Росгвардия сакин хьуну 10 шин шаврин ва низам дуруччай аьралуннан 215 шин шаврин хас дурсса мероприятиярттал лагрулий национал гвардиялул МахIачкъалаллал соединениялул моторизованный полкрал аьралийчу майор Мурад Асапов гьуртту хьунни Дагъусттаннал Жагьилтурал иширттал министерствалул сакин дурсса «Диалоги с Героями» тIисса Щалагу ­Аьрасатнал проектраву.

Республикалул жагьилтурал центрданий хьусса мероприятиялуву мукунма гьуртту хьунни дазул кьатIув аьралий бурж лахълай бивкIсса интернационалистътал, ­Аьрасатнал национал гвардиялул Новосибирскаллал аьралий институтрал курсантътал ва профильный классирттал ­дуклаки оьрчIру. Мурад Асаповлул бувсунни национал гвардиялул аьралуннал тарихрая ва ведомствалул бигардая. Мукунма ванал бувсунни захIматсса аьралий шартIирдай цала ­зузалтрал ккаккан дуллалисса чувшиврия. Ихтилат хьунни Ватандалул мурадру буручлай, хасъсса аьралий операциялий гьуртту хъанахъисса ­аьралийтураягу. Росгвардеецнал жавабру дуллунни дуклаки оьрчIал суаллахьхьун.
– Укунсса хьунабакьавурттал хъунмасса кIану бугьлагьиссар ялун нанисса ник Ватан ххирану тарбия даврил ххуллий. ОьрчIал дакIурдиву хIасул шайссар билаятраясса пахру, мунил мюхчаншиврул цIаний бавцIуминначIансса хIурмат, – увкунни Асаповлул.

Андриана Аьбдуллаева