Ватандалул мюхчаншиву дуручлай бур
Аьрасатнал президент В. Путиннул билаятрал мурадру буруччаврил цIаний хасъсса аьралий операция баян байхту, ЦIуссалакрал райондалия чIявусса жагьилтал лавгунни Аьрасатнал мюхчаншиву дуруччин.
ХIакьинусса кьинигу аьралитал лайкьну бартбигьлай бур цала бурж хасъсса операция нанисса кIанттурдай. Гьамиящиял шяравасса Кьадинал арс МахIач Мухтаров миннавасса ца ур. Ва хушрай лавгун ур хасъсса аьралий операциялийн.
Ватандалул мурадру буручлай ккаккан дурсса чувшиврухлу лайкь хьуну ур личIи-личIисса паччахIлугърал наградарттан: «За отличие», «За отвагу», «За боевое отличие» ва Жуковлул медальлан.
– Жу вихну буру жува ххув хьунтIишиврийн. Цамур ххуллу бакъассар! – тIий ур МахIач.
Хасъсса аьралий операциялий ур МахIачлул уссу Маратгу.
ЯхI-къириятгу, чувшивугу буттал буттахъая ирсирай дирсса жула оьрчIру ттизаманнул вирттавран ккалли бан бучIиссар.
Ххувшаву гъан давриву гьарнал бияла хъунмассар.
Цала буржгу лайкьну бартбивгьуну, сагъ-саламатну зана хьуннав цинявппагу жула арсру, ппухълу, уссурвал.
Дагъусттаннал халкьуннал Виричу хьунни
Хасъсса операция нанисса кIанттурдай аьралий бурж бартбигьлай Дагъусттаннал жагьилтурал ккаккан дуллай бур цала чувшиву, Ватан ххирашиву.
Укунсса къучагътуравасса ца ур ЦIуссалакрал райондалийсса ЦIуссалакрал шяравасса ХIажимахIаммадлул арс Рамазан ХIасанов.
Цаппара зурдардил хьхьичI хушрай контракт чирчуну Рамазан «Каспий» батальондалуву къуллугъ бан лавгун ур.
Хасъсса аьралий операциялийсса лайкьшивурттахлу ванан дуллуну дур «Дагъусттаннал халкьуннал Виричу» тIисса цIагу, Мусил цIукугу.
Барчаллагьрал чагъар буллунни
ЦIуссалакрал райондалул ХIурматлувсса гражданин Исмяил Гапуевлун хасъсса аьралий операция нанисса кIанттурдайсса аьралитуран бувсса кумаграхлу Щалагу Аьрасатнал СВО-лул Ветерантурал союзрал чулуха буллунни Барчаллагьрал чагъар. Ванал цала дустуращал цачIу гьан бунни хасъсса аьралий операциялийн Лада Нива.
– Дяъвилул ишру нанисса кIанттурдай ххуйну бучIи лякъинтIиссар машина, – тIий ур Исмяил. Аьралитуралгу видеообращениялийхчин дакIнийхтуну барчаллагь увкунни ишбажаранчинахь ва махъ буллунни Ххувшаву ласун.
ХIажлул лачIа лакьлай бур
ЦIуссалакрал райондалул шяраваллил хозяйствалул циняв журалул предприятиярттай байбивхьунни къама бансса хIажлул лачIа лакьлай. Дагъусттаннал шяраваллил хозяйствалул министрнал хъиривчу Шарип Шарипов ивунни вай гьантрай Орджоникидзел цIанийсса СПК-лийн.
Аьмну, дугьайсса хъуруннил площадь 45 гектарданийн бивсса бур. Ца гектардания 30 центнер бакIлахъиялул дартIун дур. КIирисса гъинтнил шартIру хIисавравун ласурча, вай къаоьккисса бакIлахъияр. ЧIумуй дурсса агротехникалул мероприятиярттайну ва аграрийтурал хIарачатрайнур укунсса ккаккияртту хьун дан бювхъусса. ХIажлул лачIа мюнпат бусса ва ххуйсса бакIлахъия дулайсса культуралун ккаллиссар. Ва ризкьилун ва лелуххантран ккарма бангу аьркинссар.
Футболданул лига
ЦIуссалакрал райондалий хьунни 1999-ку шинал сентябрь зуруй райондалийн ххявхсса дунияллул террористал ххит бувну 25 шин шаврин хас дурсса футболданул лига.
ЦIуссалакрал шяравусса ттуплий буккайсса майданнив гьарица нюжмардий най дур лигалул матчру. Лигалий гьуртту хъанай дур 10 команда. Турнирданул сакиншинначитал хьунни «ЦIуссалакрал райондалул жагьилтал» ДРОО ва райондалул администрация.
Ва хъанай дур футболданул лигалул кIилчинмур сезон. Ца зурувату дантIиссар ванил хIасиллу. Ххув хьуминнан, хьхьичIунсса кIанттурду бувгьуминнан ва хьхьичIунсса буккултран булунтIиссар кубокру, медальлу, грамотарду ва райондалул администрациялул чулухасса бахшишру.
ХIадур бувссар
Андриана Аьбдуллаевал
