Уттигъанну ттун макIра хьуна нава ца гьалмахчунащал бяст буллай. Му бясттираву на ух къахьун хIарачат буллай уссияв. Жул дянивсса бяст бия кьанив ва зунттаву яхъанахъисса инсантурал багьу-бизулиясса. «Зунттурду кьаннаяр лахъссар, кIийсса оьрмугу лахъну бикIан аьркинссар», – куну нава учайхту, чантI увкунав.
Нанияра, утти жува макI кьадиртун, чIихьличIан бучIаннуча.
Дурусну ва макьала чичлачисса кьини телевизорданувух ккаккан буллай бия Аьрасатнал чIявусса кIанттурду, гъараллу лачIлай, нехру гьузи лархъун, щинахьхьун лаглай бушиву. Нава уссара, зунттавусса къатрал хьхьичIгу авцIуну, дахьа бургъил кьабивтсса улклуй зиярат буллай. Ванил исвагьишиву, паракьатшиву, гъараллалгу, лачIурчагу, муксса хъунисса зараллу биян къабай. Ттул хьхьичIсса зунттурду, марххалттанилун лавгун бухьурчагу, лагабургъил тураннал мукун авурну чIалачIи буллай бияхха: «Зунттурдаяр ххуйсса зунттурдур бикIайсса» мунияту учайхьунссар. Хъинну тIайлану увкусса махъру бур.
Ялагу ахттакьунай на кулпатращал хавардай шяивкIун уссияв къатрал хьхьичIсса ларзулу. Цакуну ттул щарссанил: «ЧIалай бурив ва чIивисса, дурагу 80 квадрат метралул лагрулийсса жула ахъувату шинай канансса ахънилсса дучIайсса», – куна. Нагу цал ттигу тикрал буллай ура: «Лакку билаят кьянатссар» тIисса махъру Лакку билаятрал буллугъшиву къакIулманал увкусса махърур тIий.
Гьай-гьай, инсантуран ччай бур ххуйсса яннардугу ларххун занан, нахIусса личIи-личIисса дукрардугу канай, лахъсса харжругу бусса давурттайгу зун. Мукун гьарца затру дузалну къадикIайссар. Гай дузал дуллан инсан цувари хIарачат буллан аьркинсса. ХIарачатрал чулуха Лаккуй яхъанахъисса инсантал бюхъу бусса бур. Шикку бур, тIайлар, ца «амма». Му «аммагу» бавхIуну бур хIакьину зунттал инсантуран аьрщараха зуншиврул чара бакъа кIанттун лархьхьусса механизмарду душивруцIун. КъанукIура куннасса хъуни трактордуча – мюрщисса, зунттаву зузи дан хIалусса, миннуйн учай «малая механизация» куну. Махъсса чIумал жула зунттавун арнил кIанттаяту лавсун букIлай бур баххан ххалал кипру хъуни машинарттай. ХIасул хъанай бур суал: «Циваннивав зунттавусса инсантурал цала ятту-гъаттаран зунттавату ххулув къабуллалисса?» тIисса. Инсангу, ятту-гъаттарагу аьдат хъанай бур ттуршрахъул шиннардий яхъанахъисса кIанттаятусса бакIлахъиялия дурсса дукралийн. На луттирдай буккав инсаннал генардал лагрулийва бикIайсса бушиву дукия чурххал кьамул даврил ишру. Мунияту бухьунссар тIий ура зунттавату шагьрурдайн лавгсса инсантал чIявуну къашавай хъанахъиссагу. Ттун ялагу хIисав хьунни, Лаккуя, хасну жул Вихьлияту, Къизлардал кIанттайн бивзун лавгсса инсантал ччяни цIуцIи хъанай бушиву, гайннал оьрмурду кутIа хъанай бушиву. Бакъаривла пикри бансса зат?
Уттигу ца макI. Ттуккул-БархI тIисса кIанттул чIарах нанисса ратIнил тия чулий дуссар ттул хъу. МакIра на ияв тикку цирив дуллай. Яла, цакуну, цавай инсантал бувкIуна ттучIан. Гайннал: «Жу вай заллу акъасса хъуру, гъайкуну, дугьан ччай буру», – куна. Гайннащалла дия трактордал колоннагу. «Ва хъунил заллу нара, шиккун гъан машару. Ва нарагу дугьара», – куссия. Ялагу на дюъ дирхьуссия чIаравсса ттула чIаххувчунал хъуничIангу гъан машару куну. Ча увкссияв къакIулну, га чIаххувчугу чIарав хьуна. ЦитIиссар ва ттул макIлил? Ккаккайривав укунсса макIру цайминнангу?
