Ккуллал райондалийсса Къяннал шяраву хьунни Аьрасатнал Виричу НурмахIаммад ХIажимахIаммадов дакIнин утлатисса батIаву. Гьашину мукьра шин хъанай дур хасъсса аьралий операциялий Аьрасатнал Виричунал цIа цалчин ларсъсса НурмахIаммад ХIажимахIаммадов аьпалул хьуну.

Чувшиврул ва Ватан ххирашиврул яргсса эбратну хъанахъисса Виричунал гьаттайн бивунни Ккуллал райондалул администрациялул бакIчинал бигарду биттур буллалисса Ажуб ХIусманов, Лакрал ва Ккуллал районнал аьралий комиссар Аьли ГъазимахIаммадов, СВО-лул Ветерантурал ­ассоциациялул председатель, Ккуллал райондалийсса «Память гор» жяматийсса ккурандалул вакил Нураттин Рамазанов, шяраваллал администрациярттал бакIчитал, дуклаки оьрчIру ва Виричунал ­гъан-маччами.
– Дахьва оьрму байбивхьусса чIумал, щала дунияллийх цIа дуккан дурссар лакрал миллатрал арснал, цала кьянкьашиврул ва сисаврил бусалдаравун агьсса НурмахIммад ХIажимахIммадовлул. Ванал цIа ялун нанисса никиран эбратну ва бусравну личIантIиссар,– увкунни Аьли ГъазимахIммадовлул.
Виричу дакIнин увтун махъ гьайкалдануцI дирхьунни чIярусса тIутIив.

Имара Саидова