Украиннал аьрщарай хасъсса аьралий операция байбивхьуния шийнмай, цивппа рязину Ватандалул мурадру буруччин хIадурну бушиву ккаккан бунни жула жагьилтурал. Хушрай хасъсса аьралий операциялий гьуртту хьун най ушиву кьюлтI буллай тамансса хIал хьуну бур Лакрал райондалийсса ГьаркIассиял шяравасса Закирдул ва Жавагьил арснал ХIажимахIаммад Султановлул.

БувчIлай бухьунссия оьр­­мулул 53 шинавусса ХIажи­махIаммадлун, цала був­сса хIук­мулия ичIувами рязи къа­хьун­тIишиву. СВО-лийн гьансса пикри шайхту, кьюлтIну документру батIлай ивкIун ур. Цува военкоматрайн лавгун, хушрай хасъсса аьралий операциялийн гьансса контрактгу чирчуну, ХIажимахIаммадлул цала мурадрая бувсун бур кулпатрахь. Кулпатран бувчIлай бивкIун бур къарщину гъалгъатIун пайда бакъашиву, ванал бувсса хIукмулул хьхьичI цичIар къадацIайшиву.
– Ватандалийн кьини дурксса чIумалли адаминал къириятгу, чувшивугу ккаккан дайсса. Жува цинявппа цачIун хьурчанни ччя­сса мутталий душман ухлаган ан хьунтIисса. Ттул намусрал кьамул буллай бакъар, аьралий иширттавух гьуртту хъанахъисса жагьилтурал чIарав къаацIаву, – тIий ия, буслай бур ванал кулпат Жанна.
Ци банссия, вайннангу рязи хьун багьну бур ххувшаву ласун ва цува хIакьсса патриот ушиву ккаккан бан хушрай контрактгу чирчуну, аьралий-политикалул ххуллу язи бувгьуну нанисса цала буттащал.
Июнь зурул 7-нний, контракт­гу чирчуну, ХIажимахIамаммад лавгун ур аьралий буржру бартбигьлан.
Увну ур ХIажимахIаммад 1971-ку шинал январь зурул 7-нний Каспийск шагьрулий. ХьхьичIунсса хIасиллай къуртал бувну бур ванал Каспийск шагьрулул 2-мур школа. ХIажимахIаммад, канива бу­къаккайсса пиша бакъасса, итхявхсса инсан ия. Ва хъинну хIурмат-кьиматрай икIайва дустурал ва архIал зузиминнал дянив.
ХIажимахIаммадлул ниттил ппу, Гъумучатусса Аьбдул Шведовгу Хъун дяъвилия зана хьуну махъ талай ивкIун ур бандеровцынащал.
– Фашистътураяр кьадар­сса, лавмарсса инсанталли тай тIун икIайва. КIулссания ттаттан утти цала душнил арснангу чIярусса шиннардий оьбалартту бухIлай бивкIсса Донбассуллал агьали неонацизмалия мурахас буллан багьшиву, – буслай бур ХIажимахIаммадлул ссу Рукьижат.
ИчIувами аьтIий, хъювусул буклай бушиву чIалай, кьюлтI буллан икIайсса ивкIун ур, жучIа паракьатшиву дур, нигьа мабусару тIий.
Хасъсса аьралий операциялийгу ва най уна ивтун ур 11739-мур аьралий частьрал артиллериялул разведкалул дивизиялул отделениялул оператор-разведчикну. Февраль зуруй шичча ва тIайла увккун ур 71443-мур аьралий частьрал 2-мур стрелковый батальондалул 1-мур роталувун. Ва частьрава командованиялул гьан увну ур Донецкаллал областьрайсса Ясиноватский райондалийсса Орловка тIисса шяравалу мурахас дуллалисса талатавурттаву гьуртту хьун. Шикку къизгъинсса битавуртту нанисса кIанттурдай кIусса щаву дирну, оьрмулуцIа хьуну ур ХIажимахIаммад. Ванал чувшиврун бюхттулсса кьимат бишлай, Аьрасатнал президент Владимир Путиннул указрайн бувну, аьпалул хьуну махъ ХIажимахIаммадлун дуллунни ПаччахIлугърал ларайсса награда «Къучагъшиврул орден».
Махъва махъ ХIажимахIам­мад­луя кулпатра­чIан, душваврачIан ва ссийчIан 8-мур Мартрал байрандалущал барча буллалисса смс дуркIун дур. Амма, мунинсса жаваб дучIаннин аьраличунал оьрму бяливчIун бур.
Ванащалсса дахIаву духларгун, оьвчининнин ссавур дакъа ялугьлай бивкIун бур мачча-гъанми. Ахиргу, бацIан къавхьуну, Ростоврайн лавгун бур ливтIуминнавух урив ххал ан. Тиккусса сияхIрай ванал цIа къаляркъувкун, сагъну лякъинхьуви тIий, мадарасса хIаллай хьул бивхьуну бивкIун бур ичIувами. Я ивкIуминнавух, я сагъминнавух къаляхълай ряхвахъул зурдардий азурда хьуну бур.
Цуксса кьурчIинугу, Султановхъал кулпатрангу багьунни дяъвилул оьсса хIасратру духIан. Ванал махъ ливчIунни кулпат, шанма душ ва аьзизсса ссу.
– ХIажимахIаммад акъа­ссар учин уттигу сислай бакъара, щинчIав нясив къабаннав укун­сса дардру духIлан. Умуд бур цинявппа оьрчIру сагъ-саламатну цала нитти-буттачIан зана хьун­ссар тIисса», – тIий бур кулпат Жанна.
Шиккува кIицI лаган, къа­чIявусса лякъинссар ХIа­жи­махIаммад кунма, ванал оьрмулува ливчусса, тикку хъанахъимургу баллалисса, цивппа рязину хасъсса аьралий операциялий гьуртту хьун лавгсса инсантал.

Имара Саидова