ХIакьину Дагъусттаннайх кьини дурксса чIумал, жула халкьуннал муданна кунна ккаккан дунни цала чувшиву ва чумартшиву, инсаншиву, иш багьний чIарав бацIан хIадуршиву. Шайма шайсса кумагру буллай, арцуйну, дука-хIачIиялийну, лахха-ликкиялийну, лагма лавгунни балаллуву ливчIсса инсантуран кьини лахъан кумаг бан. Ххуйсса кумаг бувкIунни Дагъусттаннайн Къабардин-Балкьарнава.
ЧIярусса шиннардий тихалу кIилчинмур ватанну хьуну, республикалул хъун шагьрулий Нальчикрай ялапар хъанахъисса, тийх бусраврай ва хIурматрайсса АьбдурахIманнул ва ХъункIултIутIи Оьмаровхъал кулпатрая ва вайннащал хIала-гьурттусса кIанттул жяматрая. Вайннал дагъусттанлувтуран кумагран гьан дунни щин кIункIу дайсса насос ва хIачIайсса щинал шушрал бувцIусса машина. Оьмаровхъул Дагъусттаннаясса бушиву кIулну, вай кIулмигу цала кумагру вайнначIан биян буллай бия. КIилчинсса тихасса фура бия цIусса лахха-ликканмунил, шану-кIараллал бувцIусса. Ми тIайла дурккунни Оьмаровхъал хъунмур душнил Дилпиназлул ва ванил дустурал. Дилпиназлул цила ттучандалувагу дирхьунни диялсса янна-ка.
Цуппа ХъункIултIутIи тийхсса коммунист партиялуву чялишсса инсанни. Лагма лавгунни коммунистъталгу. Гьан бунни цала чулухасса кумаг. Щюлли базаллул директор Руслан Бабаевлул буллунни миллион арцул аьркинмур ласун. Къутта хьуну бувцIусса фура бувкIунни Дагъусттаннайн.
ХъункIултIутIил хъунама уссийл ГъазимахIаммадлул тIиртIунни счет. Дичлай бур миккун дагъусттанлувтуран кумагрансса арцу. Ва счетрайнгу хьхьичIра-хьхьичI арцу дирчунни вайннал цала ссийл Калиматлул.
– Жу мюхтажнан, кьини дуркнан кумаг буллай аьдатсса халкьру. ОьрчIнияцIава мукун тарбия хьусса буру. Шийх жул хIурмат-хатир дусса циняв, цала ттучанну бусса душнил дустал чялиш бувккун бур Дагъусттаннан кумаг бан. КIицI къалавгун битан къахьунссар «Дипломат» ттучандалул заллу Нелла, Оьмаровхъан цала душ кунмасса, Дилпиназлул ца ссу кунмасса Марина Элегант, мукунмасса, «Большая модница» ттучандалул заллу Огнеса, Рита Алхасова. Багьлул ххирасса, кIинттулсса, гъинттулсса, арамтуралсса, хъаннилсса янна дуркIунни вайннал. Жул кулпатрал хIурмат къабансса шийх акъассар. Жува чил кIанттурдай чалъаьрдаву, чаннасса чирахъиртталу бухьурчагу, жула Дагъусттаннайсса навтлил чирахъгу, зурул чанигу, нитти-буттащал, Хъуннащиял жяматращал гьан дурсса оьрчIшивугу, жун тачIав хъама къаритайссар. Аьзиз Дагъусттан – жул дакIниву лавхъсса чирахъри. Жугу буссару зущал, ххирасса дагъусттанлувтал, гъаралу ва щинаву, буссару дакI цIий, иттату макь най. Я Аллагь, ва зул ялун бивсса бала хъунмунил хьхьичIун багьну лякъиннав, давран бакIрай бацIаннав, давлат чIанийн багьаннав! Ва дунияллий яла гуж бумур зат дуаьри. Гьарица чак байтарив, на дуаьлий буссара, я Аллагь, жул буттал аьрщи дуручча, бала-апатI арх бува, халкьуннахьхьун ссавур дула тIий, – дуаьлий бур ХъункIултIутIи.
Андриана Аьбдуллаева
