СВО-лул Аьрасатнал цалчинма Виричу НурмахIаммад ХIажимахIаммадовлул цIа­нийсса Гъумучиял ОьрчIал ва чIаважагьилтурал спортрал школалий хьунни гьаршинал Ватан дуруччул кьинилун хасну шайсса, аьдатравун дагьсса те­ннисрал турнир.

Мероприятие сакин дурну дия Аьрасатнал Халкьуннал цашиврул шинал лагрулий. Ваний гьуртту хьунни 45 дуклаки оьрчI, вайннавух бия Кьубиял школалул дуклаки душругу.
Гьурттучитуран тIайлабацIу чIатIий, райондалул бакIчинал хъиривчу Малик ХIусмановлул увкунни: «Ватан дуруччул кьини – чувшиврул байра­нни. Жура ва байран спортрал хьхьичIуннайшивурттайну хьунадакьлай бушиврувугу ххуйшиву дуссар. Ххари хьунсса иш бур турнирданий гьуртту хьун ччими шиная шинайн чIяву хъанай бушиву.ТIааьнну бур жула дянив душру ккаккангу», – увкунни ванал. Райондалул аьралий коми­ссар Аьли ГъазимахIаммадовлул кIицI лавгунни физический хIадуршиндарал агьамшиву. «Ххирасса оьрчIрув! Ватан дуруччу икIан аьркинссар гуж бусса, хъит бусса, захIматшиву духIан бюхъайсса. Теннисрал кумаг байссар оьрмулувугу, спортравугу чарабакъа аьркинсса стратегическийсса пикри итххяххан бан. ЧIатIий ура зун аьщу­йн щавурттугу, дакI дарцIусса ххувшавурттугу», – увкунни аьралий комиссарнал.
Террорданийн къаршисса аппа­ратрал каялувчи МахIаммад Гадаевлул кIицI лавгунни бяст-ччал хъанай бушиву «Спорт террорданийн къаршину» тIисса оьвчаврилу.

5-8-ми классирттал дуклаки оьрчIаву ххув хьунни:
Ибрагьим Мудунов – 1-мур кIану (Гъумучиял школа);
Кьурбан Аьбдуллаев – 2-мур кIану (Хьурттал школа);
МахIад Шабанов – 3-мур кIану (Гъумучиял школа).
Вайннан бахшишру дуллунни райондалул бакIчи Зураб Куччаевлул.
9-11-ми классирттал дянив ххув хьунни:
МахIаммад Аьлишаев – 1-мур кIану (Гъумучиял школа);
Амир Кьурбанов – 2-мур кIану (Хьурттал школа);
Шамил Гъазиев – 3-мур кIану (Хьурттал школа).
Вайннан бахшишру дуллунни Аьли Гъазима­хIам­мадовлул.
ХIалим Нажмуттиновлул чулухасса «Приз зрительских симпатий» дурххунни Кьурбан Аьбдуллаевлул.
«За волю к победе» номинациялий райондалул бакIчинал чулухасса бахшиш ларсунни СултIанат ХIажиевал (Кьубиял школа).