ЦIуссалакрал райондалий ЦIуссалакрал шяравусса Культуралул къатраву «Къиримнавусса инт» тIисса фестивальданул лагрулий хьунни Къиримнал республикалийсса Сакский райондалущалсса телемострайнусса байран.

Къирим Аьрасатнавух хIала бувххун ца шин ларгун махъ, июль зурул 30-нний 2015 шинал, ЦIуссалакрал райондалул Къиримнал Сакский райондалущал чирчуссар дусшиврий­сса ва хIала-гьурттушиврийсса кьутIи. Тания шихунмай кIирагу райондалул дянив хIасул хьу­ссар уссурвалшиврийсса, хIала-гьурттусса арарду, дуллай байбивхьуссар миллатирттал дянивсса дусшиву цIакь даву мурадрайсса мероприятияртту. Гьарица шинал ЦIуссалакрал райондалул делегация лагай­ссия дусшиврийсса аьрххилущал уссур­валшиврийсса Сакский райондалул агьалиначIан.

Мукунма гьарица шинал инттухунмай Сакский райондалиясса хъамалгу лахъа-хъунну кьамул байссия ЦIуссалакрал райондалул аьрщарай. Гьашину, билаятрай коронавирусрал инфекция ппив шаврицIун дархIусса тагьар хIасул шаврийн бувну, Къиримнавасса хъамаллуращал хьунабакьинсса сант къархьунни. Му иш хIисавравун лавсун, райондалул бакIчи МахIаммад-ХIажи Айдиевлул сипталийн бувну, Сакский райондалул агьалинан Къирим Аьрасатнащал цачIун хьуну арулла шин шаврин хас дурсса, ххаллил­сса концерт ккаккан дунни телемострайхчIин. МахIаммад-ХIажи Айдиевлул цала ихтилатравугу кIицI лавгунни, кIирагу райондалул дянивсса уссурвалшиврийсса дахIавуртту гихуннайгу хъиннура цIакь дуллан­сса ниятрай бушиву. Телемострал эфирдануву Къиримнал агьалинал ххал дунни концерт, бунни кувннал кув барча буллали­сса ихтилатру.

ЦIуссаккуллал школалул дуклаки оьрчI Султанов Батырханнул, цалва буккайсса куццуй, пасихIну бувккунни Къиримнахасса шеъри.
Михаил Слободяник бакI­чисса Сакский райондалул администрациялул делегациялул ЦIуссалакрал райондалул жяматрахь дакIнийхтуну барчаллагь увкунни цивппа лахъа-хъун баврихлу ва мудан цахара дуллалисса аякьалухлу.

«ХIакьину зу цинявппа цачIун хьуну жу барча баврийну цал уттигу исват бунни жул чулухунмайсса лавайсса хIурмат ва кьимат бушиву. Буниялагу хъинну асар хьунни жухра дур­сса къулагъас»,– увкунни делегациялул.

Хъирив Сакский райондалул Культуралул управлениялул зузалтралгу увкунни балайрду, дунни къавтIавуртту.
Ахирданий телемострал гьурттучитурал бувсунни цалла районнай хьусса хъинчулиннайсса дахханашивурттая ва гихуннай дуллантIисса давурттая.