кIинтнил даэрдай яттил кIи рутаврил тагьар ххуйну дусса дур, ятту канан занай бусса бур.
Яттил чIиру баврил тагьарданущал кIул шаву мурадрай ДР-лул шяраваллил хозяйствалул ва бакIлахърулул министрнал цалчинма хъиривчу Шарип Шарипов ва ДР-лул ФАНЦ-лул хъунама элмийсса зузала, профессор МахIаммад Баратов бувкIунни «Гамма» тIисса ЦIумадиял райондалул ятту буллалисса хозяйствалувун.
Хозяйствалул каялувчи АьлиасхIаб АьлиасхIабовлул тIимунийну, шикку бусса бур 1500 тушиннул жинсирал яттил хIайван, чIиру бувну бур 350 ттал, циняв чIиру сагъну бусса бур.
Шарип Шариповлул бувсмунийну, гьашину кIинтнил даэрдал зоналий чIиру бувантIий бур 1 млн ва 70 азарва ттал. Миннувату уттинин чIиру бувну бур 110 азарва ттал, лавсун бур 98% чIируннал. Дагъусттаннай чIявуну чIиру буллантIий бур мартрай. ДР-лул Шяраваллил хозяйствалул министерствалул ва районнал муниципалитетирттал хъунмасса хIарачат бувну бия кIинтнил зурдардийн хIадур хьун. Цила чIумал хIадур дурну дия хозяйстварттан аьркинссаксса лазуни, чIиру буллай байбишиннин луртан дурну дия хъала лазуннарал ва комбикормалул, бартдиргьуну дия ветеринариялул ва профилактикалул мероприятияртту.
«Хозяйстварттаву чIиру баврил тагьарданул буслай бур яттил хозяйствартту багьайсса куццуй хIадур хьуну диркIшиву. Махъсса ппурттуву республикалий микIлачIу хьуна, амма ризкьичитураща бювхъунни яттугу, чIиругу ябан. Утти ца нюжмардува байбишинтIиссар циняв яттил чIиру буллай. ДР-лул Минсельхозрал ва Ветеринариялул комитетрал чIиру баврил тагьарданул ялув бацIаву дуллай бур муданнасса низамрай. Умуд бур ласун 99% чIируннал», – увкунни Шарип Шариповлул.
