Ттул кIунттихь бур Москавуллал «Перо» издательствалул, СВО-лул Аьрасатнал цалчинма Виричу, десантниктурал роталул командир, Украиннал аьрщарай цIиникь куна душмантурайн данди увккун, абадшиврувун лавгсса НурмахIаммад ХIажимахIаммадовлуясса лу «Патриот».

Луттирал авторталну бур аьралий корреспондент, Аьрасатнал Чичултрал союзрал член, Ветерантурал «Беркут» тIисса союзрал ва Аьрасатнал аьралий разведкалул Ветерантурал союзрал член, 2022-ку ва 2023-ку шиннардий яла ххуйми луттирду итабавкьусса Национал премиялул кIилийнусса лауреат, Аьрасатнал Минобороналул премиялул лауреат Сергей Федоренко ва ялув кIицI лавгсса Национал премиялул кIийла лауреат, журналист Сергей Мохарев.
Аьрасатнаву сий дусса аьралий журналистътурал, чичултрал документал журалий ва архIала пасихI литературалул мазрай магьирну жула Виричунал оьрмулул ххуллия илданухь бусан хьхьичIунмай шаву – жува цинявннал бусрав-барчаллагьрай кьамул дувансса даву хъанай дур.
Луттирал дайдихьу дурну дур Сергей Мохаревлул НурмахIаммадлухасса «Лаккучу» тIисса назмулия. ­Гихунмайрив жува, лу ккалай байбишайхтува, багьлай буру НурмахIаммадлул бусалалувун, биллай буру зунттавун, Лаккуйн, Рязаньнайн. Москавлийн, Украиннайн. Гьаннайсса, НурмахIаммадлул шаттирай ша бизлай, най буру ванал оьрмулул ххуллийх. Ваца киносуратрал биялалий кунма, багьлай буру яхIлил ва чувшиврул, ччаврил ва гъилишиврул дурцIусса чаннасса дунияллийн. Луттирая буцан къахьунсса даражалий, пасихIну ва бюхханну буслай бур автортал НурмахIаммадлул оьрмулул бусала. Ва хасну лакрал кулпатрал ххуйшивриясса ва яхIлиясса балладар, къумашивриясса, кьурчIишивриясса бухьурчагу, чаннасса кьиссар. Чаннану ккаккан дурну дунутIий виричусса арс тарбия увсса ниттил Сапижат Мазаевал, ванил уссур-ссуннал, НурмахIаммадлул виричусса буттал Энгельс ХIажимахIаммадовлул сипатру. Дагъусттаннал агьалинал, Аьрасатнал агьалинал цашивриясса, кьянкьашивриясса бусала бур ва. Лях-карах дур НурмахIаммадлул чирчусса назмурдугу. Ванал оьрмулия бавнан кIулссар НурмахIаммад литература ­ххирасса, назмурду чичаврил гьунаргу бусса жагьил ивкIшиву. Аьрасатнал Чичултрал союзрал тарихраву къавхьусса ишну хьуссар дунияллия лавгун махъ НурмахIаммад чичултрал кьюкьлувун кьамул аву. Ва луттирай утти НурмахIаммадлул назмурдугу дуккин, вайннун кьиматгу бищун хъанай бур.
Цал уттигу аьлтта чIалай исват хъанай бур Дагъусттан вирттаврал, гьунар бусса шаэртурал кюру бушиву. ДакI дарцIуну бура, НурмахIаммадлул оьрмулия бусласисса луттирду уттигу дунияллийн буккантIишиврий, ванал оьрмулия киносуратру ккаккан дуллантIишиврий.
ПатIимат Рамазанова