Москавлив хьунни аьдатравун дагьсса «КIяла кьурукьру» тIисса, дяъвилул майданная зана къавхьуминнан ва Дагъусттаннал халкьуннал шаэр Расул ХIамзатовлул творчествалун хас дурсса литературалул вечер.

Шикку ихтилатру бунни Аьра­сатнал президентначIасса Дагъусттаннал вакилханалул хъунаманал хъиривчу ХIажимурад Къажлаевлул, «Дагестан» МЦК-лул президент Арсен ХIусайновлул, Москавуллал миллатирттал къатлул директор Сергей Ануфриенкол ва м.ц.
Байрандалул гьануну хъанахъиссар шаэрнал 1965-ку шинал чивчусса машгьурсса «Кьурукьру» тIисса балай. ХIамзатовлул кьурукьру дяъвилул майданная зана къавхьусса цинявгу аьралитурал аьпалул лишанни. ХIакьинусса кьини личIи-личIийсса шагьрурдай ва районнай кIяла кьурукьирттан дацIан дурсса 24 гьайкал дуссар .
«КIяла кьурукьру» тIисса литературалул байрандалул гьану бивзссар Москавуллал миллатирттал къатлул. Байран дуллай байбивхьуссар чIярусса шиннардил хьхьичIва, Гъуниннал шяраву «КIяла кьурукьру» мемориалданул комплекс бувния шинмай. 2009-ку шинал ЮНЕСКО-лул ва официалнайну Дунияллул халкьуннал дянивсса дакIний ритансса кьинирдал сияхIравун руртссар ва октябрь зурул 22-нний кIицI дуллан ккаккан бувссар. Ва кьини щалагу жула билаятрай шайссар ялун нанисса никиран дунияллий дакьаву дуруччаврил цIаний жанну дуллусса аьралитал дакIнин бичлачисса шадлугърал мероприятияртту. Байрандалул лишанну хъанахъиссар аьралитуран бивкIу бакъашиву исват буллалисса кIяла лелуххи. Ккавкказуллал халкьуннал бусала бур, дяъвилул иширттаву жанну дуллусса аьралитал кIяла кьурукьирттайн кIура баяйссар тIисса.