Вай гьантрай МахIач­къалалив Расул ХIамзатовлул цIанийсса Миллатрал библиотекалуву хьунни «Справедливая Россия» партиялун 20 шин шаврил юбилейран хас бувсса ккуркки стол. Шикку гьуртту хьунни партиялул члентал, активистътал, жагьилтал ва партиялул ветерантал.

Кьурахъул шиннардил мутталий партиярдал сияхIраву «Справедливая Россия» хъанай дур агьалинал чулухасса вихшала лайкь дурсса, кIилчинсса ххуттайсса партияну. Шагьрурдал ва шяраваллал мажлисравун партиялул чулуха кьамул бувсса депутатътал мудангу буссар цахлува чIурду буллусса инсантуращал хIала-гьурттуну, миннал масъалартту щаллу бан кумаг буллай.
Партиялул бувгьуну нанисса тIайлашиврул ххуллия, патриот социализмалия ва граджан позициялия бусласисса ихтилат бувна ДР-лийсса «Справедливая Россия» партиялул Советрал председатель, ДР-лул Халкьуннал Мажлисрал председательнал хъиривчу Камил Давдиевлул.

– Партия хIасул дурния шиннай 20 шин, му чансса мутта бакъар. Жул партиялул агьаммур мурад агьалинал оьрму бигьа-рахIат бавур. Му мурадрай жу халкьуннан мюнпатрансса тамансса сиптарду сукку дурну буссияв. Жул сипталийн бувну, сукку бувну буссар агьалинал налогру харжираха лархьхьуну дулаврил, машинарттахсса налогру дукьан даврил, хаснува зузи къабувсса, гаражраву бавцIусса машинарттаягу налог ласун къааьркиншиврул ва цаймигу къулайшиндарал хIакъиравусса сиптарду. Вай укунсса иширттаву тIайламур бацIан бан хIарачат буллай, жу Аьрасатнал президентнайн буккару. Цамургу жул партиялул гьаз буллалисса масъала ниттихъацIун бавхIусса бур. Нинушиву – му хъамитайпалул пишану ккалли буллан аьркинссар. Га шаппа оьрчIру тарбия буллалисса нинугу, къабигьасса тарбиялул даву дуллай бур. Мунихлу ганингу харжи бикIан аьркинссар. Ва масъалалул ялувгу жу тIайлашиву дан ччай буру, – тIий ур Давдиев.

Камил Давдиев личIинува авцIунни партиялул хъуннасса къулагъасрайн лавсун бушиву хасъсса аьралий операциялул гьурттучитурал кулпатру, миннал масъалартту дузрайн буккан бан кумаг баву.
«Справедливая Россия» фракциялул каялувчинал хъиривчу Марат Аьлияровлул бувсуна партиялул биялдарайсса жагьилтурал суккушиндарая. Бувсуна региондалийсса партиялул отделение хIасул шаврия, кIицI лавгуна вакилтурал бивхьусса захIмат.
Партиялул даврил опытрая, гихуннайсса планная бусласисса ихтилатру бувна ветерантурал ва партиялувун цIуну кьамул бувсса жагьилтурал.

Дагъусттаннал аьрщарайн 1999 шинал дунияллул къачагътурал кьюкьри ххярхсса чIумал, партиялул член Гагиев МахIаммадрасуллул хIасул дурну диркIссар душмантурал ххуллу кьукьинсса ополчентурал кьюкьа. «Справедливая Россия» партиялувун увххуну махъ МахIаммадрасул тамансса шиннардий уссия кIанттул отделениялийсса партиялий каялувшиву дуллай, бувчIавурттал хIасиллайгу, ванахлу яла чIявуми чIурду буллуну бикIайссия.
1999 шиналсса дяъвилул иширттал ветеран, партиялул член, тамансса шиннардий ДР-лул Халкьуннал Мажлисрал ­аппаратрай каялувшиву дуллай ивкIсса Сатираев Айтемиргу бусраврай ва хIурматрай ур Казбекуллал райондалийсса партиялул отделениялул члентурал дянив.
Марат Жанхаев – хъанай ур партиялул даву хьхьичIуннай давриву хъунмасса бутIа бивхьусса эбратрансса каялувчину. Буйнакск шагьрулийсса партиялул отделение ванал хIарачатрайну ца яла хьхьичIунмунин ккаллину дур.
Марат Кулунчаков чIярусса шиннардий каялувшиву дуллай ур Нугъайнал райондалийсса партиялул отделениялий. Ва хъанай дур бувчIавурттал хIасиллал ва партиялул даврил лидерну. Опыт бусса каялувчи увчIуну ур арулазара инсан усса Терекли-Мектеб шяраваллил администрациялул хъунаману.
Жагьилсса активист, МахIачкъала шагьрулул Мажлисрал жагьилтурал парламентрал депутат Юсупов Умаханнул бувсунни «Молодежь Справедливой России» суккушиндарал дурсса даврия ва личIи-личIисса конкурсирттаву гьуртту хьуну хьхьичIунсса кIанттурду бувгьусса, республикалул бакIчинал грант дурххусса жагьилтурая.
Ккуркки столданул даврий куннащал кув хьунабавкьунни ва опыт кIибавчIунни политикалул ва жяматийсса оьрмулуву хьхьичIун ливчусса, жагьилсса никиран насихIатчиталну хъанахъисса инсантурал.
Кьамул дунни 20 шинал мутталийсса партиялул ххуллу мяълумсса бушиву тасттикь буллалисса резолюция.
– Партиялул депутатътурал, активистътурал ва члентурал мяълум бувссар хьхьичI бивхьусса мурадру тIайлашиврул ххуллийсса сиптарду бартдигьаврил цIанийсса бушиву. Барчаллагьрай буру 20 шинал лажиндарай партиялущал архIал республика хьхьичIуннай давриву бивхьусса захIматрахлу, – тIий, чивчуну бур резолюциялий.
Имара Саидова