Гьашину 85 шин там хъанай дур Аьрасатнал магьирлугърал бусравсса ишккакку, Дагъусттаннал ПаччахIлугърал премиялул кIийла лауреат Эфендиев Валерий Аьбдуллул арс дунияллийн увккун.

МукьцIалла шинал дянив Лакрал театрдануву Валерий Эфендиевлул бивхьуну бур арулцIалунниха ливчусса спектакллу, вайннува кIива – Г. Чхеидзел «Чинарский манифест» ва М. Аьлиевлул «ПартIу ПатIима» лайкь хьуну бур Дагъусттаннал ПаччахIлугърал премиялун.
Валерий Эфендиевлул цала лахъи бакъасса оьрмулий кьабивтун бур авадансса драматургиялул ирс. Ванал пьеса «Особняк» бивщуну бивкIссар щалагу Совет Союзрай итталусса «Театр» журналданий. Бивхьуссар му Ухссавнил Ккавкказуллал миллатирттал театрдал сахIнардайгу.

С. Кьасумовлул пьесалиясса «ЛухIи кьини» спектакль 2002 шинал Владикавказрай «Сцена без границ» тIисса Дунияллул халкьуннал дянивсса миллатирттал театрдал кIилчинмур фестивальданий лайкь хьуссар «За лучшую режиссуру» дипломран (ивкIуну махъ).

Валерий Эфендиев дакIнин утлатисса мероприятие хьунни итникьини Гъумучиял магьирлугърал къатлуву.
Лакрал театрданул хъунама режиссер, Аьрасатнал лайкь хьусса артист Аслан МахIаммадовлул гьарза-гьартану бувсунни Валерий Эфендиевлул оьрмулия ва творчествалул ххуллия. Му байбивхьуну бур 1962 шинал, Москавлив Б. Щукиннул цIанийсса театрал училищалул Лакрал студия къуртал бувну, та ппурттуву Гъумук бивкIсса Лакрал театрдануву зун учIаврия. Ца-кIира шинава цIунилгу Москавливнай лавгун, увххун ур ГИТИС-рал режиссертал хIадур байсса факультетрайн. Ванал насихIатчину ва педагогну хьуну бур профессор Мария Кнебель.

Институт къуртал бувну махъ цIунилгу зана хьуну ур Лакрал театрданувун. Цувгу ччясса мутталий агьну ур щалагу Ухссавнил Ккавкказуллал хьхьичIунсса режиссертурал ххуттавун. Ванал спектакллу бивхьуну бур, так ца Лакрал бакъасса, Дагъусттаннал вайми миллатирттал театрдавугу.

Табасараннал миллатрал театр тIурча, тIивтIуну бур Валерий Эфендиевлул хIадур бувсса Дагъусттаннал паччахIлугърал университетрал магьирлугърал факультетрал актертурал отделениялул студентътурал труппалия.
1991 шинал цува дунияллия гьанцIа, Эфендиев зий ивкIссар Лакрал театрданул каялувчину.
Ихтилатру хьуну мукьах ккаккан дунни «Валерий Эфендиевлул оьрмулувасса ца кьини» тIисса, режиссернал оьрмулул ва творчествалул ххуллия бусласисса документал фильм.

Хъирив ккаккан бунни Валерий Эфендиевлул пьесалиясса спектакль «Хъин хъамаличу».
Спектакль ххал бан бувкIун бия райондалул бакIчи Зураб Куччаев, администрациялул ва идарарттал зузалт, дуклаки оьрчIру.
Спектакльдания махъ Зураб Куччаев хьунаавкьунни театрданул коллективращал. ДакIнийхтуну барчаллагь увкунни магьирлугърал хьхьичIунсса ишккакку Валерий Эфендиев дакIнин утлатисса мероприятие хасну Гъумук дан бучIаврия ва му лайкьсса даражалий сакин даврия.

Ихтилат бия театр хьхьи­чIунмай баврил ххуллийсса давурттая. КIицI лавгунни цува даингу хIадурну ушиву театрданул чIарав ацIан.
«Магьирлугъ – миллатрал дакIри ва му дуруччин жува буржлувссару», – увкунни Куччаевлул.