МахIачкъалалив Анавар­сса кумаграл республикалул клиникалул азарханалий тIивтIунни цIусса анаварсса кумаграл отделение.

ЦIусса корпусраву бур регистратура, реанимациялул, лабораториялул ва операцияртту байсса блокру, компьютерная томография дайсса кабинет, къашайшала кьамул айсса къатта, смотровая, перевязочная, мюхчаншиврул блок. Отделение хIадурну дур къашайшалт кьамул бан. Дагъусттаннал бакIчинан кIанайсса Федор Щукиннул ххал бунни циняв блокру.

– Ттизаманнул шартIирдайсса отделениялий бюхъан тIий бур инжитсса инсаннан анаварсса мутталий кумаг бувну, мунал оьрму ххассал бан. Федерал программалул, Аьрасатнал ХIукуматрал ва билаятрал президент Владимир Путиннул кабакьулийну жучIара инсаннан анаварсса медициналул кумаг бансса каши ххи хьунни. Жула буржри щала азархана цIу буккан буллан, аьркинмунил дузал буллан. Азарханалийсса шартIру къулай даву хьхьичI ххуттайн лавсъсса масъалар, – кIицI лавгунни Щукиннул ва барчалагь увкунни идаралул зузалтрахь.

Отделение дурну дур «Совершенствование экстренной медицинской помощи» федерал проектрал лагрулий. Ванил площадь 1000 кв.м. ливчу­сса бур. Анаварсса кумаграл республикалул клиникалул азархана хъанахъиссар бувагу ца идара циняв профиллай анаварсса кумаг бан шайсса. Шикку дур хьхьу-кьини къаувкуну зузисса 12 отделение. Аьмну циняв отделениярттаву 402 койка бур.