Вай гьантрай ца шин хъанай дур ххаллилсса лаккуоьрчI, ЧIяйннал шяравасса ХIажинал арс Нариман Сулайманов жагьилсса оьрмулий жуятува лавгун.
Увну ур Нариман 2000-ку шинал, мартрал 18-нний Каспийскалий ЧIятусса ХIажинал ва Заирал кулпатраву.
2015-ку шинал лавайсса кьиматирттай Каспийскаллал 6-мур школалий урчIва классгу бувккуну, увххун ур Машиностроениялул ва сервисрал колледжравун (цIана Федеральное агентство морского и речного транспорта). 2020-ку шинал ятIул дипломрай мугу къуртал бувну, техник-спасательнал пиша лавсун бур. Школалийгу, колледжравугу хьхьичIунну дуклай ва жяматийсса давурттаву чялишну гьуртту хъанай тIий Нариман цимилагу лайкь хьуну ур грамотарттан ва арцуйнусса бахшиширттан. Мяърипат, ас-намус бусса жагьил ххирасса ивкIун ур архIал дуклакиминнан, учительтуран ва чIаххув-чIарахнан. Нариманнуя ттун бавссия ва колледжраву дуклакисса шиннардийва колледжрал директорнал хъиривчу, ЧIяйннал шяравасса Наида Кичиевая ва ванал преподаватель, ттула маччадуш Анжелика Мусаевная.
– ЯбацIансса, чурх-бакI бусса, чани нанисса оьрчI ия. Цайнма тапшур бувмур га цIана ва лажин кIялану бартбигьайва. Ия жаваблувсса.
Ванал тарбиялия, мяърипатрая тIий бикIайва циняв преподавательтал. Нариман ия хъинсса, дакI-аьмал ххуйсса жагьил. ХIайп, цимилагу хIайп, – тIий, лялиян ан къахъанай, буслай бия вай.
2021-ку шинал Нариман зий ивкIун ур Каспийскалийсса «Урбан» тIисса спортрал комплексраву администраторну. Вара шинал ноябрьданий контракт чирчуну, аьралуннаву къуллугъ бан лавгун ур. ЦIубутIуй къуллугъ буллай ивкIун ур Къиримнаву, 2022-ку шинал мартрай лавгун ур хасъсса аьралий операциялийн. Ххуйну дуклакисса уну тIий, чин дакъанугу ивтун ур гьужум байсса бригадалул командирну. Вара шинал ­августрай ирглийсса операциялуву гьужумрай лавгун, чувшиврий жан дуллуну дур.

Хасъсса аьралий операциялий аьралий бурж бартбигьлай ккаккан дурсса чувшиврухлу аьпалул хьуну махъ ванан дуллуну дур Къучагъшиврул орден. Нариман кIулми цинявппагу буслай бур ва ххуйсса тарбия ларсъсса жагьил ивкIшиву.
Ва хъуна ан, тарбия ан хъунмасса захIмат бивхьуну бур ниттил нину Ххадижатлул (аьпа баннав). Оьрмулул аргъираву лавгунни дунияллия Нариман. Ванан къабуллусса оьрму булуннав ниттин Заиран, ссийн Залинан, буттан ХIажинан, ниттил буттан Рамазаннун ва буттал буттан Нариманнун, ниттиуссурвавран, махъсса гъан-маччанан. Нариманнул рухIгу алжаннул ххари даннав.
Дяъвилул чIу бухлаганнав.
Андриана Аьбдуллаева