Вай гьантрай «Илчилул» редакциялий хъамалу уссия СунбатIуллал шяравасса жагьилсса ишбажаранчи ХIайдардул арс Амир Бугаев.

Мебель даххайсса рынокрай ца яла тIалавмур дур Амирдул хIасул дурсса, 20-хъайсса шиннардий кухнярду булаллисса «Зуля» тIисса цIанилусса фирма.

Амир увну ур 1971 шинал мартрал 22-нний Ккуллал райондалийсса СунбатIуллал шяраву хIурмат-кьиматрайсса ХIайдардул ва АтIил кулпатраву. Ппу ХIайдар зий ивкIун ур Ваччиял колхозрал хъунама бухгалтерну, мунияр махъ тамансса шинну дурну дур Ккуллал райондалул финотделданул хъунама бухгалтерну зий. Ва цала даву ххуйну кIулсса, къуллугърал бурж лажин кIялану бартбигьлагьисса инсан ивкIун ур. Аьпалул хьуну ур оьрмулул 66 шинаву. Нину АтIи та заманнул хъаннил кунна яхI-къирият дусса, оьрму колхозраву зий лавгсса хъамитайпа бур. ЦIана вайннал нину арсурваврал ва душваврал хъихъи бивтуну, хIурмат-кьиматрай ябуллай бур.

Амирдул 8 класс бувккуну бур СунбатIлив. 9-10-ми классирттаву дуклай ивкIун ур Ваччиял дянивмур даражалул школалий. Вагу къуртал бувну, дуклан увххуну ур Москавуллал областьрайсса Яхромский сельскохозяйственный техникумравун. Вагу къуртал бувну, СунбатIуллал колхозраву цал бригадирну, яла председательну зий 8-хъул шинну дурну дур. Шикку зузисса хIаллай Амирдул цува хIарачат бусса, зун гъира-шавкь дусса жагьилсса пишакар ушиву ккаккан бувну бур. Мунияр махъ 12 шин дурну дур ванал Ккуллал райондалийсса Аьрасатнал пенсионный фондрал отделениялул хъунману зий. Шикку зий унува Амирдул архIалва бувккуну бур МахIачкъалаливсса Финансирттал ва ихтиярдал институт. Ва даврий зий салкьи хьусса опыт Амирдун гихунмайсса оьрмулуву ва давриву ххуйну бучIи лявкъуну бур.

2004 шинал МахIачкъалийн ивзуну махъ пикри хьуну бур цала дакIнин ларсъсса давриха зунсса.
– Шагьрулий ттун бувчIуна лайкьну оьрму бутланшиврул ца кIанттай щякъаивкIун, чялиш увккуну хьхьичIунай ачин аьркиншиву. Цукун шайрив ххал бан айивхьуссияв ва аралуву зий. Гихунмай ттун бувчIуна ца бизнесраха зун аьркиншиву, – тIий ур Амир.
Заманалул дахханашиннардащал къуццу тIун кIулсса, бюхъу-бажар бусса жагьилсса пишакар айивхьуну ур кухнярду буллай. Муштаритал рязи байминная инсантурангу ччяни баяй. ХIакьинусса кьини Амирдул хIасул дурсса фирмалул буллалисса кухнялул мебель дур Дагъусттаннай дакъассагу, Чачаннал, Ингушетиянал Республикарттайн, Владиккавкказрайн, Ростоврайн ва цаймигу Аьрасатнал шагьрурдайн тIалав дуллай. Амирдущал зий бур ванал чIивима арс ва кулпат Зульфия.

Ва ур ­цачIара ­мебель дан ­бувкIсса инсантурал тIалав­шиннарду дузал даврил ва ми рязий баврил ялув авцIуну.
– Мебель заказ дан букIлай бур цIу-цIусса технологияртту, дизайнну кIулсса жагьил­сса оьрмулул инсантал. Мунияту хIарачат буллан бикIару дунияллийн дурксса цIушиннарду ишла дуллай зун. Ттизаманнул технологияртту ишла къадулларчан, жул даврингу щавщи биян най бур. ЖучIа зузисса пишакарталгу цала даву канилух дурксса, дакIнихтуну дуллалисса бур, – тIий ур Амир.Бизнесрал даву ванал хоббину хьуну дур. Кухнялул мебель дан ишла дуллай бур лавайсса даражалул фурнитура. ВайнначIа кухнярду тIалав буллалиминнан дур инсантурансса хIаллихшиннарду. Республикалий чIявусса конкурентътал бусса бизнесментурал дянив, хIакьину Амирдул бюхъу-бажарданий бувну дуллалисса даву нирххиравун руртун дур.

КIицI лаганна, Амир буттал шяравалугу, мазгу, миллатгу ххирасса инсан ушиву. ХIат-хIисав дакъа ххирар ванан цала жямат. Ва гьарица шяраву дуллалисса даврил чIарав сахаватлувну ацIайсса, буниялагусса патриот ур. Цува лявхъусса ва чIивинийсса оьрму лавгсса СунбатIуллал шяраву цIу дуккан дурну дур буттал къатри. Мудангу хIадурну ур гьарицагу шяраваллил багьу-бизу ххуй баву мурадрайсса давурттал чIарав ацIан ва кабакьу бан. Ва буниялагу жяматрай дакI цIуцIисса инсан ур.
– На мудангу хIадурссара ттула буттал миналуцIун бавхIусса гьарицагу агьамсса иширал чIарав ацIан. Жула щархъурду уттарану личIаншиврул гьарцаннал шаймур бан аьркинссар, – тIий ур Амир.

– «Буккарав ина, Илчи» кказит?»– куну цIувххукун: «Зун хъунмасса барчаллагьри жула мазгу, миллатрал культурагу дуруччаврил цIаний багьа бищун кьашайсса даву дуллай буну тIий.
«Илчи» ттул ниттин ххирасса кказитри. Му лавсун бувкIукун, жулва Лакку кIану дакIнин багьай тIун дикIай ттул нину», – тIий ур Амир.