ЦIусса шинал гьантрай караматсса ишру шайссар тIисса калима цимил баярчагу, ми мукъурттил хIакьшиву цалчин тас­ттикь хьунни цIушинал гьантрай. Каникуллал гьантрай Москавлив душнищал лавгсса, хар-хаварвагу бакъанма багьунну жу Цалчинмур каналданул «Голос» проектрал финалданийн. Му хьунни Москавливсса ттула ссил жун дурсса, дакIний-мазрайрагу къадиркIсса, бахшишну.

Бадрижамал Аьлиева
[dropcap]М[/dropcap]осфильмрайн бувкIру кка­ккан дурсса чIумал. Бувххун, зана-кьулугу хьуну, хъун дакъасса экскурсия дуварду Мосфильмравух – тIайланнасса эфир дайдишиннин диялсса чIун дия. Ххал дуварду цIанихсса совет кинордаву ва ми ласлайни ишла дурмур: кукурузник-самолет, пушкарду, кинопроекторду, стационар телефоннал аппаратру, утти музейрдал экспонатру хьусса цалчин­сса сотовый телефонну, янна-ка ва чIярусса цаймигу затру. Шиккусса цимурца ххал дуллансса я каши, я чIун дакъая ва хIалатраву. Бувхру [dropcap]М[/dropcap]осфильм­рал столовойлувун дукра дукангу. Миву гьанттайнсса канай бия «Голос» проектрал финалистъталгу, коридорданувух нанийни чIарах буккайва Цалчинмур каналданул «цIурттигу», уттинин телевизорданул экраннай бакъа ххал къа­хъанай бивкIсса. Студиялувун буххан хьхьичI жанахIраву бавцIуну бунува, телефондалувухгу гъалгъа тIий, чIарах увккунни ва ххуллухсса «Голос» проектрал финалистътурава­сса ца, жула дагъусттанлув Селим Алахяровгу. Мунал телефондалувухсса ихтилат къуртал хьуннингу бавцIуну, гъан хьуру, бусарду жува Дагъусттаннаясса бушиву, жувагу, жула лагма-ялттумигу мунахлу бушиву. ЦачIусса суратгу рирщуну, эфирдания махъ кутIасса ихтилат бувансса икьралгу дурну, Селим лавгунни.
Ссят 20.00 хьуну махъ чан-чанну тIий буххан буллан бивкIунни тамашачитал «Голосрал» студиялувун. ЩябикIайми щябивкIун махъ сахIналия дакIнийн бувтунни жун тIайланнасса эфир дайдишин ссят­раяр чансса чIун личIлай душиву, бувсунни эфирданул чIумал цукун къуццу тIун аьркинссарив. Гьарца трибуналучIа ия цала-цала модератор, яни жагьилсса оьрчI-душ, тамашачитуран ци чIумал ци дуллан аьркинссарив бувчIин буллантIисса. Миннал каруннайну дуллалисса увинтирттайну бувсунни ци чIумал «хъат ришлан», ци чIумал «гурну хъат ришлан» аьркинссарив, лавай бивзун, «молодец, браво» та тIун аьркинссарив, та «пахъ багьан аьркинссарив», та «щябикIан аьркинссарив». Гьамин, тамашачитуран дакIний дитан аьркинсса ххюра «команда» дия. Бувсмур иширайну цIакь буван эфир дайдишин хьхьичI дуварду репетиция, гьай-гьай, сахIналий артистътал бакъанува. Бувсунни ччай-къаччай пожар дайдиширча, цумур трибуналун цумур хьулувух буккан аьркинссарив.
[dropcap]Ж[/dropcap]улла ялттусса гъилисса янна гардеробравун къадуларду, жущалла дитарча хъинссар увкуну, эфир къуртал хьуну махъ гардеробравун миннул хъирив ссятрай ирг­лий бацIаяр. Эфир дайдишиннин тавакъю бунни палтIурду, курткарду цащалла думиннахь мигу, сумк­ригу жува щябивкIсса кIанттал махъ ладитан, чIалачIийни цичIар къадитан. Мукунна сотовый телефонну лещан ягу автоном режимрай дишин.
ТIайланнасса эфир дайдишин чIун чIирисса личI­лачIиссаксса, гьалакшивугу ххи хъанай дия, цайминная къатIунна, ттуява тIий, ваца нава сахIналийн буккан наниссаннуха лахьлахьи­сса тагьар дия.
Ца-цаних тIий бувххунни наставниктал: Александр Градский, Пелагея, Дмитрий Билан. Ми бувхсса чIумал авара къабувсса, махъа-махъ Леонид Агутин, мунал ппу, мунал кулпат Анжелика Варум бу­ххайхту, зал хъатру ришлан, чIурду буллан бивкIуна.
ЛирчIунни тIайланнасса эфир дайдишин дурккусса минутIру… Увккунни ахиргу сахIналийн цимивагу миллион инсантурал кумир Дмитрий Нагиев, цалва хъярчирдайну, ми щаллу буллалисса куццуйну ва проект ляличIинура чIюлу дуллалисса. Мунал ккала­ккисса текстгу, ххал барча, наставниктурал махъсса чIирайсса экрандалий чIалай бикIайсса бивкIун бур, сайки махъ мукъуй бивхьуну чивчуну. ТIайлассар, ца-цавай затру Нагиевлул тикку бакъассагу учайва, мукунма – цIу бусса хъярч­ругу.
[dropcap]Л[/dropcap]ирчIунни тIайланнасса эфир дайдишин 13 секунд. Муниннин дурсса икьралданийн бувну, «ацIра», «урчIра», «мяйра» тIий, щала залданул хорданийну ккалай секунтIру, гурну ришлаши­сса хъатурдийну тIитIарду ряххилчинмур «Голосрал» финалданул тIайланнасса эфир. Гания гихуннайгу эфир къуртал хьуннин модератортурал карунних бурувгун буллай бивкIру хъунмур къуццу. Гьарца передачалул цилла формат, цилла тIалавшинна дикIайхьунссар, амма ччайнугу, къаччайнугу, цанма балай ххуй бивзнугу, къабивзнугу, модератортурал лишаннайн бувну, мудан хъатру ришлан багьлагьаву щала къулайсса иш бакъасса ххай бура. Тамашачитурал ришлаши­сса хъатру дакIнихтунусса дикIан аьркинни.
[dropcap]Р[/dropcap]еклама дусса чIумал тамашачитал рахIат буккайва, наставниктал цала янна, грим, прическарду дакьин дуллан бикIайва. Проектрал гьурттучиталгу хIадур хъанан бикIайва хъиривсса цалва номердайн.
Жул чIарав щябивкIун бия, ва ми хIурматрай хьунабавкьуна, мюрщи оьрчIалмур «Голосрал» гьурттучитал. Минная тинмай бия Селим Аляхаровлул ссу хIаласса дагъусттанлувтурал хъун бакъа­сса группа. Мигу, жугу хIисавну, ухьунссия залдануву Дагъусттаннаясса ца 10-12 инсан.
Тарихраву цалчин «Голос» проектраву хьхьичIун ливчунни дагъусттанлув. Жул ххаришиврул дазу-зума дакъая, жула Дагъусттаннаясса жагьил ххув хьуну, жувагу му ххувшаврил барачитал хьуну. Эфир лакьайхтура, жун сахIналийн бу­ккан ччай бия, амма му къабигьа­сса иш бивкIун бия, тик бивкIсса чурттурдайх ялавай, бакъагьан­сса куццуй, бугу-бувчIун, халкьуннал ккучундалувух, трибуналул лагмагу бувккун, сахIналийн бу­ккан. СахIналучIан буккан ца-кIива ша ливчIсса ппурттуву, хьхьичI авцIунни ца зунттул хъачIуксса охранник. Цувагу «сахIналийн итабакьи жу, жула земляк барча уван ччай буру» тIисса жул тавакъю баян къаацIлацIисса. «Удостоверение ккаккан бувара, итабакьинна», — тIий ия. ЖучIава буми ккаккан буллалихьувкун, цачIава кунмасса ккаккан бувара тIива. КутIану бусан, къабивтунну мунал буххан. Тинмай хьуну, цамур хьулувух ахиргу бувкру сахIналийн. Миккугу СелимлучIан гъан хьуннин ца кьюкьа мунал дустурал, кIулминнал дия, му, дянив лавсун, барча уллалисса, мунащал сурат ришлашисса.
[dropcap]Ц[/dropcap]алла ххувшаврия цIухла­хихьувкун, Селимлул увкунни: «На ттулла оьрмулувусса агьаммур ххувшаву ларсъссар ванияр 30 шинал хьхьичI. Му чIумал на, 8 зуруву дунияллийн увксса чIивитIу, ххассал уллай, ттул буттал цащава шаймургу, ца ххишалагу був­ссар ттул оьрму бяличIан къабитан, щала Чачаннал республикагу ччаннай дацIан дурну» (Селим увну ур Чачаннаву – Б. Аь.). Ттун кIулли ттухлува щалва Дагъус­ттан, Чачан, Ингушетия, щалавагу Ухссавнил Ккавкказ бивкIшиву, дакIнихтунусса барчаллагь цинявннанмагу. Ттулла ххувшаву на хьхьичIра-хьхьичI хас дуллай ура ттула нитти-буттан, нава дуккин аншиврул, ва даражалийн лахъан аншиврул цикссагу захIматшивуртту дурхIусса», — куну.

Селимлущалсса интервью рищунну хъиривмур номерданий.