Избербашлив ххюва гьантлий най бия XII-мур жагьилтурал форум «Каспий». Ваний гьуртту хьунни Белоруссиянавасса, Египетнавасса, Туркнавасса, Молдованавасса,Тад-жикисттаннаясса, Къазахъисттаннаясса, Къиргъизиянавасса, Бангладешраясса ва Аьрасатнал ряхцIалва региондалиясса, вайннавух Донецкаллал ва Луганскаллал Республикарттаяссагу, жагьилтал – цинявппа ххюттурша инсан.
Шадлугърай гьуртту хьунни республикалул премьер-министр Аьбдулмуслим Аьбдулмуслимов ва ванал хъиривчу Муслим Телякавов. Вай ялтту бувккунни площадкардал, жап увкунни волонтёртуращал, бивунни Проектирдал аллеялийн, ххув хьуминнан дуллунни «Мы Вместе» тIисса дунияллул халкьуннал премиялул регионнал этапралбахшишру.
МаркIачIаннай хьунни Дагъусттаннал артистътурал концерт.
Муния махъсса даву дия бутIрайх дарчIусса. Жагьилтуращал цала опыт кIибавчIунни Аьрасатнал Вирттаврал, медиалидертурал, спортсментурал. Программалуву бия жагьилтал ватан ххирану тарбия баврин, добровольчествалун, цифровой технологиярттан, «Цалчинминнал Суккушиндаран», Ххувшаврил 80 шинан хас бувсса лекцияртту ва мастер-классру, дуллунни ГТО-рал кьараллу, гьуртту хьунни доноршиврул акциялий.
Форумрай ца яла агьамсса ишну хьунни ДР-лул жагьилтурал иширттал министрнал цалчинма хъиривчу Сиражуттин ХIалимов Донецкаллал ва Луганскаллал Республикарттаясса оьрчIащал хьунаакьаву. Ихтилат бия вайннал сиптарду чулийн дуккаврия, мунин кабакьу бансса «Росмолодёжь. Гранты» конкурсрай гьуртту шаврия.
ЧIявусса хъамал мукIру хьунни Дагъусттаннай асар хьушиву цивппа ца хъуннасса жагьилтурал ккурандалул бутIану. Форумрал ахирданий хьунни проектру дуруччаву. Гьурттучитурал ккаккан дунни ватан ххирашивриясса, добровольчествалиясса, магьирлугъраясса ва цаймигу темардайн дагьайсса цала сиптарду.
Язими сиптардан дуллунни «Росмолодёжьрал» грантру. Шадлугърай республикалул бакIчи Сергей Меликовлул, кIицI лавгунни форум хьушиву Аьрасатнал жагьилтал цачIун буллалисса ватандалухсса ччаврил ва кьянкьашиврул лишанну.
Форумрал цанияца площадкалий республикалул бакIчинан ккаккан бунни Ххувшаврил 80 шинан хас бувсса хъунмасса аьралий-тарихрал реконструкция. Ваний «Кавказ» тIисса поисковый кьюкьлул тарихрал реконструкциялул клубращал цачIуну хIасул бунни Ккавкказнахлусса талатавривасса бутIа.
Тамашалийн бувкIминнан ххал хьунни аьралий сурат: аьралий форма, ярагъ, техника дия дяъвилул шиннардий ишла дуллай бивкIминнучIан бюхъайссаксса гъансса.
Сергей Меликовлул лавайсса кьимат бивщунни сиптачитурал давурттан, тапшур бунни вайннал проектру чулийн дуккансса кабакьулун чаранну лякъин. Ххув хьуминнавух бия Запорожскаллал областьраясса Анастасия Слипенко, ванил грант ларсунни «Путь к гармонии» тIисса проектрахлу.
– Ттул проект зунтIиссар оьрчIан психологиялул кумаг баврил ялув, ва кIилчинсса аьрххир ттул Дагъусттаннайнсса. Гьар базилухь шичча лагара ляличIисса асардал дакI дурцIуну – шикку асар хъанай бур ца хъунмасса кулпатрал бутIану навагу бушиву, – тIий бур Анастасия.
Форумрал цал ттигу тасттикь бунни Аьрасатнал хъунмасса потенциал бушиву. «Каспий» форумрай дунияллийн буклай бур гьунттий бунияла чулийн буккантIисса пикрирду.
Зулайхат Тахакьаева
