Нюжмаркьини «Илчи» кказитрал хъунама редактор Руслан Къардашовлущал жул зузалтрал аьрххи хьунни Лакрал райондалул азарханалийн. Ялтту бувкру цаппарасса ФАП-ирттал, ихтилат барду поликлиникалул хIакинтуращал ва хъунама хIакин АьбдурахIин Дибировлущал. 

Жу азарханалувун буххавривун ца чялав бия болгаркалул ка кьуркьусса къяничунай операция бувну, ка ххассал дан бюхъаврия. Мукунсса операция тIайлабацIу буну хъинну нажагьвагу къашайссар, АьбдурахIиннул сававсса канил инсан чулахъ хьун къаивтунни тIий. Ванащалсса ихтилатгу гьамин, ва бунияла караматсса иширая байбишарду.

– Болгаркалул ка кьуркьу­сса ишру ччя-ччяни хьунабакьайрув?
– Инсантал сант дакъа болгаркалущал зузисса ишру ччя-ччяни хьунабакьай. Му сававну канин зарал хьусса ишругу къачансса шай. Хьунабакьай кумаг бан къашайссагу ишру, амма ва ишираву Аллагьналгу кумаграцIух кумаг бан хьунни. Бювхъунни канил гьарца базурду зузи бан, ка зий дур, кIисри зий бур, щаву дазлай дур. Амма ва къашайшалал чIявусса оь лицIал хьуну бия – литралуяр ххишаласса. ХьхьичI гьантрай хъинну чурххал хIал чанну ия, оьттул давление дагьлай дия. Оьттувун дарув бутIин багьлай бия.

– Мукун анаварсса чIумал ишла бансса оьтту хIадурну бикIайссарив?
– Жу хIарачат бару мукунсса ишираву ишла бансса оьттул луртан хIадурну ритан. Мукунсса чIумал оь булунсса инсанталгу лякъай. Амма махъ зуманий му иширах къулагъас бунияласса дур, жу ишла байссар так МахIачкъалалия оьттул станциялул буллусса оь. Оь тIалав буллалисса аьрзагу буллуну, инсан тIайла уккайссар оь булайсса центрданийн, кIира ва дачIи – шанна ссятрал дянив оь шийн бияйссар. Оь бацIан баншиврул, ва къашайшалал ка дархIуну дия на учIаннин. Нава учIайхту дазин шаймур дазарду, базин къашайсса туннурду бахIарду, ХIасил, Аллагьнал кашилийну, ка ххассал дан бювхъунни.

– Райондалий цIуллу-сагъ­шиву дуруччаврил тагьар аьмну ци даражалий дур?
– Яла агьаммур буруккин бур пишакартал биялну бакъашиву. Зузалт бур, пишакартал бакъар. МуницIун бавхIуну багьлай бур ми зузалтрая шиккува жучIава пишакартал хIадур буллан. Кьинибархан жу дулайссар зузалтрахьхьун цала кIулшивурттал ялув зунсса давуртту. Дур паччахIлугърал программартту, билаятрал бакIчинал сипталий щурущи дурсса – миннувасса ца дур цалчинсса звенорал медициналул зузалтрал даву хьхьичIуннай даврил ялув зузисса. Му программа зий дуссар шяраваллаву ФАП-ирдал ва поликлиникарттал зузалтрал кIулшивуртту ларай даврил ялув. КIантту-кIанттурдайра му даву цифралул шартIирдай сияхIрайн ларсун дуссар, жучIа дуссар диабетрал хьуннав, къюкIлил ва туннурдал хьуннав ва цаймигу захIматсса цIуцIавурттал къашавайсса инсантурал аьдад. Жул мурад вай къашайшалт ялун личин бувну, яла вайннал цIуцIавуртту ахттар дурну ва ахирданий ми хъин бувавур. ЧIумуй диспансеризация даврил, чIумуй захIматсса азарду ялун личин даврил, цила чIумал хъин ан бюхъаврил ккаккияртту ларай хъанай дур. ХьхьичIххуттай бивхьуну буссар онкологиялул цIуцIаву ччяни ялун личин даву, багьайсса даруртту лякъиншиврул, операция бан багьлай бухьурча, му цила чIумал бан, ремиссиялул мутта лахъи бан, муницIун ми инсантал зий, занан бюхъайсса тагьарданийн бияннин хъин бан. Ца ялагу захIматсса буруккин цамургу – демографиялуцIун бавхIусса. Жул акушер-гинекологтурал хъуннасса къулагъас дуссар оьрчI байсса оьрмулул, оьрчI лякьлувусса хъаннил ва оьрчIал цIуллу-сагъшиврух.

 Педиатртал занай буссар цала участокирттайн, яла архми шяраваллавун бияннин. ОьрчIал къашайшивурттал ялувгу дуссар хасъсса программартту. Яла агьаммур программа дур – вакцина баву. Махъсса шиннардий жула жяматраву хъанахъисса ишру сававну, жалгъа баврийнсса вихшала дагьлай дур. Инсантуран кIулну бикIан аьркинссар: вакцинарду итабавкьуссар дунияллий оьцIалу, бугълама ва цаймигу оьсса цIуцIавуртту ппив хъанай диркIсса ва миннул хъинну чIявусса оьрмурду ласлай бивкIсса ппурттуву. Жалгъа баву хъинчулий ккаклай бивкIсса хьхьичIунсса инсантуравух бивкIссар диндалул инсанталгу.
ХIакьину жучIава итабакьлай буссар жула дянива чIявусса инсантал зехлахисса микробирттайн къаршисса вакцинартту. Масалдаран, ряхра шинал хьхьичI чариврагу къакIулну дурккунни цIуцIаву ковид. Му цIуцIаву дуккавривун, дакIний бурив, цукунсса гьулусаншиву диркIссарив агьалинал дянив, мунин къаршисса чаран лякъиннин, инсаннал иммунитет му азарданийн къарши дацIаннин. Чурххал иммунитет инсаннан хъинну чара бакъасса аьркинсса затри. Мунийн бувну, жу оьвтIий буру агьалинайн жалгъа баврих баччибакъулну къабикIан. Сентябрьданий байбишинтIиссару щала дунияллул кьиблалул чулий ппив хъанахъисса гриппрайн къаршисса жалгъа буллай, мунищалал архIал буллай байбишинтIиссару гьуттурдал тагьар ххуй дансса пневмококрайн къаршисса жалгъа. Яла буллай байбишинтIиссару оьрчIал азардайн (паротит, коклюш, мусикъеп) къаршисса жалгъа. Ттул аьла-ссалам буссар жула республикалул хьхьичIунсса инфекционистътуращал. Вайннавасса ца буслай бур цаппарасса районнай жалгъа баврийн къарши буклакисса цIансса инсантал сававну, жяматраву жалгъа баврийнсса вихшала яларай дагьлай дур тIий. Аллагьнайн щукру, жула райондалий мукун цIансса инсантал бакъар, къарши буклакиссагу бур нажагьсса, амма миннащалгу ихтилат буллай, вихшала дишин бансса ххуллу ляхълай буссару.

– Ина кIицI ларгунни цалчинмур звенорал даву - ФАП-ирдал даву. Цими ФАП бур райондалий, ми цуми щархъаву бур?
– ХIакьину райондалий зий буссар 24 ФАП (фельдшерско-акушерский пунктру ва фельдшерский пунктру) ва Ккуркливсса амбулатория. Вайннува мяйва фельдшерский пункт зий буссар Бабаюртуллал райондалийсса лакрал хозяйствартту дусса шяраваллаву. Гилу транспортрал къулайшинна, шартIру, инфраструктура дакъасса кIанттай ялапар хъанай бур азаллий ххюттуршунния ливчусса инсантал. Гай чIумуя-чIумуйн шийн бучIай цIуллу-сагъшиву ххал дан. ХIукуматрал гьарца батIавурттай, министерствалул коллегиярттай, оперштабрай сукку буллалисса суал бур ФАП-ирттал зузалт жул азарханалул сияхIрай бухьурчагу, цивппа идарартту, лицензия дакъашиврийн бувну, паччахIлугърал арцу итадакьлай дакъассар. Вакцина, даруртту, антисептикру ва цаймигу ишлашиврун аьркинмур гайннан жу дузал дайссар. Гай буклай буссар хIаятирттавух, ялун личин буллай буссар диспансеризация, жалгъа бувма-къабувма, анализру дуллусса-къадуллусса. Мунийн бувну, гьарца къашайшала сияхIрай уссар. Масалдаран, цаннан багьлай бур шинай шамийла диспансеризация дан, ваманан дачIишинай цал. Мукунсса давуртту жу дуллалиссару гьамин, ФАП-рдал зузалтрайхчил.

Мунийн бувну, ФАП-рдал зузалтрал дикIан багьлай бур цин лархьхьусса кIулшивуртту ва даврил бюхъу. ХIакинтал ялув бавцIуну буссар вай зузалтрал даврил. ЖучIа ми бур, учаcтковый хIакинтал хIисавну, зувия инсан. Фельдшертурал участковый хIакинтурахьхьун булайссар багьайсса информация, гайнналгу биян байссар жучIан, медсоветрай ххал бивгьуну, азар ялун личин дайссар. Райондалий щархъавусса ФАП-ирдай фельдшертурацIун зий буссар акушертал ва оьрчIал цIуллу-сагъшиврул ялув бавцIусса медсестрахъул. Камерарттал кумаграйхчил ялув бавцIуну буссару захIматрал низамрал.
Жухьхьун махъ буллунни Ккуркливсса амбулатория цIусса бан. Бухмур амбулатория бивхьуну бур шяраваллил вив къулай бакъасса кIанттай. Га амбулаториялувун чIярусса шяраваллу (КIунди, ЧIар, ЧукIун, БахIикIул, Куми хIалану) духлай духьувкун, жу тавакъю бувссия шяраваллил жяматрахь цIусса амбулатория бансса аьрщи ккаккан дара, тIий. Аьбдулхаликь СалихIовлул цала аьрщи дуллуну, буллай байбивхьуну буссар. Шинал ахирданийннин къуртал бан аьркинссар.
Махъсса шиннардий бувссар тти­аманнул тIалавшиннардацIун бавкьусса ФАП-ру: ЧIурттахь, Ххутив, КIубрав, Буршай, Урив. Багьлай бур гьарца идара щинал дузал бан.

– «Анаварсса кумаграл» даврия ци бусанна.
– Махъсса кIира шинал «Анаварсса кумаграл» къуллугъ буллуссар Дагъусттаннал катастрофарттал медициналул центрданухьхьун, мукунма жул «анаварсса кумаграл» къуллугъгу. Хъунама хIакин Шагьмандара Рамазановлул каялувшиндаралу ххуйсса коллектив буссар. Гайннал дуссар цала транспорт, гьарца аьркинмунил лащу-щаллусса. ЗахIматсса къашайшала, инсульт хьусса ягу цамур лавайсса даражалул медициналул кумаг аьркин багьлагьисса инжитсса къашайшала жучIава госпитализация дурну, яла тIайлана машиналий ягу вертолетрай иян айссар МахIачкъалалийн. «Анаварсса кумаграл» къуллугъ Дагъусттаннал катастрофарттал центрданухьхьун булаврийну даврил лябукку лавай хьунни. Махъ итабавкьусса «Анаварсса кумаграл» транспорт, гьай-гьай, хьхьичIраминнух бурувгун, къулайсса духьурчагу ччива анаварсса ишираву бунийва лавайсса даражалул кумаг бан бюхъайсса даражалийн дуцирча, гьан-бучIан захIматсса зунттал ххуллурдайх захIматсса къашайшалал оьрму нигьачIавриву бур, гьай-гьай.

– Райондалул агьалинаща бюхъайссарив шиккура анализру дулун?
– ЖучIа буссар гьарца анализатордал дузалсса лаборатория – оьттулсса хьуннав, био-химиялулсса хьуннав, гьарца цIуцIаврил анализру шиккура ларсун, шиккура ххал дан бюхъайссар. Лабораториялул каялувчинал дуссар хасъсса кIулшиву. Хьхьу-кьини къакуну, ласайссар ми анализру, захIматсса къашайшалал анализру ххал дайссар кьинилия кьинилийн. ЖучIа бакъар бактериологиялул лаборатория, му аьркинссар пневмония, ангина, лал цIалацIисса, вирусрайну хьусса цIуцIаву ххал дуван. Мукунсса лабораториялун аьркинну бур хасъсса корпус. Амма жучIа дуссар най дунура ковид, хъахъицIурцIал ялун личин дувайсса экспресс-диагностика. Жу му машан ласайссар. Вирусрал къашайшиву дусса инсан учIавривун, най дунура мукунсса экспресс-диагностика дайссар.

– Къашайшалан анавархъиндарай КТ, МРТ дан багьлагьисса ишираву ци чаран лякъару?
– Гьай-гьай, цIана каширду ххи хьуну дур. Рентгендалул установка дуссар, флюорография дайссар гьарнан, укуннасса цифралул журалийсса рентгенгу бишайссар. Медицина хьхьичIуннай най дур, лахьхьу ларайсса технологиялун ккаллину диркIмур хIакьину чарабакъа аьркинну дур. Лавайсса даражалул рентгендалул ххал бигьавуртту дансса каширду хIакьину жучIа дакъар. Ми дан тIайла буккайссар Лаващиял райондалул азарханалийн, ряхцIалла километралийх, Ккуллал райондалия тIурча, мяйцIалла километралийх. Вай махъсса ххюра-мяйра шинал лажиндарай на жула ведомствалул каялувчитурал хьхьичI бихьлай ура Лакрал ва Ккуллал районнал агьалинал диагностика дуллансса каширду лякъинсса суал, шикку районнал дянивсса хьхьу-кьини дакъа зунсса хирургиялул отделение тIитIинсса, гьарца къашайшалай шиккува операция бан бюхъаваншиврул. Мукунсса операцияртту буллансса даражалул хирургтал жучIава бур, анестезиолог акъар, жучIасса хIакин шанма мюрщисса оьрчIащал шаппа бур, мудан кIа бучIан буллан багьлай бур. Ххуйсса харж булунну тIий, учIансса пишакар ляхълай акъар. Медициналул зузалтран шагьрурдай ххисса дур арцу лякъинсса шартIру. Мунийн бувну, райондалий зун най бакъар. Кардиолог, хирург, анестезиолог райондалий зун бучIаншиврул аьркинну бур лахъсса харжру бишин.
Аьмну жул азарханалул цIа ххуйсса дур. ЖучIан хъин хьун бучIай Ккуллал, Ахъушиял, Лаващиял районнаяссагу къашайшалт. Гай районнай жуламиннаяр ялавайсса хIакинтал буссар учин къахьунссар, амма къашайшалтрал цала тIимунийн бувну, дакI дарцIуну учин бюхъанссар, цайми кIанттавасса къашайшалт жучIан букIлакIаврил ца савав шиккусса хIакинтурал хъин хьун увкIманая арцу къаласласаву духьунссар, куну.

– «Земский доктор» программалий зун бувкIсса хIакинтал бакъассарив?
– Ур цая-кIия. Программалул тIалавшинна мукунсса дур, шяраваллил кIанттай зун нанисса хIакиннан паччахIлугърал буллай бур выплата, ккаккан дурсса ххюра шин зий къадарча, ливчIсса бутIа аьркинссар зана бан махъунмай.
Му программалий зузисса ца хIакин бур Зарема ХIажиевна. Цуппагу коллективравугу, къашайшалтрачIагу бусравну буссар. Ванил лас Хайруттин Гъазиев СВО-лий кIусса щаву дирну, Красногорскалий реанимациялий уссия. Ва цуппагу тихун лавгун, аякьалий буссия.

– Ци отделенияртту зий дур хIакьину азарханалий?
– Байбишинну роддомрая. На дахьа шийн зун увкIсса шинал бувну бия 38-40 оьрчI. Отделение дия хъинну лащинсса тагьарданий, дакъая цукунчIавсса шартIру.
Отделениялийн уххавривун ттул къюкI гьалак дуккайва. Ремонт дуллалийни, подрядчикная тIалав бувссия яла лараймур качествалул материл, медициналул идарарттай дишайсса нузру, дюрчIусса плитка. Дузал дурссар къулайсса шартIру. Амма на ший уссаксса мутталий чан хьунни шяраваллил агьали, яларай дагьунни буллалисса оьрчIал аьдадгу. Хъуннасса даву дуллай буссар шагьрулийн къалавгунма, оьрчIру шийва баншиврул. Жул акушер-гинекологтал оьрчI лякьлувусса хъамитайпалул ялув бавцIуну буссар оьрчI банцIа щала мутталий. Ччясса мутталий ялун личин дуллай буссар вилттили оьрчIай асар хьунсса цIуцIавуртту, масалдаран, инфекция къадагьаншиврул. Мукун ялув къабацIарча, архсса шяраваллаву шай мукунсса ишру лякьлуву оьрчI бусса хъамитайпа цила чIумал сияхIрай къабавцIуну, мукунсса цIуцIавуртту ялун къалирчуну лирчIсса. Мукунсса талатавриву най дуссар жул даву. Ахирданий, шай мукунсса ишру, МахIачкъалалив Перинатал центрданийн анавархъиндарай биян бан багьлагьисса. Миккугу жул хIакинтал хъинну дакI цIий, центрданул хIакинтурачIан оьвтIий, ниттил ва оьрчIал цIуллу-сагъшиврул тагьардания цIухлай, гива букканцIа къулагъасрай бикIайссар.
Мукун захIматсса иширттая буруччиншиврул, ФАП-ирдал зузалтрай тIалавшинна дуссар, оьрчI лякьлувусса хъамитайпа ччяни ялун личин бан.
КIилчинмур зивулийгу, гьарта бувну, коляска духхайсса даражалийн бувцуссар палатардал хьулурду, дурссар санузельлу. Магъи дизан дурну, дурссар шамилчинмур зиву. Ший палатартту гьарза-гьартасса, чаннасса бур. ХIаятраву Лениннул гьайкалгу тийннай дурну, та чIумал райондалул чулухасса ДР-лул Халкьуннал Мажлисрал депутат ЖахIпар Абуевлул кумаграцIух дурссар приемное отделение. ЛувчIинний бувссар лаборатория, гьарца шартIирдал ва хьхьичIунсса оборудованиялул дузалсса.
Инфекцион отделениялувугу санузельгу дарду. Амма шикку ремонтгу дурну, шартIру дузал дансса харжирах цамур кIанттай цIусса отделение бавриву лябуккуну бикIанссар.
– Тти буллай лахъи лавгсса азарханагу «цIусса-бухсса» хьуну бур. КIа къуртал бувну, зий байбишинссар тIисса умуд буссарив?
– 2019 шинал танисса премьер-министр Артем Здунов райондалийн увкIсса чIумал сукку хьуна, аьркинссарив кIа азархана тIисса суал. Мукунсса суаллугу хIасул хъанай бур райондалий ялапар хъанахъисса агьалинал аьдад чансса душиврийн бувну. Азархана бур зувиллий ххюва тахлинсса, проектрай дур ацIния ххюва тахлинсса цамургу отделение. Ми суаллахьхьун на хIарачат був­ссия бувчIин бан, азархана аьркинну бушиву ттизаманнул стандартру дуруччиншиврул, агьалинан ттизаманнул медициналул кумаг бансса тIалавшиннардал лащу-щаллусса, кьараллацIун бавкьусса азархана райондалий бакъа чара бакъашиву. ЖучIа дакъар цин лархьхьусса инфекцион отделение. Ковид сукку хьусса чIумал, жул талихIиндаран къуртал дурну дуссия шамилчинмур зиву. Щалла зиву мунил къашавайминнахьхьун дуллуну дуссия.
ХIакьинугу аьркинссарив, кIаксса хъунмасса азарахана, агьали чан хъанахъисса Лакрал райондалий тIисса суаллахьхьун на исват буллай ура аьркинну бушиву. Райондалий ялапар хъанай ур ацIния ца азара инсан, му бакъассагу жул азарханалул медициналул кумаграл хъирив букIлай бур чIаххувсса районнаясса къашайшалтгу. Шагьрурдай агьали хъин буллалисса идарарттай къашайшала уттуишин ансса кIанттурду биял хъанай бакъар. Ва ялагу, жула кIа азарханалул гьанулий бюхъан тIий бур районнал дянивсса Гериатриялул центр тIитIин.
Жула районнай хъунмурчIин бугьарасса инсантал бур, кIанугу ми хъин буллан хъинну бавкьусса бур – гьава марцIсса, тIабиаьт ххуйсса, дукия химия хIала дакъасса. Ми шартIругу хIисав дурну, шикку бюхъан тIий бур жулагу, чIаххувссагу районнал бугьарасса инсантал бази лаган буллансса ттизаманнул шартIирдал лащу-щаллусса Гериатриялул центр тIитIин. Райондалул экономикалунгу лябукку бикIанссия. Масалдаран, Кахибрай буссар туберкулезрал азархана. КIагу дур архсса зунттаву, инфраструктура дакъасса кIанттай дирхьусса шяравалу, гьан-бучIан къулайсса бакъахьурчагу, инсантал кIиккун занай бур хъин хьун. Гъунив бур гьуттурду хъин бан къулайсса шартIру дусса оьрчIанссагу, хъуниминнанссагу санаторияртту. Жула райондалийгу хьунссия мукунсса, бакIрал чагъарну хьунсса кIану тIитIин.
Бухмур азархана ттизаманнул шартIирдайн буциншиврул, аьркинссар ххисса арцу харж дан. ТIалавшиннардацIун къабавкьусса кабинетру зузи баншиврул аьркинссар лицензия. Мунияту, бигьашиву дур цIуну дуллалисса къатри къуртал дан.
2021 шинал республикалул бакIчи Сергей Меликов шийн увкIсса базилухьгу, мува, цIусса азарханалул ялув суал сукку хьуна. Муний на маслихIат бувссия, азарханалул гьарца отделениялувух увккун, цала яруннин ккакканшиврул, цинярда отделениярттаву къашайшалт бушиву. Ялттугу увккун, къашайшалтращалгу ихтилат бувну, жул хIакинтурая дуллалисса цIардугу бавукун, Меликовлул цала кIицI лавгуна, ттизаманнул шартIирдайсса азархана махъ бакъа, аьркинну бушиву ва дуллай лахъи ларгсса азарханалул къатри къуртал дан багьлай бушиву.
– Ина дахьа Москавлия шийн зун увкIсса шинал дакIний бур флебологиялул операцияртту бан бувкIсса къашайшалт бия Дагъусттаннал цайми районная ва шагьрурдая бакъасса Аьрасатнал шагьрурдаягума вил цIа дургьуну бувкIун, хъинну рязину, вийн бухкъалагайсса барчаллагьрай. Уттигу хьунабакьай мукунсса операция бан вийн дакъа вихшала дакъар тIий, Гъумук операция бан бучIаншиврул ци аьркинссар тIисса инсантал. Ци аьркинссар зучIа операция бан учIан ччисса къашайшалая?
– Аьркинссар анжагъ, жул поликлиникалийн учIан. Флебологиялул операция бан аьркинсса гьарцагу ттизаманнул шартIру ва цIушиннарду жул идаралучIа дуссар.

– Поликлиникалийн ччима инсаннаща учIан бюхъайссарив, шиккун авхIуну унугу, акъанугу?
– Къашайшалан кумаг аьркинну бухьурча, сивсуну увкIун регистратуралий сияхIрай авцIуну, бюхъайссар терапевтначIан уххан, цала давление дуцин, ххал игьин. Терапевтнал ххал увну махъ, тIайла уккайссар аьркин­сса пишакарначIан. Багьлай бухьурча най унува уттуишин айссар стационарданий. Масалдаран, флебологиялул (ччаннал туннурду ялун личаву) азар дусса къашайшала най унува стационарданий утту ишин айссар. Цанчирча, ва цIуцIаву дусса инсантурал хъуннасса нигьачIаву дуссар тунну пIякь чаврия. Мунийн бувну, чIун чIарах дуккан ритан къабучIиссар. Агарда мудана жул поликлиникалул итталу икIан ччай ухьурча, документру лавсун увкIун, цува ялапар хъанахъисса кIанттайн багьлагьисса поликлиникалия ливххун, шикку сияхIрай унугу, акъанугу жул поликлиникалуцIун ахIинсса ихтияр дуссар. Масалдаран, Москавлия увкIсса инсаннан цува ший лахъи лаглай ухьурча, бюхъайссар документругу буллуну, сияхIрай авцIуну, шикку цанма аьркинсса медициналул кумаг ласун. Махъунай нанийни шичча ливххун, цIунилгу цана къулайний ацIан. Миккугу цукунчIавсса захIматшиву дакъассар. ЖучIа ванал цIа-бакI чичирча, цайнува цува хьхьичIва сияхIрай усса идаралия ливххун, жучIа цIакь хъанахъиссар.

– Дуссарив зул азарханалучIа чIарахсса арцу лякъинсса каширду?
– Мукунсса ихтияр жул ида­ралучIа дакъассар. ЧIарахсса арцу лякъин жуща бюхъан тIий бур так флебологиялул операцияртту баврийну, му азар хъин дансса каширду жучIа душиврийн бувну. Ми булланшиврулгу дикIан багьлай бур хъуннасса конкуренция. Гихунмай жул ният дуссар стоматологиялул хIаллихшиннардай арцу лякъинсса каширду хIасул дан. Ттигъанну жу кьамул арду лавайсса даражалул пишакар.
– Барчаллагь хъунма­сса­ ­мюн­патсса ихтилатрахлу. ЧIатIий буру къашайшалтрал цIуллушиврул ялув бавцIусса хIакинтуран цIуллушиву, къашайшалтран ччясса мутталий бази лагаву, райондалул агьалинан цIакьсса цIуллушиву!

Зулайхат Тахакьаева