Цалчинмур ЦIувкIрав трансформатор ххуйну къазий, агьали азурдану буссия. Дагъусттаннал бакIчи Сергей Меликовлул тIайланнасса эфирданийнсса суаллу батIлатIисса ппурттуву, «Илчилул» вакилтурал суаллавух на ва масъала гьаз бувссия видеообращениялий.

Жяматрал вакилтурал ттухь тавакъю бувна, ХIукуматрал хъуниминнан му масъала баян буван шайрив ххал бува, ттукI ччя-ччяни лешлай, ласу-ка бувхIуну личIлай буру куну.
Тания махъ шяраваллил агьлу цивппагу ЦУР-данийн бувккуна. Бувккушиву Телеграмрайсса цала страницалий бувсунни ЦУР-данул хъунама Исрапил Исрапиловлул.
Уттигъанну ЦIувкIрав бакьин бувсса трансформатор бивхьушиву бувсунни шяраваллил хъунама МахIаммад-Расул Ильдаровлул.
«ЦУР-данул пишакартурал жяматрал тавакъю гьан бувссия «Дагэнерголийн» ва Ккуллал райондалул администрациялийн. «Дагэнерголул» укун дурчIин дурна жямат ттукI буну-бакъа личIаврил тагьар: шяравалу ттукIрал дузал дуллалиссар кIива трансформаторданул подстанциялул (КТП), вайннува ца ремонтрай буну, гамунил гуж къалаллай чани лешлай бия. Энергетиктурал махъ буллуна ччясса чIумул мутталий бакьин бувсса трансформатор зана бувну, зузи бан. Буллусса махъ бацIан бувссар, шяравалу щаллуну ттукIрал дузал дурссар», – чичлай ур Исрапил Исрапиловгу. Бувшиву исват буллалисса суратру ва видео гьан дунни шяраваллил хъунаманалгу.

ПатIимат Рамазанова