Дагъусттаннал Конституциялул кьинилун хас дурсса шадлугъ хьунни Ваччиял шяравусса Ккуллал райондалул Культуралул управлениялул хIаятравусса Вирттаврал аллеялий. Аьрасатнал ва Дагъусттаннал гимнругу щаллу бувну, дайдирхьуна концерт.

Байран кIицI лаган бувкIсса хъамал ва райондалул жямат барча буллалисса ихтилат бувна Ккуллал райондалул администрациялул бакIчинал хъиривчу Анатолий Давдиевлул. Ванал балжину бувсуна Дагъусттаннал Конституциялул тарихрая ва мунил агьамшиврия.
– Дагъусттаннай Конституция кьамул бувну бур 1995 шинал. Июль зурул 26-нний жула республикалий аьдатравун дагьну дур ва кьини лахъа-хъунну кIицI лагаву. Республикалул Конституциялул проект хIасул давривух гьуртту хьуну бур Дагъусттаннал ХIукуматрал ва Конституциялул мажлисрал члентал бакъассагу, ихтиярдал аьлимтурал ва юристътурал группардугу. Республикалул байрандалул агьамшивугу дур Дагъусттаннал паракьатшиву ва цашиву дуруччаву мурадрайсса Закон кьамул давриву. Конституциялул тIалавшиннардугу дур Закон дуруччаву.

Республикалул агьа­ммур ­бай­ран барча дуллай, чIа тIий ура цинявннан цIакьсса цIуллушиву, цIу-цIусса хьхьи­чIуннайшивуртту, – увкуна Анатолий Давдиевлул.
Байрандалул мажлис бачин бувну ия Хъусращиял Культуралул къатлул режиссер Марсель Сулайманов.
Лавайсса даражалий хIадур дурну дия «Дагестан – край наш родной!» тIисса цIанилусса концертрал программа. Муданма кунма, концертрай хъуннасса гьурттушинна дунни райондалул школардал дуклаки оьрчIалгу.
Дагъусттаннал Конституциялул кьинилун хас дурсса шадлугъру хьунни Хъусращиял, Ккуллал, ЧIяйннал, Вихьуллал, Сухъиящиял, ЦIийшиял, Хъювхъиял, ЦIущуллал ва 1-мур ва 2-мур ЦIувкIуллал щархъавугу.

Имара Саидова