Цукунсса масъалартту ххал бигьинтIиссар цифралул форумрай?
Ноябрьданул 12-нний хьунтIисса цифралул форумрай ххал бигьинтIисса масъаларттал хIакъираву бувсунни Дагъусттаннал цифралул лябуккулул ва печатьрал министр Юрий ХIамзатовлул вай гьантрай хьусса пресс-конференциялий.
Ванал тIимунийну, яла агьамми масъаларттавасса ца хъанай бур киноиндустрия лядуккан даву. «Мукунма жучIава бур дунияллул даражалийсса тIуркIурду дузал буллалисса оьрчIру. Вай хьунабакьинтIиссар цайми регионнал вакилтуращал ва хъунисса тIуркIурдал индустриялул компаниярттащал, мунил лябуккулул масъалартту ххал бигьиншиврул», – увкунни Юрий ХIамзатовлул.
Форумрал агьамми темардавасса ца хъанай дур личIинура дуручлачисса тIабиаьтрал территориярттал экологиялул мониторинг даву.
ЛичIисса площадка дузал бувну бур искусственный интеллектран. Гьурттучитурал ххал бигьинтIиссар цукун лябуккан бантIиссарив ва сфера ва цукунсса законну аьркинссарив цIусса технологияртту цалийн дуциншиврул.
Уттигу ца тема – цифралул заманнай печатьрал изданиярттал ялун бучIантIимур ва цифралул цIусса бюхъурду.
Гьашинусса цифралул форумрал салкьи бантIиссар Аьрасатнал регионная бакъасса, цаймигу билаятирттаяссагу гьурттучитал.
Каспийскаллал цифралул форумрал гьарза дуллан тIий бур ххал дигьинсса темарду, цIу-цIусса технологияртту, дунияллул халкьуннал дянивсса уртакьшивуртту, регион лябуккан баврил мюнпатсса ххуллурдугу цачIун буллай.