[dropcap]М[/dropcap]артрал зувинний Гьун­чIукьатIрал шяраву дия хъуннасса уттарашиву – жямат кIицI лаглай бия Хъарас щаврил байран. Ва шинал Хъун Хъузалану ия Давудлул арс Юсупов Пайзуллагь.

Р. Къардашов
Лакрал аьдатрайн бувну, Хъарас щаврил байран дайдирхьуна шяраваллил клубраву тIивтIусса ссупралух. Хъузалагу хъун увну, махъругу лавхъун, дуаьрттугу дурну, кIичча сукку хьуну, лаилагьгу тIий, агьали бувкIуна хъарас щилащисса хъув. Шикку, дуаьртту дурккуну махъ, Хъун Хъузалал щуна Цалчинсса хъарас, бивщуну гьаннагу. Аьдат­райн бувну, бакIлахъия буллугъсса хьуншиврул, хъузалал ялтту щин рутIлай, хIаз ласлай бия.

 

 

 

 

 

 

 

Хъу-лухччи цIу лагаврицIун дархIусса байрандалийн бувкIун бия личIи-личIисса кIанттурдаясса биялсса агьлу, хъамал, дустал, чIахху-чIарахми. Хьуна спортрал бяст-ччаллу. Дучри ххяххан бувна. Лечаврилмур бяст-ччал бавчIуна шанма бутIуйх: оьрчIал, буттахъал ва хъун буттахъал дянивсса. Ххув хьуминнан дуллуна дакIний личIансса бахшишру.

[dropcap]Я[/dropcap]ла щарнил клубраву тIивтIуна буллугъсса дуки-хIачIиялулмур мажлисгу. Дуруна диялсса дялахъру. Мажлисрал чIюлушин хъунна дуллай бия лакрал балайчитал Залихха ва Карина Далиева.
Хъиривсса шиналсса хъарас щаврил кьуру лавсунни Къарагишиев ХIасаннул.