Мартрал 6-нний Москавлив паччахIлугърал бакIчи Владимир Путин хьунаавкьунни Дагъусттаннал каялувчи Сергей Меликовлущал. Миннал ххал бивгьунни республикалул социал-экономикалул лябуккулул масъалартту. Сергей Меликовлул АьФ-лул президентнахь бувсунни Дагъусттаннай бартдигьлагьисса проектирдая ва миннул личIи-личIисса отраслирдаву хьусса хIасиллая.
Хьунабакьаврил хIасиллал хIакъираву бувсунни Сергей Меликовлул.
«ХIакьину на жула президент Владимир Владимирович Путиннухь бусав цукун ялапар хъанай буссарив Дагъусттан, цукунсса дуссарив жучIара хьхьичIуннайшивуртту ва ци дуллансса пикри буссарив ттинияр мукьахуннайгу. Жул ихтилат хьунни яла агьаммуния –инсантурая, экономикалия, хъин чулийннай даххана хъанахъимуния.
Жунма цинявннан кIулли, цуксса хъуннасса мяъна дуссарив президентнан Дагъусттаннал. ГанацIун жула республика хъиннура цIакьну дархIуну дур 1999 шинал хьусса иширттайну. Му асар хъанай бур гьарца ихтилатраву – ганал дакIнийхтунусса мурад бур Дагъусттан хьхьичIунмай хъанахъаву ва мудана хIадурну ур кабакьин жула проектирдацIун», – увкунни Сергей Меликовлул.
Республикалул бакIчинал бувсунни СВО-лул гьурттучитуран ва миннал кулпатирттан кумагран Дагъусттаннаяту тIайла дурккун душиву 41 азарда тонна «гуманитаркалул», ларсун душиву техника, снаряжение – ххувшаврин аьркинмур. ЛяличIисса къулагъас дуллай бушиву кулпатирттах: выплатартту, хIаллихшинну, ччими журалул масъалартту дузал бавриву, зий байбивхьуну бушиву 12 ттизаманнул промышленностьрал предприятие, тIивтIушиву 111 школа ва 97 оьрчIал багъ, бакьин бувшиву 374 школа, 63 оьрчIал багъ, бувшиву 122 ФАП, бакьин бувшиву 329 цIуллушиву дуруччаврил объект, медициналул идарартту дузал бувшиву шаназарваксса цIусса оборудованиялул.
Республикалул бакIчинал Аьрасатнал президентнахь бувсунни Дагъусттаннал хъузалтрал хьхьичIуннайшивурттаятугу: ларгсса шинал региондалий ларсун дур 295 азарда тонна ахъулссаннул, 302 азарда тонна къюмайтIутIул.
Хьунабакьаврий ххал бивгьунни мукунма щинал дузал баврил, туризмалул, ТКО лазилакьи даврил, ххуллурду баврил, дух хьусса къатравату инсантал бизан баврил, спортрал, культуралул, жагьилсса ник тарбия даврил масъалартту.
Республикалул бакIчинал циняв дагъусттанлувтурал цIанияту Аьрасатнал президентнахь барчаллагь увкунни Дагъусттаннахсса хъуннасса къулагъасрахлу ва кумаг буллалаврихлу.
ХIадур бувссар ХI.Аьдиловлул
