Ларгсса нюжмардий Поэзиялул театрдануву хьунни республикалул творчествалул ккурандалуву цIа ларгсса литературовед,
критик ва таржумачи Наталья Къапиеван 110 шин хъанахъисса аьпалул батIаву. Ва дачин дурну бия ДР-лул халкьуннал шаэр Марина АхIмадова.
Наталья Къапиеван 110 шин хьусса юбилейрайн
З. АьбдурахIманова
Дагъусттаннал литературалул гьану бизавриву ва хъиндайдихьу давриву яла чялишсса гьурттушинна дурсса Наталья Владимировна дакIнийн бутан ва ганил оьрмулиясса аьпалул махъру учин шиккун бувкIун бия «Зунттал хъами» журналданул жаваблувсса секретарь Аьжа АьбдурахIманова , ДР-лул Чичултрал союзрал хъунама МахIаммад АхIмадов, ДР-лул халкьуннал шаэр Шейт-Ханум Аьлишева, Лакрал театрданул художествалул каялувчи Бадрижат МахIаммадхIажиева, театровед Гулизар Султанова, Ю. Хаппалаевлул цIанийсса фондрал хъунама Сулайман Хаппалаев ва цаймигу.
Литературалул критик, фольклорист ва таржумачи Наталья Къапиева (Славинская) бувну бур Украиннай 1909 шинал, 30-ку шиннардий Наталья МахIачкъалалив бивзун бур. Ванил щала оьрмугу, захIматрал ххуллугу бавхIуну бур дагъусттаннал литературалущал. Цила бивхьусса захIматрахлу лайкь хьуну бур Дагъусттаннал культуралул лайкь хьусса зузалал цIанин, С.Стальскийл цIанийсса премиялун ва «ХIурматрал лишандалун».
«Натальял цила лас Апанни Къапиевлущал, Дагъусттаннал чичултрал сакиншиндарал гьанугу бивзун, хIакьинусса кьинигу щурущисса Дагъусттаннал Чичултрал союз сакин дурссар. Гай кIинналагу жунма ирсирай хъуннасса даврил хазна кьабивтссар. Критик, таржумачи учирчагу, Наталья чичу-буккулул усттарсса, мукъул пасихIсса, халкьуннал творчество ххал дигьавриву гужсса, за кIулсса фольклорист бивкIссар», — кIицI лавгуна Марина АхIмадовал.
Ца дагъусттаннал миллатирттал магьри, лахъи балайрду ва бусаларду бакъасса, ванил щалагу Ухссавнил Ккавкказуллал миллатирттал дакIнихсса творчествалул произведениярттугу таржума бувну, луттирду итабавкьуссар.
Наталья Владимировнаясса аьпалул мукъурттиву гьарма кIицI лаглай ия га пахру-ххара бакъасса, ххишала бакъа интеллигентныйсса, дагъусттаннал зунттал хъаннил куннасса хасият дусса хъамитайпа бивкIшиву.
«Наталья жул Хаппалаевхъал кулпатран хъинну ххирасса, жул, аьпа биву, буттал хъунмасса хIурмат бивкIсса, гьарнаву жувугу яла тIааьнми асарду кьабивтсса инсанни. Ттун оьрмулуву аьркин хьусса чIявусса затру ганилъя лахьхьин бувсса. Бусайсса мукъул, лаххайсса янна-уссул, дувайсса тIуллал, къуццу-бущилул цIу бусса, цуппа буний бавкьусса, иминсса, духIи-дуциндарал, яхI-намусрал бюхттулсса хъамитайпа бикIайва. Оьрмулуву Наталья кунмасса инсан хьунабакьаву на мудан ккалли бувайссар ттула бахтти-талихIран»,-увкуна Аьжа АьбдурахIмановал.
Аьпалул махъру ялагу лавхъуна Гулизар Султановал, Бадрижат МахIаммадхIажиевал, Сулайман Хаппалаевлул ва цайминнал.
А.Къапиевлул «Талатавривун» тIисса хаварданувасса ца бутIа бувккуна МахIачкъалаллал 37-мур школа-гимназиялий дуклакисса Мадина Ибрагьимовал.
Сакин дурну дия Наталья Къапиевал багьа бищун къашайсса захIматру цачIун бувсса луттирдал выставкагу.
