Уча, Мариян, балай

Булбулданул чIунийну
Учара ина балай,
Аьзизсса Лакку кIану
Итталу бацIан буллай.

Экьилагай вил балай,
Зунттал щаращи кунма,
ТIутIащал щурщу буллай,
Интнил гьантрай марч кунма.

Вил балайлух вичIилий
Къума шара, шад шара,
Яла лавгсса язими
Янилу бацIан бара.

Уча, Мариян, балай,
ДакIниймур бартлагивуй,
Балай къакуну бацIан
Булбулдануща къашай.

Уча, Мариян, уча,
ДакIниймур бартлагивуй!
Бадави Рамазанов

Зунттал булбул

Интнил мюрш гъаралуннил
Щюлли лачIа дюхлул бай,
Мариян, вил балайлул
Жул дакIру рахIат дувай.

Най кунма, нарза ласлай,
Балай тIутIай щябикIай,
Ттурлу кунма, гьаз хьуну,
ЦIурттащал къавтIун бикIай.

ВичIи дишай лазгиял,
Оьрус, къумукъ, даргиял,
Цинявннал ца мазрайну
ХIакьсса булбул ва бур чай.

Вих мурчал вичIи дишай,
Гьалак хьхьири пахъ багьай,
Такьвалийну бувчIара
Зунттал булбул бушиву.

Къашайнан дарувну шай,
Сагъминнан пахруну шай,
Баргъну вил балай битай
Зунттал булбул, Мариян!
Ссамад Зявзанов

Марияннул аьпалун

Баврув, авчитал, баврув,
Бичардув циняв аврду!
Чунмай бугьанну утти
БачIи кьувкьу луларду!
Агь, дахIалай, зун ци бур,
Зулми дакIру цанни цIун:
Ас бакъул ккулла битай
Адав дунал дакIницIун!

Бивтунни, агь, бивтунни
Гьав-гьавтIи шанбачIулий,
ЛухIи лавгунни шагьру
ЛухIи леххаврил чIуний.
КIучI бунни шярал ххиттул
КIири оьттул гъатIригу,
Лагма лечлай ливчIунни
Гъинттул мюрщи гадригу.

МурцIниха ябитайни,
Цанъя мюхчан къашайсса,
Вин къакIулав къюкIултрал
Булбулгу цIарайх байсса!
КъакIулав, ссу, къанихнал
Кьаст дикIайшиву мудан
Щарссанил иттавмигу
Илкин аврду кьатI буван?!

Чувнал ттупанг бугьайсса
Буттал кIану ябанъя,
Битлатира, авчитал,
Гьасса душру зун вайнна!
Дяъвилийн увкнан бахшиш
Душманнал угь бакъаяв,
Утти хIалал буллали
Щала жяматрал ав-ав!

Зу аьвну гьантIиссару,
Кьаркьаллуй шатри кунма!..
Вихарив, ттул ххира ссу, –
Щала илданул зума.
Щил ци ляхъан барчагу,
Цир утти вин баяйсса?
Лехлайнма бур вил балай,
Бивтун бутан къашайсса!
МахIаммад-Загьид Аминов

Булбул

Балай тIий бунува булбул багъраву,
Бивтунни, бувтунни ца иман дакъул.
БяливчIссар ца оьрму интнил чагъраву
Къабувунни рахIму чIутIул ссачмалул.

Ганил балай кувкун, урттул ва тIутIал
Парх битайва чIапIив, гьаз дайва бакIру,
Ганил чIу бавукун, зунттал аьтарттал
Лагь бувайва ххурхху,
куртIний пахъ багьну.

Га чIуних вичIилий ПпабакIул хъачIрай
БацIайва бахьлаган нанисса баргъгу.
Га чIуних вичIилий Къимизул бакIрай
Аглан шайва ххивну нанисса авгу.

Бюхттулсса, ттюнгъасса балайлул щатIай
АьтIисса чIивитIу шанул ласайва.
Арсру аьрай ливчIсса ниттил хъазамрай
Къурнил тIутIал кацIну балай ликкайва.

Бивтунни балайлийн
някI чIутIул ккулла,
Кьабагьунни абад шадсса чагъана.
БакIру кьус диртунни урттул ва тIутIал,
Зума тIисса хханссар зунттал аьтара.

Дягъуй буривавли ссавнийсса цIуртти,
Хъювхъу тIий лачIлай дур
дяркъусса гъарал.
Урттул чIапIай цIайтIий,
ккиз лавгсса ккузри
Хханссар бивчIайнисса
булбулданул макь.

Душманнайн бакъаяв ккулла битайсса,
Щинъя булбулданул оьшиву дурсса?
Халкь, циванни зуща ядан къашайсса
ХIикмат, тIабиаьтрал зунна дуллусса?!

Чув диявав ттурлу: къув-аьс ва гъарал
Ишан ласласийни, яру мурчIи бан,
Чув биявав баргъгу, жан дуллалийни
Ттурлугу лагь дурну,
щинал кIунтI бутан.

Бивтунни, дагьунни булбуллул хъару,
Хъару дакъа булбул
ххяллайх бур бишлай,
Ххяллу ва зунттурду зурзутIи буллай,
Ардайх ва майданнайх балай бур лехлай.
Мирза Давыдов

Марияннуха

Оьрмулул чагъирай
Балай тIий буна,
Бивтуну бувтунна
Ина, Мариян.
Агь, къабучIиссияв
Вин ва дунъяллий,
Балай тIий тяхъану
Оьрму гьан буван.

НякI чIутIул ккуллалул
РахIму къабувну,
Абадлий лавкьунни
Вил тIутIул яру.
Ссутнил сил риртуну,
Ччуччайсса кунма,
Силул ччуччин бунни
Вил балайлул чIу.

Интту тIутIал мархри
ЦIу шайсса кунма,
ЦIу лагай дикIул дакI,
Вил чIу бавукун.
Буссар мудан, буссар
Уттигу жущал
Вил бюхттулсса чIугу,
Зурул симангу.
Минажат Ухмачева

Чунмай лавгссара?

Инт ва ссут, мяш къавхьуну, на дулувияв
Ца ина увкусса лакку балайлух.
МикIирал зунттуйхгу ачIа гьавияв,
Ччергъилттущал ина ккаккантIи хьурча.

Гъинтнил гьавасраву ина ххал шара,
Зуруйн я щутари, хьхьичIгу бацIара.
Вай лаккудушваврал балай тIутIийни,
Вилмур чIуних луглай гьулусан шара.

Агь, кIинтнил дякъийнгу
мютIи къашайсса
Щаращуйх микI бакьин
ци савав хьуссар?
Лакку маз – ттиркьюкьи,
балай кьабивтун
Мариян, абадлий чунмай лавгссара?!
Даниял Магьдиев

Агь, жул ххаллил Мариян!

Ттула ссил Марияннул аьпалун

Агь, ттул зунттал булбул,
Зиялун лавгсса.
Къучагъсса къарчигъай,
Хъаттирдал цIавцIсса.

ГъалбурцIил бувкусса
НузручIи кунма,
БатIул бунна ина
Дунияллия.

Багъирдаву булбулт
Якьаману бур,
Цалва дянивату
Ина лавгун тIий.

Вил оьрмулул аргъгу
Силул ччурччунни,
Вил тIутIул ардарав
Чявхъа бувтIунни.

Агь, дянива гъавгъсса
Чассагул хIавий,
ХIайп бакъаяв вил чурх
Янсаврал ччуччин.

Мукъуйгу цIу бусса,
Мурччай пиш ххуйсса,
Цинявннан аьзизсса
Ххаллил Мариян.

Вил ххуйшиврул хъирив
Хъювхъу къатIисса
Уртту-тIутIиврагу
Ардарав дакъар.

Вай лакрал зунттаву
Вил узданшиву
Абадул-абадлий
ЭкьинантIиссар.

Циняв махIрум бувну

Агь, инай, Мариян, Заннал малаик,
Циняв махIрум бувну, лавгунна ина.
Баргъ бугьайсса кунма лухIи ттуруллал,
Лавмартсса бивкIулул ххяппа дирзунни.

Вил балай бавманал дакIний нур лахъай,
Иминшиврул дакIгу щаллара дуцIай,
Бирлиянтрал ляълуй, аьрщарал хьусса,
Абадлийгу вил сий лекъащантIиссар.

Агь, ттул зунттавусса, ина авлул оьрчI,
ГъалбурцIил ххяппурттал ясир бувусса,
Утти ина жуща абад зевххунна,
Вил аслийсса симан дакIний яданну.

ТалихI машан ласун щища бювхъуссар
Щавуйн дурккунна дур
ттигу жул дакIру.
Буссара, буссара, ина буссара,
Гьарца кьини, ссятгу жущал буссара!
Муслимат АхIмадова

Миллатрал дакIний

Авгу бивтун бувтунни,
БахIахъругу кьавкьунни,
Амма вил бюхттул балай
Бивтун бутан къавхьунни.

Вил чIуниву – макьнатIис,
Такьвалуву ччаврил ццихь,
Шинну циксса гьарчагу,
Миллатрал дакIурдин гъис.

Ккулла вийн къавщуссарча,
Щуссар лавмартнал къюкIлийн,
Ина тIурча, буссара,
Мудан миллатрал дакIний.
Загьрани Аьбдуллаева

Уча балай

Жул зунттал булбул, ина,
Жун Лайлатулкьадрияв,
Юхссагу халкьуннахсса
Ччаврил дакI ччучлай дияв?

Вил балайлул чIу бавну,
Къума ратIгу гьарта шай,
Къурув хъунил марщагу
Зунттуну чIалан бикIай.

Уссаксса ва аьрщарай
Инсан балайлух мякьну,
Дунияллул гъунттулу
Бакъассар вингу бивкIу.

Вана, уттигу вана,
Хъат ришлай азарда ка,
Уча, Мариян, балай
Жул мякь къаливххуннича!
Рамазан Рамазанов

* * *
Вил балайлул чIу бавма,
ХIайран хьуну личIайва,
Зунттал неххардил ххурхху
ВичIилий пахъ багьайва.

Гьава буван гьаз хьусса
Лелуххант гьурххи шайва,
Ххивну нанисса авгу
Ххяллаву аглан шайва.

«Баврув, авчитал, баврув,
Бардув зунттай бахIахъру?!»
Вари махъра-махъ дурсса
Булбулданул калима.
Дундар ХIажиев

Уча, Мариян, балай


Ардарав тIутIивгу силул ччуччийча,
Зунттаву аврдалгу зума учача,
МикIиран бакьийча бявкъу щаращив,
Бюхттул барзунтталгу лухIи лаххийча.

Наранжи тIутIивгу микIирал кьатI дай,
Паранну дагьувкун,
щюлли къур ччуччай,
НякI чIутIул ккуллалул рахIму къабувну,
Абадлий лавкьунни вил ссурмав яру.

Маоьрду бувача лакрал щархъаву,
Леххаву учача зунттал неххардил,
Барашин дувача балай ххиранал,
Балай бунагьривав –
ттупанграл бивчIан?

Эшкьилул аьламрал дягъу дугьийча,
ХIакьсса ччаврил балай бяливчIссар куну,
Душваврал бавахъал мурад чIа чинссар,
ЧIу ххуйсса ссурухIи къахьуннав куну.

Гулизар Султанова