Совет аьрал Сталинградуллахлусса талатавриву ххув хьусса кьинилуцIун бавхIуну, Аьрасатнал Национал гвардиялул федерал къуллугъ сакин хьуну 10 шин шаврин хас дурсса мероприятиярттал лагрулий, Дагъусттаннал Росгвардиялул управлениялул «Скорпион-Каспий» ОМОН-далул зузалт бивунни Каспийскалий ялапар хъанахъисса Буттал кIанттул цIанийсса Хъунмасса дяъвилул ветеран Муса БагьауттиновлучIан.
Вайннал барчаллагь увкунни ветераннахь дяъвилул шиннардий ккаккан дурсса чувшиврухлу, дунни дакIний личIансса бахшишру. Ветеранналгу бувсунни хъамаллурахь дяъвилий ккавкмуния. АцIния ряхра шинаву, хъуними уссурваврал хъирив хушрай лавгун ур дяъвилийн Муса Багьауттинов. Ва усса битултрал подразделение сакин бувну бур ЛухIи хьхьирил зуманив, Туапсе шагьрулучIа. Муса гьуртту хьуну ур Ккавкказ буручлачисса, Новороссийск, Краснодар, Ростов-на- Дону шагьрурдачIасса талатавурттаву, мукуна Украиннал, Белоруссиянал аьрщарай немецнайн данди бацIавурттаву. Шикку дирну дур ванайн цалчинсса щавугу. Ххувшаву ласун хъунма хIал къаливчIсса чIумал, кIилчингу щаву дирну, демобилизоват увну ур. Ххувшаву ларсъсса ххарисса хавар ванан шавайн увкIун махъ бавну бур.
Дяъвилия махъсса шиннардий Муса республикалул даража гьаз баврил цIаний захIмат буллай ивкIун ур. Гьашину июнь зуруй ветераннан 102 шин хьунтIиссар. Ванал бур 8 оьрчI, 37 оьрчIал оьрчI. ОьрчIал оьрчIаягу бивзун бур 44 оьрчI. Оьрмулул шинну ларгун дунугу, гьавас буну ур. Ва хьунаакьай жагьилтуращал, кьамул бай хъамал.
– Буттал кIанттул цIанийсса Хъунмасса дяъвилул ветерантал хъанахъиссар жунма лавгмунил виртталнугу, чувшиврул, ватан ххирашиврул эбратнугу. Вайннал чувшиврулли жула билаятрал мюхчаншиврул гьану бивзсса. Вайннащалсса хьунабакьаву гьарицагу зузалан жува ссал цIаний къуллугъ буллалиссарив дакIнин бутлатисса агьамсса дарсну хъанахъиссар, – кIицI лавгунни отрядрал командирнал хъиривчу, полициялул подполковник Валерий Ларюшкиннул.
Андриана Аьбдуллаева
