Сентябрьданул 29-нний, СВО-лул Аьрасатнал цалчинсса Виричув НурмахIаммад ХIажимахIаммадов дунияллийн увксса кьини, Гъумучиял школалий хьунни ванал аьпалун хас дурсса Республикалул шахматирттал турнир.

Гьашинумур турнир хъанай дур шамилчинмур.
Турнирданул сакиншинначитал бур Лакрал райондалул администрация, ДР-лул Шахматирттал федерациялул ва А. Е. Карповлул цIанийсса Республикалул шахматирттал школалул кабакьаврийну.
Турнирданий гьуртту хьунни республикалул шагьрурдаясса ва районнаясса 50 оьрчI-душ. Бяст-ччал бия оьрчIал ва душварал дянив личIи-личIину.
Турнир тIитIлатIисса шадлугърай гьуртту хьунни Лакрал райондалул бакIчи Юсуп МахIаммадов, Виричувнал бутта Энгельс ХIажимахIаммадов, ДР-лул Жяматийсса палаталул хъунаманал хъиривчу Ссапар Аьбдуллаев.
Мероприятие дайдишин хьхьичI хъамаллурал тIутIив дирхьунни Гъумучиял школалул хIаятраву хасъсса аьралий операциялий ватандалул ххуллий жанну дуллуминнан цIа куну бувгьусса Аьпалул багъраву дацIан дурсса мемориалданучIа. Шиккува дакIнин бивчунни вай гьантрай МахIачкъалалив заправкалий пIякь увкумигу.
Турнир тIитIлай, Юсуп Ма­хIам­мадовлул кIицI ларгунни НурмахIаммад ХIажи­махIаммадовлул виричувшиву, бувсунни хасъсса аьралий операциялий жулва лакрал жагьилтурал ккаккан дуллалисса чувшивурттая.
Энгельс ХIажимахIа­мма­довлул барчаллагь увкунни Юсуп МахIаммадовлухь, чувшиврий жанну дуллуминнал аьпа абад баврил ххуллийгу, хIакьину паччахIлугърал мурадру буруччаврил цIаний талатисса аьралитурал кулпатирттахгу дуллалисса къулагъасрахлу.

Зулайхат Тахакьаева